ӦТИКӦС СУДӦ СЕТІМ

Мукӧд гижысьяслы тӧдны колӧ

Кымынысь нин ми гижлім, висьтавлім газетӧ гижысьяслы: гижӧй, мися, веськыда, лӧжӧс гижӧмысь верманныд судӧ сюрны. Сӧмын век на абу имитӧма кодсюрӧлы миян шуӧмным — пыр на гижалӧны кодсюрӧ лӧжӧс.

Сы понда миян газетын быд номерын пӧшти петӧ «вочакыв» (опровержение). Бӧръявылыс вывті нин ёна кутіс тырны газетным сэтшӧм вензьӧмъяснас: ӧти гижас кодкӧ йылысь, сійӧ аддзас газетсьыд ас йывсьыс да воча гижас.

Тайӧ ёна падмӧдӧ газетын уджавны: ӧти-кӧ, газетсӧ йӧз водзын увтыртӧ, омӧльтӧ; мӧд-кӧ, мешайтӧ коланторсӧ газетӧ печатайтны кадын.

Редакция босьтчис вермасьны неладнӧ гижысьяскӧд, кӧсйӧ видзны газетӧ лӧжнӧй юӧр пырӧмысь, весавны газетсӧ став лёксьыс. Тайӧ уджас кутчысис нин: 163-ӧд номерын «Югыд туйын» (август 9-ӧд лунсяын) лэдзліс роч статья — «Будьте осторожнее!» нима. Сійӧ статьясӧ кодсюрӧ абу пыдди пуктӧмаӧсь. Со босьтам кӧть:

168-ӧд номерын «Югыд туйын» вӧлі статья «Крестьянинлӧн»: Айкатыласа «Удждысь» нима тӧвариществоысь пӧ мӧдӧдлӧмаӧсь счетоводӧс Котласӧ косаясла да мукӧд уджалан кӧлуйла; сійӧ пӧ сы пыдди вайӧма «русскӧй горкӧй». Тайӧ статья кузяыс вӧлі нарошнӧ ревизия вӧчӧмаӧсь, чукӧртлӧмаӧсь шленъяссӧ, да нинӧм сэтшӧмыс, мый гижӧма газетас, абу вӧлӧма, лӧжӧс вӧлӧм «Крестьяниныд» гижӧма.

Сы йылысь ми асьным — Редакциясянь — делӧсӧ прокурорлы сетім, тшӧктам судӧ сетны «Крестьянинсӧ» да мыждыны сійӧс лӧжӧс гижӧмсьыс.

Ми кутам и водзӧ тадзи вӧчны, казялам кӧ, лӧжӧс кодкӧ гижас.

Гижтӧдз войдӧр колӧ быдӧнлы ёна мӧвпавны: мый вермас лоны нинӧм абутӧ гижӧмсьыд.

Лӧжӧс газетӧ гижны оз позь.

В. Савин.