«САБОТАЖНИЧА»
— Анна Алексеевна, фронт вылас абу вӧвлӧмныд, а снимок вылад — нёль медаля? — альбомсӧ листала.
— Вӧзйысьлім эськӧ пронт вылас Густя пӧдругакӧд, но эз босьтны. Дас сизим ар некоднаннымлы на эз тыр. Но нелямын ӧтиӧд вося арнас, октяб помын, кыкнаннымлы и воис повестка: «Габова Анна Алексеевна.
Густя пӧдруга дінӧ котӧртлі, меным кодь жӧ гижӧда бумага воӧма: «Игушева Августа Васильевна...»
Гортын кольӧны кык чой. Лена, ыджыдджык меысь, дас арӧса Настя да мам, шӧр арлыда. Ӧльӧксей бать да Ёгор вок фронт вылынӧсь. Густялӧн фронт вылын батьыс да вокыс, но керкаыс пуста оз жӧ коль... Ыджыд семьяа овмӧсъяс Висер ю йылын. Няня удж трактор вылад, да гортысь синватӧг лэдзисны кыкнаннымӧс.
«Велӧдчӧй, чой-вокнытӧ кок йылӧ сувтӧдны отсалӧй!» — татшӧм и вӧлі колльӧдчӧмыс.
Овмӧдісны Шойнаты сиктса школаӧ дас кык нылӧс. Вель ыджыд жырйын, кык судта пӧвъя пӧлатя наръяс вылын узьлам. Кӧдзыд. Пескыс быран выйын, а тӧлыд кузь! Лэччӧдісны багыръясӧн, чер-пилаясӧн Висер ю вылӧ. Гожӧм пуксигас ляпкыдик, векни ю вылас кык ыджыд пур сибдӧма.
Начальникным — мастер, вӧвлӧм тракторист Михаил Петрович.
— Вот, нывкаяс... Школаным пестӧм. Ковмас йисӧ керавны, сутугасӧ разьны да керъяссӧ ӧти-ӧтиӧн йи вылас багырӧн лэптавны, а сэсся пӧперечкаӧн пилитны, даддьӧн школа дорӧдз кыскавны, поткӧдлыны, тэчны чипасъясӧ — пескаӧсь лоам тӧвбыд...
— Вины кӧсъянныд! Ме вӧрӧ, бурджык, мӧдӧдча! Вӧвнад, майбыр, сямма! Сортовка керъяс Висер ю берегӧ кута пармаысь петкӧдны! Тані ӧд сювйӧс орӧданныд! — Ыджыдвидз сиктысь Агния тшӧтясьӧ. Агниялы вомас чуньтӧ эн сюй, гырддзаӧдзыд курччас (общежитиеын, бӧрас, старӧстаӧн сійӧс и бӧрйим... Веськыда шуа — комендант! Пусьысь вылын, и миян).
— Но, нывкаяс, мый шуанныд? Лэдзам Агния Мишаринасӧ «Вӧр фронт» вылас? — шпыньмуніс Михаил Петрович.
Кыв некод эз шу. Ӧд збыль, и миянлы кӧть пышйы! Локтім велӧдчыны, а тшӧктӧны мырддьыны Вакульыслысь йиӧн дорӧм, ва визувнас лыаӧн джынвыйӧ тыртӧм кык ыджыд пур! Поткӧдлӧмнас — комын сыв пес! Измӧмаӧсь, сулалам.
— Лэдзам нывсӧ? — мӧдысь юалӧ мастер. — Сэні — «Вӧр фронт», а миян... велӧдчанныд да — «Му выв фронт». Гитлеркӧд вермасьысь армияяслы и керйӧн колӧ отсавны, и няньӧн салдатъяссӧ вердны!
Ланьтӧмаӧсь. Мый татчӧ шуан?
— Ме ӧтнам ог жӧ мун! — Агния чер босьтіс, йи керавны лӧсьӧдчӧ да меліа нин юалӧ: — Но, Михаил Петрович! Шойнаты колхозас нӧ вӧлыс абу? Перъялам, пилитам, кыр йылӧдзыс катлам, а сэсянь... нӧшта верст... мед новлӧны вӧлӧн... А школаса зонкаясыс? Дас нёль арӧсаясыс?! Поткӧдчынытӧ миысь, нывъясысь, восьтерджыкӧсь! Чипасад и школаса нывкаяс тэчасны!
— Збыль тай! Ставсӧ кӧ ӧтвыв! Школаса завхозыс и катлас пессӧ местаӧдзыс... Сёрнитла директорыскӧд... Нывъяснас руководитны тэнӧ и инда, Агния! — кывкӧрталіс Михаил Петрович.
Весиг клопайтыштім.
— Но и босьтчим, сідзкӧ, нывъяс! Мед шоныд лоас миян класс! — Агния нин командуйтӧ.
Лунтыр йисӧ кералім, багыръясӧн керъяссӧ йи вылӧ лэпталім, лым вылын пилитчим, дадьясӧн кыр йылӧдзыс катлім. Школаса зонкаяс поткӧдчисны.
