СЛАНЬ ПОС

Водз «гӧтраліс» миянӧс, Митерасса ныв-зонкаясӧс, видз-му удж вылӧ «Гӧрд маяк» колкозса председатель Илля Егорӧвич.

— Но, помассис велӧдчан воыд, жыганъяс? — гортӧ кайигӧн паныд веськаліс да юалӧ пред. — Гожӧмбыд ӧд мачасьны кутанныд. А колкозлы тулыс-гожӧмын ёна, эськӧ, отсӧгыс колӧ: агсасьны, телегаа вӧлӧн боръясысь, му помъясысь силос вылӧ турун кыскавны, Луг-Няшаын верзьӧма вӧлӧн зорӧд дорӧ юръяс ваявны...

Ыджыд-ӧ вӧлі миянсянь отсӧгыс, ог куж донъявны, но удж вылӧ петавлім быд лун. Кольччывлім гортӧ сӧмын сэк, кор воліс ӧчередь грездса мӧсъясӧс видзны. Гожӧм кык-куим кос видзьяс вылын юр кыскалім, а сэсся быдмыштім, кодлы — дас кык, кодлы — дас нёль, — Ректасӧ, лос видз вылысь турун пуктыны нуӧдісны. Вутшъясыс каджйӧдз, вутш коласъясас ва — кучик кӧмыд сэні ӧти лун кежлӧ. Пӧтшваыс пыр и усьӧ. Думыштлӧма тай кодкӧ — дӧраысь тӧбӧк. Колкоз складысь сетісны кык куль мешӧкӧн морт вылӧ. Небыд дӧра. Америкаысь, гашкӧ, кӧдзан анькытш мешӧкъясас вайлӧмаӧсь, гижӧдыс абу роч шыпасъяса. Мешӧкъяссӧ кузяла ног резьӧдісны ӧтар бокӧдыс, мӧдарӧдыс лэчыд пуртӧн вожӧдісны. Артмис куим весьт пасьта, кык метр кузьта дӧра нямӧд.

— Тайӧсьыс нӧ кыдзи сэсся кӧмыс артмас? — шӧйӧвоши.

Нывбабаяс велӧдісны нямӧдасьны. Каджйӧдз судзис, кузь гӧленя дӧра тӧбӧк артмис. Ён шӧртӧн вывсяньыс бура поньталі-гарті — кокньыд, небыд кӧм. Лоскас майбыр кунва кодь дэбыд ватіыс сэтшӧм кӧмнас келавнытӧ.

Пажын кадӧ Илля вадйын купайтчигӧн нямӧднымӧс пожйыштам, сёйигкості косьмас, бара кӧмасям-тӧбӧкасям да мунам сэтӧр сёйны, либӧ веретявывса вӧрас чӧдлачӧн чӧсмасям. Олӧма йӧз сёйӧм бӧрас ойбыртласны, а ми, челядь, Ректассӧ матігӧгӧртіыс ставсӧ кытшовтам. Ӧтчыд кык зэв паськыд да джуджыд гу Венялӧн аддзӧма.

— Волӧй, волӧй татчӧ! — горзӧ.

— Мый нин сэтшӧмсӧ аддзин? — ылісянь на юаліс Модьӧ.

— Бомбаяс, буди, коркӧ татчӧ шыбитлӧмаӧсь самолётсянь.

— Войнаыс Комиӧдзыс абу волӧма да? — Модя квайтӧд класс нин помалӧма да унджык тӧдӧ.

— Як Васьлысь юалам, — Веня оз вензьы Модякӧд, но ӧд Модя и ачыс оз тӧд, мыйся гуяс веретя вылас.

— Василей Яколлевич, эстысь кык ыджыд гу аддзим, нырд помсьыс. Бомба ли мый сэтчӧ коркӧ шыбитлӧмаӧсь? Эн кывлӧй сёрнияс?

— Хы... Шом гуяс сійӧ. Кузнечаӧ шом вӧчлісны гуясас. Ме на тшӧтш ӧти тӧв уджалі. Сотчылі весиг. Ӧтчыд эжа пырыс би ыткӧбтіс... Жарыс пытшкас — аминь!

Як Вась пажын дырйи некор эз ойбыртлыв. Нывбабаяслы косаяссӧ лэчталас, ловпуысь кодлыкӧ коса пу вӧчас, выль сабри места лӧсьӧдас... Кӧзяин. Ректасын бригадир.

Медводдза лунас локтім, да миянлы быдӧнлы уджалан места индаліс.

— Митерассаяс?.. Этайӧ, медкузьыс. Кыдзи нимыд?

