АТТЬӦ СОВПАРТШКОЛАЫН ВЕЛӦДЧЫСЬЯСЛЫ!

Грива вӧлӧсьтын (Сыктыв уезд) август тӧлысьын уджалісны совпартшколаын велӧдчысьяс: Чугаев Е., Сердитов А. да Чугаев М. Найӧ ӧтпырйӧ тӧдмалісны вӧлӧсьтувса олӧмсӧ дай нуӧдӧны йӧз костас быдсяма удж. Ёна бура унатор вӧчисны найӧ, шойччӧг эз тӧдлыны, быд рыт, быд лун мыйкӧ да мыйкӧ вӧчӧны: отсасьӧны исполкомлы, комсомол ячейкалы, лыддьысян керкаын да мукӧдлаын. Некутшӧм кружок найӧ вотӧдз прамӧя эз уджавлы — найӧ неуна садьмӧдісны узьӧмсьыс.

Ветлӧдлӧны сиктъясӧ уджавны йӧз костын: вӧчалӧны собранньӧяс, висьтавлӧны сӧвет власьт удж йылысь. Зэв бура кужӧны матыстчыны пемыд войтыр дінад, быдтор налысь кывзасны, быдтор висьталасны налы. Зэв ыджыд аттьӧ налы бура уджалӧм вылӧ. Колӧ татшӧм уджалысьяссӧ вӧлӧсьтъясад тшӧкыдджыка мӧдӧдавлыны.

Привда Вась.