МЕД КРЕСТЬЯНАЛӦН СЬӦМ ОЗ ВОШ
Миян коми крестьяна оз на тӧдны став выгӧдасӧ Крестьянскӧй 5 прӧчента Заёмлысь.
Сельхозналог мынтӧмысь кындзи сылӧн облигацияясыс вайӧны ещӧ прӧчентъяс. Прӧчентъяссӧ государство кутас мынтыны 1926 восянь, февраль тӧлыссянь. Сэсся вермасны усьны облигация вылас воӧмъяс (
Кодыс выгӧднӧджык крестьяналы — ӧні сельхозналог облигацияясӧн мынтӧм али облигацияяссӧ киын дырджык кутӧм? Дерт, киын кутӧмыс выгӧднӧджык. Босьтам кӧть татшӧм пример: крестьянин ньӧбис август тӧлысьын 10 облигация, быд облигация вылӧ сетіс 95 ур, ставыс вылӧ — 9 шайт 50 ур. Сентябрын либӧ октябрын сійӧ облигацияяснас мынтіс ассьыс сельхозналогсӧ. Сылысь облигацияяссӧ босьтісны 1 шайтӧн — быд облигация вылӧ сылы воис барыш 5 ур, дасыс вылӧ — 50 ур.
Ӧні босьтам мӧдсӧ: крестьяниныд кӧ кутас киас облигацияяссӧ февраль тӧлысьӧдз, а воддза сроксьыс налогсӧ мынтас деньгаӧн, сэки сійӧ выгадайтас ещӧ 50 ур: государство мынтас сылы быд шайт вылӧ 5 ур прӧчент, облигацияяссӧ сельхозналог мынтігӧн кутасны босьтны 1 шайтӧн да 5 урӧн — дас облигация вылад воас быдса шайт унджык.
Татысь аддзам: крестьянин кӧ дырджык киас видзас облигацияястӧ — унджык пӧльза босьтас.
Сэсся быд облигация вылӧ вермас усьны воӧм — 5 шайтсянь 1000 шайтӧдз.
Неважӧн помасис нёльӧдысь Крестьянскӧй Заём латаръялӧм (розыгрыш) — тайӧ латаръялӧмыс муніс Волга ю кузя, паракод вылын, медым аддзылісны тшӧтш крестьяна асланыс синмӧн. Татшӧм латаръялӧмыс ещӧ нёльысь на лоӧ: ӧтчыд таво декабр тӧлысьын да куимысь локтан (1926) воын.
Крестьяна вермасны тӧдмавны, воӧма абу сылӧн облигацияыс быд волисполкомысь, пошта вылысь, финотделысь дай газетъясысь. Воӧм сьӧм вылӧ оз пуктыссьы некутшӧм налог. Сійӧ — зэв ыджыд отсӧг крестьянинлы овмӧссӧ кыпӧдны.
Ёна кӧ ковмас крестьянинлы мыйкӧ вылӧ сьӧм, вермас облигациясӧ закладуйтны сберегательнӧй кассаӧ — сетасны быд шайт вылӧ 75 ур. Облигацияяс вылӧ жӧ позьӧ удждыны сьӧм Сельхозбанкысь (ссуда босьтны).
Та серти ӧні крестьяналы сэсся гӧгӧрвоана лоӧ: колӧ облигацияяс ньӧбавны кыдз верман водзджык, сельхозналог сійӧн мынтыны колӧ сёрӧнджык (дырджык киын кутны) — сэки пӧльзаыс воас унджык.