— Модя, Модест! — быттьӧ генералӧ пуктӧны, висьтасис Модя.

— Сабри^Сабри — зорӧд (Улыс эжваса ног)./^ талявны!

— А тэ, — Як Вась ме вылӧ индіс, — вутш юрсьыс тай джуджыдджык нин, нӧсила туй куртны.

Магдалинаӧс, Венялысь чойсӧ (ас кежын Машаӧн шуим), да Ритаӧс, дас куим арӧсаӧсь нин, нӧсила ваявны сувтӧдіс. Шожымса нёль ныв нӧсила жӧ новлісны сабри дорӧ. Куим параыс бӧрся и курті кыскасян туйсӧ. Нӧсила пыдӧсас кӧ унджык кольӧма туруныс, орчча вылас моздорӧн нуа, а этшаджык — лоскас тальышта дай. Абу ёна тэрмасяна удж. Торйӧн нин, кор ылынджыкӧсь нӧсилаясыс сабрисяньыс.

— Ӧвсьӧй сэсся! — кыла, горӧдіс Як Вась. — Шань сэсся татчӧ! Сигӧртчам...

Удж, сідзкӧ, миян эштіс, позьӧ шойччыштны, купайтчыны либӧ сэтӧрӧн, чӧдлачӧн чӧсмасьны котӧртлыны, а Модялы вель на дыр ковмас сабри вылас масьтысьны, кытчӧдз медбӧръя турун клӧксӧ да поньтӧд ньӧръяс оз кыпӧдны. Сӧмын сы бӧрын сійӧс лэдзасны му вылӧ. Мустӧм удж сабри талялӧмыс — купайтчӧмысь, шойччӧмысь и вотӧсӧн чӧсмасьӧмысь удзалан.

Модя кык вежон мысти мыніс сабри вылысь. Дойдісны сійӧс да сэсся эз нин и кайлы сабри вылас. Сы местаӧ ме сійӧ лэчкас веськалі. Вежон, мӧдӧс сабри таляла асывсянь рытӧдз быд лун, и вежысь некод абу. Илля вад дорысь виддзыс эштіс, Педӧсей вад дорын кутім пуктысьны. И купайтчыны эм кӧні, и вотӧсаджык на вӧра мылькъясыс.

Абу завидьтана удж менам, но мый вӧчан. Модя, казяла, мудера, шпыньмунӧмӧн видзӧдлывлӧ ме вылӧ, кыдзи сабри вылас масьтыся, но абу йӧй, мыніс кӧ нин, бӧр оз вӧзйысь.

— Тэ, Пашӧ, вир йӧй! — вашъялӧ гортӧ кайигӧн тарантасын мышладорын пукалысь Модя. — Катӧдісны тэнӧ сабри вылӧ турун талявны да гожӧмбыд он нин вермы мынтӧдчыны няньтӧм уджсьыс.

Трудодень джын кӧть тыртӧм дӧра сумкаад гортад катӧдан-ӧ?

— Уна-ӧ пуктасны, сы мында и олас! Ставыс менам. Тэд нӧ кутшӧм шог да мог сэтчӧдз, Модьӧ?

— Тыртӧм тай, мися, нопйыд, а ме со еджыд гобъяс тшака шыд вылӧ сумка тыр Ректас ягсьыс воті... Жаритыштны на вичмас и...

— Мися жӧ Як Вась гӧлӧс быртӧдзыс горзіс: «Нӧ-ӧсилатӧ вайӧӧ!» Вотчин, сідзкӧ?

— Ми сэки Илля вадйын купайтчим. Тэ вот висьтав: кымынысь талун ньылӧмтӧ вадъяс пожъялін?

— Но... куимысь... Асывнас, пажын дырйи да рытнас... Гортӧ мунтӧдз тай сунласьыштім...

— А ме дасысь! Нӧшта со еджыд гобъяс воті дай Шожымса Ласей Ӧльӧксанкӧд сё кызь нӧсила турун лоссьыс петкӧдім... Трудодень да кызь сотыкӧн морт вылӧ нажӧвитім! — ошйысьӧ Модьӧ.

— Абу нӧ йӧй тэ, Пашӧ? Эз ков сабри вылас кайны! Шуин эськӧ: «Юр бергӧдчӧ...»

— А кодӧс нӧ эськӧ кыпӧдісны турунсӧ талявны? Кутшӧмкӧ пӧчӧс? Тэнсьыд со коктӧ лэбыннас дойдісны... Вежны ковмис меным...

— Дойдісны? Хӧ-хӧ-хӧ! — серӧктіс Модьӧ. — Ачым дойді, мед мынтӧдчыны мустӧм да нӧшта и донтӧм уджсьыс...