— Посньыда! Посньыда поткӧдлӧй! — командуйтӧ Агния. — Йизьӧм плакатӧ кор на Мороз-Пӧльыс шупӧдас? Быд асыв и рыт вит пач уборщицалы, да миянлы на тшӧтш, ныас пуыштны, ковмас ломтыны плита пачтӧ!
Агниялысь быть кывзысь! Кӧть сартасӧдз зонкаяс юкаласны, уджыс мӧдӧдчис да. Агния ӧд школаса мастерысь, завхозсьыс, стрӧгджык!
Михаил Петрович эз бара эновтлы миянӧс! Завтрак бӧрын кӧкъямыс час асывсянь лэччӧдӧ Висер ю вылӧ. Медводз кутчысьӧ чер-багырӧ, кыткӧ зоръялыштас и пыр велӧдӧ-индасьӧ:
— Дзик вадорас эн матыстчӧй! Ӧні вот ут сюйӧй! Но-о-о! Тшукӧдӧй багыръястӧ!.. Нетшыштім!.. Но, вот и пилитчысьяслы, и даддя нывкаяслы удж лоис! Вӧла-морт воас... Лолыштӧй, нывъяс... Батьяс-вокъяс фашисткӧд тышкасьӧны, а ми нӧ... коньӧръяс? — сьӧлӧм сетӧ. — Вермам тай! И гӧра-кӧдза вермам!
Пажынӧдз йи улысь керъяс перъялам-пилитчам-кыскасям. Сёйыштны мастер нуӧдлас. Ныасыс — картупеля шыд, но вердны мастер тшӧктӧ пӧттӧдз:
— Зэв сьӧкыд удж бертам! Кодлы содтӧд? Няньыс лун кежлӧ — квайтсё грамм, а ныасыс — кынӧм дундытӧдз! Сэсся ӧд, и асьным пусьылім. Быд субӧта рытӧ, велӧдчӧмсӧ кӧкъямысын мастер помалас, — гортӧ лэдзӧ. Пывсьыштны... Кодкӧ и кӧлӧбъяс, ид нянь вайыштас, яйтор... Грездад ӧд мӧс, кукань, Ен сетӧ, ыжъяс... И яй, и йӧвтор эмышт... Кыскысисны и миянӧс, содтӧд гортсаяс вердыштісны.
— Кыдз кужанныд, нывкаяс, а выльлунӧ... сизим час асылын мед вӧлінныд школаын! Пуксьӧдасны менӧ пӧтачкаысь! — мастер тадз стрӧжитас.
Сёрнитчам, да ылысса грездсаяс водз, асъя войнас на и петам. Нывъёртъяс виччысьӧны нин кильчӧ дораныс, кор Густякӧд Паслэччӧмсянь увланьджык сикт-грездъясӧдз котӧрӧн сорӧн воам...
Бара удж... Завтрак бӧрын пажынӧдз керъяс йиа ваысь перъялам. Пажын бӧрын вит час рытӧдз пес жӧ заптам. Кык ыджыд пурйыдлӧн пыдӧсыс, буди, абу?
Квайт час рытын ужин... И велӧдчӧм... Быд лун нёль урок. Субӧта рытӧ гортӧ лэдзлӧны...
Ме ӧтягаджык вӧлі, да уроксӧ кывза... Синмӧ куньсьӧ жӧ, но мыйкӧ и кольӧ юрӧ, мыйкӧ тетрадьӧ пасйыштала, а Густя пӧдругаӧй — стынитӧ-узьӧ! Укшальмӧма!
«Густя! Густя!» — шӧпкӧда, гырддзаӧн тойыштла. — Эн узь! Вӧтласны ӧд, нинӧм кӧ он кут сяммыны висьтавны! Вӧрӧ и ковмас кайны! Но, садьмы, Густя, но? Трактористкаӧн лоан, а он кут кер дін йирны!»
— Ы-ы-ым! Аннуш! Ун личкӧ... Ог кыв немтор... Пельӧ оз кыв... Т-т, т-э-э... гиж... Аски висьтыштан...
Кык тӧлысь ноксим пескӧн. Декаб помӧдз...
Но Ен отсӧгӧн и пес заптан удж коркӧ помассис. Квайт час рытсянь жӧ велӧдчим, но асывсяньыс... школаӧдз Шойнаты МТС гаражын «Фордзон», американскӧй тракторъяс разялам быд винт-частьӧдз, карасинӧн мыськалам... Туяна частьяссӧ бӧр тэчам, а ёна кӧ зыртчӧма ли жугалӧма — токарлы либӧ кузьнечлы нуам. Выльӧс тӧчитасны-дорасны.
Мастер пыр миян дорын.
— Ноко, нывкаяс, кодлы тайӧ тракторыс? Ломзьӧдӧй сьӧлӧмсӧ!
Полӧмӧн матыстчан, мотор нырас крукыля завод ручкасӧ сюян, нетшыштан ӧтчыд-мӧдысь — чужйӧ чукля кӧрт бедьнас.
— Оз ков мен тайӧ!
