КЫДЗИ КОЛӦ КОЛЛЬӦДНЫ УРОЖАЙ ПРАЗДНИК
Урожай праздник матысмӧ. Сійӧ — октябр 1-ӧд лунӧ.
Урожай праздник — крестьяналӧн праздник. Колян во миян эз на шыльыда мун тайӧ праздникыс. Таво миянлы колӧ зільны, мед сиктъясын бура мунас урожай праздник, мед крестьянаыс ставныс колльӧдасны тайӧ праздниксӧ. Урожай праздник лунӧ крестьяналы колӧ ёнджыка мӧвпыштны аслас кӧзяйство йылысь, кӧзяйство кыпӧдӧм йылысь. Колӧ сэки видзӧдлыны, кыдзи крестьянин ачыс уджаліс дай кыдзи уджалісны вӧлӧсьтса кӧзяйство удж нуӧдысьяс.
Праздник кежлӧ лӧсьӧдчыны колӧ ӧнісянь жӧ. Ӧні нин колӧ сиктъясын лӧсьӧдавны комиссияяс праздниксӧ нуӧдны. Комиссияас колӧ бӧръявны: 1) исполкомысь представительӧс, 2) агрономӧс (абу кӧ агрономыс, сельскокӧзяйственнӧй кружокын удж нуӧдысьсӧ), 3) коммунист партияысь либӧ комсомолысь, 4) шефсянь представительӧс, 5) кооперацияысь представительӧс.
Праздниксӧ колӧ вӧчны сэтшӧминын, кытчӧ ёнджыка чукӧртчывлӧны крестьянаыс.
Кӧзяинъяснас праздник вылас колӧ лоны аслыныс крестьяналы. На пиысь и колӧ бӧрйыны праздниксӧ колльыныс президиумсӧ. Сэсся президиумас жӧ колӧ сюйны агрономъясӧс либӧ бура кӧзяйство тӧдысь велӧдчӧмджык йӧзӧс дай кымынкӧ нывбабаӧс.
Тайӧ лунас сельскокӧзяйственнӧй кружокъяслы, артельяслы, совхозъяслы дай торъя крестьяналы колӧ петкӧдлыны крестьяналы став медбурторсӧ асланыс кӧзяйствояссьыс.
Праздник колляланінас колӧ вайны матігӧгӧрысь медбур видз-му уджалан машинаяссӧ, медбур скӧтсӧ, гырысь мича кӧйдысъяс, бурджык нянь кольтаяснас, мича град выв пуктасъяс да сідз водзӧ. Мӧд ногӧн кӧ шуны — вӧчны сельскокӧзяйственнӧй выставка. Выставка гӧгӧрсӧ колӧ бура уберитны да мичмӧдны. Сійӧ уджсӧ колӧ вӧчны комсомолечьяслы да пионеръяслы.
Совхозъяслы, кооперативъяслы да агрономъяслы колӧ висьтавлыны тайӧ лунӧ крестьяналы: мый найӧ вӧчисны крестьяна кӧзяйство бурмӧдӧм да кыпӧдӧм понда да мый водзӧ найӧ чайтӧны вӧчны кӧзяйство бурмӧдӧм кузяыс.
Медбур кӧзяйствояслы бура удж нуӧдӧмысь президиум лӧсьӧдӧм серти колӧ сетавны премияяс. Сэні лоӧ отсавны шефъяслы, кооперативъяслы да мукӧд организацияяслы, судзӧдны премияяссӧ. Премияяссӧ позьӧ лӧсьӧдны донтӧминикӧс.
Медвойдӧр премияяссӧ колӧ сетавны трудӧвӧй крестьянскӧй артельяслы да коллективъяслы, сэсся бӧрыннас нин торъя крестьяна кӧзяйствояслы.
Премияяссӧ сеталӧм йылысь колӧ гижны да ӧшӧдавны исполкомӧ, видз-му юкӧдӧ да мукӧдлаӧ, кӧні ёнджыка овлывлӧны крестьянаыс.
Праздник заседанньӧвывса протоколас колӧ гижны став медбура овмӧс нуӧдысь крестьянасӧ. Праздниксӧ колӧ эштӧдны спектакӧн, концертӧн либӧ мукӧд сэтшӧм гажа рытӧн. Та йылысь ёна колӧ мӧвпыштны избачьяслы да сиктъясын мукӧд удж нуӧдысьяслы.
Колӧ вӧчны сідзи, медым Урожай праздниксӧ крестьяна колльӧдасны бурджыка, гажаджыка мукӧд вичкоса сура праздникъяс дорысь.
Бура кӧ вермам колльыны Урожай праздник — позьӧ мӧд во виччысьны бурджык урожай. Лӧсьӧдчыны праздник кежлӧ кутчысьӧй ӧнісянь жӧ!
Г-зев.