— Кыдзкӧ дай? — Веня юаліс. Сійӧ тарантас водзас пукаліс, киас вӧжжиа, вӧлӧн веськӧдліс.

— Ыджыд турун ёкмыль кыпӧдігӧн Илля Петьлӧн лэбын вожыс чеги. Сійӧ скӧрысь ӧвгис лэбын вожсӧ бадь куст улӧ, а сэсся клёнӧдыштіс чер тышкӧн чӧвтны туйтӧм нин лэбынас, перйис сійӧс да бадь куст улас жӧ, эжӧр пӧвстас кӧвдаліс. Босьті весьт кузьта чегӧм вожсӧ, некодӧн казявтӧг, да сійӧ жӧ рытнас, мӧд сабри сигӧртігӧн, и сатшки кокньыдика лядьвейӧ, небыд яяс: «Ой-ой-ой!» — горӧді.

— Асьтӧ ачыд? — чуймис Маша. — Но, дивӧ! Босьт вот да сатшкы ловъя яяд!

— Но, сабри вылас лунтырсӧ пукавлы... Трудодень оз во ни! — оз-ӧ бӧрддзы Модя.

— Герой! — гӧгӧрвотӧма ошкыштіс Рита.

— А доймӧ жӧ, вӧлӧм, аслад яйыд,.. — горӧдсис и збыльысь быдӧнӧс весьӧпӧрттӧдз.

— Абу герой, сідзкӧ! — Модялы выль дон нин Рита сетіс.

— Сабри вылысь лэччӧдісны... Нӧсила потш кузя сӧмын и шливги му вылас... Кӧртдой турунӧн вирыс пыр и сувтіс... Сэсянь зорӧд вылӧ эг кайлы.

— Паша, сідзкӧ, вежис тэнӧ? — Маша кӧритыштіс.

— А йӧй да!

— Вежӧра! Воӧма тай татшӧмторйыс юрад! — шензьыштіс Веня.

— Самурай! — сӧмын и сямми шуны.

— Коді самурайыс? Ме-е?

— А коді нӧ? Абу ӧд ме либӧ Веня! Босьт да асьтӧ ачыд бытшкы! Помнитанныд киносьыд? Японечыс, пленӧ веськаліс да, аслас пуртнас аслыс рушкуас сутшкис. Митерасын, сідзкӧ, лои жӧ самурайыд! — серӧкті.

— Петкӧдла ме тэныд самурай! — повзис, тыдалӧ, мед ог жӧ висьталӧй некодлы, ог янӧдӧй. Сійӧн и скӧрмис: — Да ме тэнӧ!..

Зыбнитчышті мышкӧн, да Модя быттьӧ эз и пукавлы тарантасас — тутіс туйбокса турун пӧвстӧ. Веня сувтӧдіс вӧвсӧ. Модя варыш моз уськӧдчыліс ме вылӧ, но Веня да нывкаяс косьӧдз воӧдчыны эз лэдзны.

— Ачыд мыжа! Аддзӧмыд мыйӧн ошйысьны! Тьпу! Самурай и эм, кыдз Паша нимтіс, — дорйӧ менӧ Веня.

Митерасӧдз сэсся сёрниттӧг и кайим. Некод эз ошйысь трудоденьнас ни купайтчӧмӧн. А Модя весиг эз и пуксьыв сэсся тарантасас.

— Но, пуксьы нин, пуксьы, — корӧ Маша.

— Кока на! — ӧвтыштіс кинас Модя. — Абу нин ылын, воа.

— Эн кор! Мед оз кӧ пуксьы, вӧлыслы кокньыдджык, — Веня ӧлӧдӧ чойсӧ.

Видз вылын сёрӧдз уджалӧм бӧрын, мудз челядьлы колкозса конюк Дарья Коль быд рыт Митерасӧ кайны телегаа либӧ тарантаса вӧв сетліс.

— Турунсӧ унджык пуктӧй, турунсӧ, — шуас. — Видз вылын уджалысь вӧвъяслы гожӧмнад туруныд норматӧм. И пукавнытӧ тіян небыдджык...

А вӧлыдлы нӧ мый? Абу мӧй ӧткодь: Шожымын узяс, аслас конюшняын либӧ Митерасын. Нёль километртӧ котӧртыштны майбыр. Пӧттӧдзыс Нёмыдысь сӧстӧм васӧ юас да, туруныс веж, выль ытшкӧм, кӧть войбыд мурчкы — ясли тырыс. Войнас ӧд сійӧс ог уджӧдӧй. Коркӧ нин кодкӧ километр ылнаысь, кытыськӧ борйысь, кос турун юр ваяс аслас мӧскыслы...

