БУРА ТӦДМАЛӦЙ СӦВЕТЪЯСЛЫСЬ УДЖСӦ!

Сельсӧветъясӧ шленӧ бӧрйылӧм йӧзлӧн уджалан воыс регыд помасяс; заводитасны бӧръявны выльысь.

Выльысь бӧрйытӧдз важ сельсӧветъяс кутасны висьтавлыны-тӧдмӧдны асланыс вогӧгӧрся уджалӧмнас. Бӧрйысь крестьяналы тайӧ важ сӧветыслысь тӧдмӧдӧмсӧ колӧ кывзыны сюсьджыка, мӧвпалӧмӧн.

Сельсӧветыд ӧд — удж нуӧдысь, юралысь дзонь деревнялӧн. Сӧвет законъяс серти да «Сельсӧвет положенньӧ» серти на вылӧ лэдзӧма со кутшӧм уджъяс: 1) кыпӧдны крестьяналысь овмӧс; 2) вермасьны сиктса йӧзкостса пемыдлункӧд; велӧдны, лечитны да мукӧдтор; 3) крестьяна дор права кутны рабочӧй-крестьяна союз серти; 4) бура сюйны сӧвет законъяс йӧз кост олӧмӧ, медым бурмӧ крестьяналӧн олӧмыс; 5) кесйӧдлыны, кыскыны крестьянаӧс — мужикъясӧс и нывбабаясӧс — сӧветса уджъяс бердӧ, олӧмнас тшӧтш веськӧдлыны.

Мый вӧчис важ сельсӧветыд крестьяналы олӧм да овмӧс бурмӧдӧм кузя? Мый вӧчис, мый эз помав? Та йылысь колӧ мӧвпыштны быд крестьянинлы важ сельсӧветлысь тӧдмӧдӧм кывзігӧн.

Омӧля кӧ уджалӧмаӧсь да уджныс оз тыдав, тӧдмавны, мыйла абу уджалӧмаӧсь.

Гашкӧ бӧрйысьлӧма омӧль, дыш йӧзӧс, гашкӧ лёк йӧз веськавлӧмаӧсь да, колӧ найӧс вежлавны. Медъёна колӧ тӧдмавны, кужисны-ӧ кыскыны, лэптыны ас гӧгӧрыс крестьянаӧс сельсӧветкӧд уджавны да йӧз костын уджавны велӧдны.

Прамӧй, зіль уджалысьяслӧн сельсӧветын киясыс асланыс оз тырмы. Налы лоӧ чукӧртны сельсӧветас секцияяс, удж нуӧдысь чукӧръяс. Сэні сюсьджык мужикъяс да нывбабаяс тӧлкуйтасны, корсясны крестьяналы бур туй, шуам кӧть: видз-мутӧ уджавны, сёян-юантортӧ кооперация пыр инӧдны, школаыдлы отсавны, сідз водзӧ. Сідзжӧ сельсӧветыд, окотитас кӧ, вермӧ корлыны аслас собранньӧяс вылӧ отсасян комитетъясысь, кооперативъясысь, профсоюзысь, делегаткаяс костысь йӧзӧс.

Медъёна колӧ крестьяналы мӧвпыштны ас йывсьыныс — ёна-ӧ найӧ асьныс окотитлісны тӧдмасьны сельсӧветса уджнас, отсавлісны-ӧ асьныс сылы уджавныс.

Бура кӧ йитчасны крестьяна сельсӧветкӧд — бура кутас уджавны и выльысь бӧрйӧм сӧветыс.

О. Попова.