Модя кӧть и эз пуксьыв тарантасӧ, но вӧвсӧ налӧн гидын узьтӧдлім. Кильчӧ дорас лэдзасим и сійӧ рытнас, сийӧс-сиделка лӧскас ӧшлім, яслиас турун пыртлім, а сэсся и вӧлӧс сэтчӧ йӧртім, да гортӧ разӧдчалім асывводзӧдз шойччыны.

Ёна скӧрмӧма Модя самурайнас нимтӧмысь, но ачыс ӧд мыжа. Чӧв оліс эськӧ, эз ошйысь аслас сюсьлуннас... Кыскис сійӧс кодкӧ кывйӧдыс! Но, вензьыштім. Челядь костад мыйыс оз овлы. Тӧлын, школаысь кайигӧн, ӧта-мӧдӧс лым сюръяӧдз толаас туплявлам, а мӧд асывнас ставыс нин вунӧма — ӧтлаын школаӧ лэччам. Сэтчань мунігас ог дурӧй, некор. Ӧд сёрман урок вылӧ — видасны. А гортӧ локтігӧн тэрмасьны некытчӧ.

А сійӧ гожся асывнас Модя менӧ вӧвнас колис. Аддзи ӧшинь пыр доддясьӧмсӧ да школаӧ ветлан дӧра сумкаӧ дзумги йӧв сулея, кыдъя кӧлӧбъяс, пуӧм картупель, да котӧрӧн керкаысь — ывлаӧ.

— Поекали! — кывлі, рочалыштіс да Шожымлань нин ныра вӧлыслы жвучкис вӧжжи помнас каджъяс.

Нывкаяс пуксялӧмаӧсь нин, а Веня ӧдва удитіс тарантас бӧрас ӧшйӧдчыны.

— Пашасӧ виччыв! — горӧдіс Модялы Веня.

— Пашӧсӧ нӧ мыйла колян? — Маша тшӧтш горӧдіс.

— Пукалӧй! Кӧсъянныд кӧ вӧлӧн лэччыны, а он кӧ, верманныд и подӧн! — сӧмын и вочавидзис Модя.

— Мо-о-одьӧ! — горза, — виччыв!

— Суӧд! — бергӧдчыштліс бӧрвыв, жеркнитліс пӧлӧстчыштӧм вомнас да нӧшта ӧтчыд кучкис вӧлыслы.

Вӧв кыккокйыв кутіс кырссьыны грездса лудъя пурысьті. Суӧд нёль кокатӧ! Воськов вылӧ вуджавтӧг лӧсалі Шожымӧдз. Но «Гӧрд маяк» колкозса правление дорын ректасӧ мунысьяс эз нин вӧвны. Рӧкыд вылӧ, колкозса шопер дзоньталӧма драндулет-автобуссӧ да йӧзсӧ пристань дорӧдз лэччӧдӧма. Нӧшта куим километр ковмис лапсьӧдны. Подӧн кӧ мунісны ытшкысь-куртысьяс, зорӧд чӧвтысьяс, эськӧ и суӧді, но машина бӧрсяыд он вӧтчы!

Вои пристань дорӧ, видзӧда: карбас пыжным Эжва мӧдар берегланьыс нин сибӧдчӧ.

«Аминьӧй! Луныс вый сывдӧ! Ректасын кос туруныс, тӧрытъя куртӧмаыс, нӧсила сё кольліс, да талун мыйта на куртасны! — майшася. — Чӧвтан уджыс лоӧ! Ме, зорӧд талялысь, видз вылас талун зэв колана морт, но Эжвасӧ он келӧмӧн вудж ни паськӧмӧн, пажын сумкаӧн он вартчы! Коді бара сабрияссӧ талун кутас талявны?»

Пукала берег дорын, шогала. Гортӧ оз мунсьы: яндзим ӧд. Кодкӧ кӧ аддзылас Айкатыла-Шожымтіыс пажын сумкаӧн бовъялӧмӧс. Лючки эськӧ висьтасьны колкоз правлениеас да Няша видз вылас лэччыны. Уджыд и сэн, майбыр, зонкаяслы тырмӧ, но эг тай со лысьт весиг пыравнысӧ. А ӧні... Господьӧ! Пристаньсяньыс Няша зорӧдъясӧдзыс... бара сизим километр! Кор сэтчӧдз воа? Артмас сӧмын лунтыр бовъялӧм...

Ньӧмдӧмӧн пукала кер пом вылын, видзӧда — косаа нывбабаяс, месянь горулӧджык, кутісны чукӧрмыны.

«Айкатыласаяс абу на вуджӧмны!» — котӧрті на дінӧ.

— Мый нӧ, зонка, колисны шожымчиыд? Узьсис?

— Да-а-а, — тӧкӧтьӧ ырӧбӧн оз бӧрддзыссьы, но ӧд тӧдтӧм нывбабаяслы ог кут висьтасьны рытъя йӧйлуна вензьӧмнымӧс. — Муртса эг су.

— Миянкӧд вуджан, суӧдан, кокыд тэрыб...

Нёль пелыса карбасас, ваас йӧткисны да, весиг сынны пуксьылі.

— Жеб на, — чеччӧдіс пелыса пуклӧс вылысь ар дас квайта зон.

Эжва вуджӧм бӧрын тірӧді нёков дорӧдз. Берегсяньыс километр ылнаын... Метр дас пасьтаыс. Нюйта лос. Меным гӧгйӧдз. Зонпосни дӧрӧм-гач пӧрччӧмӧн сійӧс вуджавлам. Олӧма мужичӧйяс — Як Вась да Илля Петь, гачнысӧ пӧрччылӧмӧн жӧ вуджасны, а на бӧрын и косаа нывбабаяс... Подолсӧ лэптӧмӧн, мед оз няйтчыны-кӧтасьны. Ми, дерт, ог кыйӧдчӧ, ӧдйӧ водзӧ котӧртам да веретя вылысь чӧд сёям найӧс виччысигмоз.

Пӧрччысьӧмӧн вуджи нёковсӧ, мӧдӧдчи веретя кузяыс, а сэні дас туй вож. Воши! Ӧти ордымӧ нырччыла, мӧдӧ, коймӧдті вель ылӧдз кырссьыла, — абу миян туйным... Тӧдтӧм лоскӧ воа. Кузьсьыс-кузь Илля вад ни Педӧсей вад — син улӧ оз усьны... Час кык дикъялі, кузяла и вомӧнӧн Ректас нырсӧ агсалі, но колана туй вож эз сюр. Но, йӧрми тай! Ӧні нин и бӧрсӧ вуджны Эжвасӧ нинӧмӧн, ковмас рытӧдз нем вӧчтӧг тані овны да айкатыласаясыскӧд и бӧр вуджны. Асланым оз вуджӧдны! Сабри талялысь воши! А кодлы ме рытнас кола, лунтыр кежлӧ вошлӧмаыс? Сэсся кыдзи нӧ ме рытнас асланым пыж дінӧ лысьта матыстчыны. Як Вась да Илля Петь бурпӧт гогналасны-стружитасны, оз кӧ Ректассьыс дзикӧдз шытьӧдны. Он, шуасны, ков миян татшӧм рӧбӧтникыд. Нӧйтчӧ сьӧлӧмӧй, но ачым аслым жаль жӧ, мыжтӧмыд, да зіля петан туй корсьны.

«Но, ӧтдортасны Ректасысь, и мед. Уджтӧг ог коль: Няшаӧ, Лугӧ лэчча... Сэні, дерт, трудоденьсьыд и збыльысь сӧмын сотыкъяс воӧны, гожӧмбыднас этша трудодень чукӧрмас, этша нянь, турун сетасны, но ӧд и уджыс кос видз вылын, оз ков лоскын келавны... А гашкӧ, и видӧмнас на мына. Сабри талялысьыс ӧд колӧ... Но вуджа йӧз пыжӧн, мед аски видӧны...»

Бӧр косі нёков дінӧ, вуджи, но ӧд меным и Эжва берегас нем вӧчны. Вугыр шатин абу... Лунтыр он вермы купайтчыны!

«А посйыны кӧ нёковсӧ? — выль мӧвп воис юрӧ. — А мыйӧн? Чер ӧд колӧ... Сись кодь вӧсни козъяс веретя вылас, но чертӧгыд... абу ӧд мой, пу дінсӧ он йир...»

Модя вылӧ вир пуӧ: «Сюрлан коркӧ!» — ропка-видча ас кежысь.

«Чер колӧ, че-ер! Зэв буртор эськӧ лоӧ вӧчӧма. Торйӧн нин олӧма нывбабаяслы нимкодь лоӧ, — юрысь мӧвпыс эз кус... — А бакенщикыслысь кӧ корлыны? Тасянь верст и лоӧ, да нӧшта Эжва горувланьыс, миян кежанінсянь — куимсё воськов... Пыр сэні аслас пон чом кодь ичӧтик керка дорас, аддзывлам, дядьӧыс мыйкӧ ноксьӧ... Сэні кӧ ӧні, черсӧ сылысь корла. Сэки кӧть мыйӧнкӧ да прав лоа чӧвтысьяс водзын, видӧмыс, гашкӧ, этшаджык сюрас, посторсӧ кӧ вӧча...».

Ичӧтика пажнайтышті да котӧрті бакенщик керкаланьыс. Бакенщикыс буретш да керка дінас вӧлі. Выль бакенъяс, кодӧс гӧрдӧн, а кодӧс еджыдӧн, краситӧ...

— Чесь труду! Бог помош! — рочалӧмӧн чолӧмаси-бурсии.

— Аттьӧ, — копыра уджсьыс веськӧдчис дядьӧыд, гӧгӧрвоис, ме коми зонка. — Черӧс вайин?

— Кутшӧм чер? — шӧйӧвоши. — А-а-а... Ме эськӧ черла и локті да... Рытӧдзыс вайлы кутшӧмкӧ чер?

— Со ӧд! Тӧлысь сайын босьтлінныд — эн вайӧй, а бара чер?

Беддяла вот! Чери кыйысьяс, видзӧд-тӧ!

— Ме эг чери кыйны лок... коли ытшкысь-чӧвтысьясысь, айкатыласаяскӧд вуджи, но воши... Нёковсӧ, мися, посъя, пӧльза лоас кӧть нин... пӧрысь войтырлы келавны сы вомӧн лоӧ коскӧдзныс.

— Сямманныд ылӧдчынытӧ, велалӧмныд! Некутшӧм чер! Висьтав ёртъясыдлы!

— А кодлы?

— Айкатыласа зонпосниыдлы!

— Ме Митерасысь. Айкинаса зонъяссӧ ог тӧд. — кытчӧ воштыся: ковмис висьтасьны... Вӧлысь коли...

— Но, волывлі, волывлі Митерасад! — дядьӧыд перйис гач зепсьыс табак кӧшель, гаровтіс кыз чигарка, куритчӧ.

— Но-о, Митерасысь, шуан? А кымын керка сэні?

— Квайт... Миян медбӧръяыс...

— Но-но... Мамтӧ кыдз шуӧны? Пыравлі сэтчӧ тӧлын куритчыны... Тэнӧ вот эг аддзыв... Пӧръясян?

— Любаваӧн... Ме, гашкӧ, школаын вӧлі...

— Кытысь нӧ мамыд? — милиция моз юасьӧ дядьӧыс.

— Кырсысь... Салдат Вань рӧдысь...

— Ме Кырсысь жӧ... А кыдзи нӧ нимыд? — шпуткӧ-куритчӧ дядьыс, а менсьым могӧс быттьӧ и вунӧдіс...

«Ӧтчыд пӧръялӧмаӧсь — талысь он босьт ӧні весиг истӧг кӧрӧб, непӧштӧ чер...»

— Эн тай нӧ и висьтав нимтӧ?

— А мыйла? Он ӧд сет чертӧ?

— А мыйла эськӧ и ог?

— Кыла-гӧгӧрвоа — жаль! Пышйӧда тай чертӧ, колантор!

— А нимтӧ висьталан? — читкыра синмӧн дядьӧыс видзӧдӧ.

— Паша... Павел... — висьтаси, а ачым ёна нин дӧзми: «Черсӧ оз сет, а быдтор тӧдны окота...»

Дядьӧ помӧдзыс шпуткис-нёняліс чигаркасӧ, шыбитіс кок улас, нырис-таляліс бакилӧ сапӧгнас да ружӧктіс:

— Педӧр Як Ваньӧн менӧ Кырсас тӧдӧны... Кывлін?

— Ы-ы,.. Шожымса Як Васьлӧн он вокӧн лоӧй? Миян бригадаын чӧвтысь. Вок сійӧ тэныд?

— Но, став Шожымыс мен абу жӧ тӧдса... Чер, шуан, колӧ?

— Колӧ... Нёков вомӧныс пос вӧлі кӧсъя вӧчны. Жаль кӧ черыд, вуджӧд, либӧ, мӧдар берегас... Мынтыся, руб сета... Сельпоысь нянь кӧрыш ньӧба да бӧр гортӧ кая... Вуджӧдан?

— Ог! Спытайті ме тэнӧ... Он-ӧ пӧръясь... Пыралам керкаас, бӧрйы, кутшӧм чер тэныд кивывджык...

Аминьӧй! Курӧг поз ыджда керкаас и столяритан верстакыд эм! Стружъясыс и тамеска-ӧжынъясыс! И ставыс ӧд лэчыдсьыс-лэчыдӧсь.

— Менам кӧзяйствоын ставыс тайӧ колана струментъяс... Эжваыс таті крута бергӧдчӧ шуйгавыв да пуръя паракод кӧ лэччас, бакенӧс сӧмын и нюлыштас! Со и ковлӧ выль бакенъяс вӧчавны, аддзылін: краситчи? Аски, гашкӧ, и ковмас ва вылӧ лэдзны... Но, кутшӧм чер эськӧ? Этайӧ, ичӧтсӧ?

— Ичӧт чернад пуястӧ пӧрлавны — сизь кокасьӧм кодь... Этайӧс эськӧ? Пӧрӧдчыны, кӧть увйысьны... Ӧтягаджык этайӧыс...

— Вернӧ шуан... Но, босьтлы инӧ.

— А воропъяссӧ кутшӧм мичаӧс вӧчаланныд! — ошкышті. — Пигурнӧй. Менам татшӧмыд оз артмы... Кутшӧм кивыв и! Кӧть кисьыд эн лэдзлы.

— Мича, шуан? Кивыв и?

— Мича... А менам мӧлӧт вороп модаа артмӧны, веськыдӧсь...

— Но, рытнас, чертӧ ваян да, козьнала, инӧ, ӧти чер нуд... Лӧскын вель уна дасьтӧма. Рубечысь... Лӧсялӧ кӧ, сійӧ бала сертиыс и кутан сэсся ачыд вӧчавны... Месянь казьтыланторйӧн мед и лоӧ.

— Вӧч, инӧ, вӧч... Мынта. Деньгаторйыс эм, нянь вылӧ сетісны.

— Но, но... Коктӧ эн керышт, черыс лэчыд...

— Эг на эськӧ некор керыштлы да... пӧрӧдчигӧн ни лӧсасигӧн.

— А босьтлы нӧшта кльӧщи, сутуга кытшыль, гез пом... Перевединасӧ, слегаяссӧ сутуганас крепитыштан... Гезйыс — кыскасьнытӧ...

Лэчыд чера, неыджыд небыд сутуга кытшыля — котӧрӧн сорӧн мӧдӧдчи нёков дінӧ. Вуджи... Яг сикассьыс бӧрйи да пӧрӧді вӧсньыдик, литр стеклӧ банка кызта, вит пу... Увйи...

Суп-сап! Час эз коль, слегаяс веретя вылын нин пласьтвидзисны... Шыркниті гезйӧн — он на кыскы! Сьӧкыд!

Воли-кырсси, домаси гезйӧн, мый вынысь нетшка-дерита. Воськолӧн мында ӧтчыд нетшыштӧмнас локтыштӧ! Бара коз пу пӧрӧді, метрӧн-джынйӧн кузьта чинталі, кырсьсӧ воли — ут пуяс вылӧ нин... Слегаясыд ли вывтіыд чой горувсӧ асьныс, кыскытӧг, исковтісны. Кык пу ковмис кыр йылас бергӧдны, йылӧн-дінӧн ӧд поссӧ вольсала. Час нокси-мырси, а верми ӧд бергӧдны, кӧть и кузьӧсь слегаясыс.

Берегысь берегӧ нёков вомӧныс судзисны. Поскыс быттьӧ и лоис нин. Вуджалі ӧтарӧ-мӧдарӧ. Кок улын ванъялӧны слегаясыс, вӧйӧны нюйта лоскас. Корси вожа йыла нёль вӧсньыдик кыдз, пӧрӧді, чинті метр кык кузьтаӧ, дінладор помсӧ ёсьті да тувъялі лоскас слегаяс бокӧ, ӧтар-мӧдарас гозйӧн. А сэсся и кык переведина слега улас, сой кызтаӧс, сюйи вожкаяс пырыс, сутугаӧн слегаяссӧ перевединаыскӧд гартлі, кӧртавлі. Ӧтарӧ-мӧдарӧ пос кузяыс ветлі — кӧть йӧкты! Крепыд пода пос лоис слань вомӧныс, но... «Олӧма нывбабаясыд татшӧм пос вылад оз и тувччыны, — ас кежысь мӧвпала. — Перилӧ нӧшта колӧ быть!»

Мыйкӧ и гежмалі жӧ веретя вӧрӧдыс, километр ылнаӧдз ветлі перилӧ улас вожа йыла сюръяяссӧ корсигӧн. Аддзи ӧд, буретш туянаӧс. Ёсьті дінладорсӧ да ӧтиӧн-ӧтиӧн ӧдва и верми кыскавны пельпом вылын. Час-мӧд бара коли, кор перилӧ сюръяясыс ас местаас сувтісны.

Вель дыр и зібсӧ перилӧ вылас ковмис корсьны. Пӧрӧді вӧсни кузь пожӧм, воли кырсьсӧ да гезйӧн кыскӧмӧн и вайи пос дорӧ. Кыпӧді ӧтар помсӧ вожка вылӧ, мӧдарсӧ, сэсся шӧрӧдыс лӧсьӧді да куимлаті бара кӧртавлі.

Бур и пос артмис! Котрав кӧть чеччав, оз нин, майбыр, лайкъяв ни ванъяв кок улын.

«Но, ӧні сэсся позьӧ нин йӧз син улӧ петкӧдчыны, — мӧвпала. — Лунсӧ эг весьшӧрӧ колляв».

Шондіыс вӧртаслань ёна тӧдчымӧн нин катовтчӧма. Час вит, кӧнкӧ, эм нин. Часӧн-джынйӧн мысти локтавны кутасны чӧвтысь-куртысь-ытшкысьяс. Кынӧм гуръялӧма. Бырӧді коляс пажынторйӧс да скачӧн и ветлі бакенщик керка дорас, нуи дядьӧыслы черсӧ да кльӧщисӧ.

— Но, вӧчин постӧ? Артмис?

— Кӧть йӧкты! — ошйысьышті.

— Молодеч, сідзкӧ! Мужик нин, позьӧ шуны, пос кӧ артмис.

Педӧр Як Вань козьналіс мича чер пу, чайӧн на юкталіс, да сэсся и бӧр котӧрті аслам пос дінӧ. Биаси номъяс дӧзмӧдчӧмысь, виччыся локтысьясӧс.

Регыд тыдовтчисны чӧвтысьяс — Як Вась да Илля Петь, а на бӧрын и нывбабаяс. Веськыдвывсянь тыдовтчисны, а ме сэтчӧ и эг слӧймыв асывнас пыравны.

— Мый нӧ, Пашаыс, тан вӧчан? Би видзан? — юалӧ Як Вась.

— Нинӧм ог вӧч.

— Мый нӧ эн волы зорӧдсӧ талявны, вуджин кӧ нин Эжвасӧ? Лытайтан?

— Воши... Туйсӧ эг аддзы.

— Як Ӧнь бабӧс сабри вылас ковмис катӧдны... Купайтчин, кӧнкӧ, лунтыр. Ог и вуджӧдӧй вот.

Бипурыс туй чукыльын вӧлі, поскӧй сэтысянь эз тыдав.

— Аминьӧй! Нёков вомӧныс слань пос! Кевны оз ковмы, — радлӧны нывбабаяс, кор на пӧвстын локті пос дорӧдз.

— Ӧтнад вӧчин? А черыд нӧ кытысь?

— Бакенщикыс сетліс...

— Ог вӧлі кӧсйӧй вуджӧдны, а ковмас, тыдалӧ, — бурпырысь нин шуис Як Вась.

— Кыдз нӧ он вуджӧд? Этатшӧм буртор вӧчӧма да! — Як Ӧнь баб дорйыштіс. — Собалам няйт пырыс, а мужикъяс, некодлы юраныд эз волы поссӧ вӧчыштны. Ӧні сэсся майбыр нин!

— Но, но! Ковмас, сідзкӧ, и трудодень пасйыны, — Илля Петь шуис.

— Кыкӧс на мед бригадирыс гижас, — Як Ӧнь баб дон содтӧ.

Тыдовтчисны и грездса нывка-зонкаяс. Чӧд сёйны, дерт, кольччылӧмаӧсь, вом доръясныс лӧз.

— Модялы, менӧ кольӧмысь, ковмас келӧмӧн вуджны! Йӧтка вот ваас!

— А-а-а! Тэнад поснад дай! — пӧрччис гачсӧ, келӧ пос бокті. И друг нёков шӧрас юр вывтіыс дзумгысис: ветланінсьыс бокын йир, тыдалӧ, вӧлӧма, «ӧшинь», сэтчӧ сылӧн и тальыштчӧма.

— Ык! –Ык! –Ык! — мыччысис пельпомӧдзыс да сӧмын и ыпкӧ.

Ньӧр мыччисны, отсалісны берег вылас кайны.

Гортӧ кайигӧн оз-оз дай кодкӧ мӧдлас гигзьыны-серавны Модьӧ вылын, а сійӧ дузӧма, немтор оз шу... А мый и шуан, унаӧныдкӧд кось он пан.