— Лёка зажиганиесӧ лӧсьӧдінныд! — ачыс лючки вӧчас да юалӧ: — Ӧні?
Заводитчӧ ӧд, кӧть тракторыс и «пӧрысь» нин.
Луннас майӧдз гаражын, практика, рытнас — школаын. Густя кань синма нин! Гаражас ӧд абу сьӧкыд удж, оз ков йи улысь керъяс перъявны.
Мастер бур трактористкаясӧдз быдтіс:
«А тайӧ кытчӧ? А тайӧс кыдзи?» — юасьӧ. Он куж — кӧть дасысь, вежон юасяс. Спуск — некодлы!
Экзаменъяс бӧрын, май шӧрнас, миянӧс колхозъясӧ, кодӧс кытчӧ, гӧрны мӧдӧдісны. Ме гортӧ, асланым колхозӧ веськалі. Муясыс абу на косьмӧмаӧсь, аминь сьӧкыд гӧрнысӧ. Куим плуг и кыскалӧ «Фордзоныс», но увтасінджык либӧ кыр воча — буксуйтӧ, «кынӧм» вылас пуксьӧ. Чер пыр сьӧрысь, кабинаын. Котӧртла раскӧ, керала некымын бадь, кыдз либӧ пипу, кыскала трактор дорӧдз, чинтала, масьта бӧръя кӧлесаяс улас, бӧрыньтчышта, мынтӧдча плугысь да сэсся и пета гиблӧй гусьыс. Плугсӧ, косінӧджык воа да, тросӧн кыска. Шедліс мученньӧыс, Ен сыкӧд. Куим тулыс-ар гӧри «Американеч» вылас. Арнас — кӧть сьыв, рудзӧг улӧ август помын гӧра, сэк муыс кос, оз буксуйт тракторыс.
Тӧвнас вартім. Комбайныс сэки быд колхозлӧн нин вӧлі, рыныш дорас, лэбулын сулаліс. Но ачыс оз варт, трактор колӧ.
МТС ӧти колхозӧ мӧдӧдлас вартны. Помассяс уджыс — мӧд сиктӧ ыстӧны. Казяла, тӧв кежлас трактор «мудзӧма» нин. Асывнас радиаторас пӧсь ва кисьта, мотор улас пестысьла, а мӧда заведитны — моторыс сӧмын несъялӧ да заводнӧй вугнас бӧрнид вурлӧ-кучкасьӧ.
Кыдзкӧ вартсис жӧ Сюзяыбын. Колӧ эськӧ МТС-ӧ лэччывны, но тшӧктӧмаӧсь нӧшта и Паслэччӧм грездса колхозлысь урожайсӧ вартны. Гортын, дерт, мудзӧм-кынмалӧм бӧрад паччӧрын майбыр узьыштны, но трактор, гортӧ лэччигӧн нин, куслі. Ӧдва и заведиті, да грездӧдз, гумла вылӧдзыс, вои рытгорувнас нин.
Мӧд лунӧ, югдігас на, председатель ӧдзӧсӧ нин таркӧдчӧ.
— Анна! Унтӧ веськӧд, вартысьяс мӧдӧдчӧны нин. Ладит трактортӧ комбайнас, да заводитӧй вартны.
Водза-водз ковмис гумла вылӧ мунны.
Ноксьӧмыс пӧшти лунтыр лоис — трактор эз и заведитчы. Вартысьясыс — пӧчьяс. Кольта мыччалысьясыс — посни зонкаяс, школаын велӧдчысьяс. Кольта кӧртӧдсӧ чарлаӧн вундалысьяс да комбайн «вомас» разӧдӧмӧн сюялысьясыс... нёльӧд-витӧд классын велӧдчӧны.
Председательным Паслэччӧмын... фронт вылын морӧсас мина торпыриг дзенгӧма. Перйӧмаӧсь. Ловъя воис...
— Василей Петрович! Звӧнитлы Шойнаты МТС-ас, мед ыстыласны мӧд трактор! Оз уджав да! — кора.
— Но, мунӧй, шойччӧй! — нывбабаяслы да челядьлы шуис колхозса пред. — Аски... татчӧ жӧ... кортӧг нин... И тэ, нылӧ, шойччышт, но эн сёрмы. Ылын-ӧ Шойнатыыд! Воасны... Мӧд трактор мед мӧдӧдасны, звӧнитла...
Мудзи да сёйтӧг и кайи паччӧрӧ, усыртчи... Шоныд! Паччӧрад пӧсь кирпичьясыс гӧн перинаысь на небыдджыкӧсь. Кыла: ӧдзӧс чужъялӧмӧн жугӧдӧны. Син восьті — муртса на лӧзъюгыд.
— Код крещеннӧй? — пачводздорсянь ывла ӧдзӧслань уськӧдчис мам. — Сӧмын на вӧдитчи, скӧтӧс верді-юкталі. Тӧлыс тай восьтӧ да ортсы ӧдзӧссӧ гурйывтӧ... Тасышті сӧмын.
Кыла: кильчӧ ӧдзӧс восьтіс.
— Пырӧй...
— Петкӧдла ме тіянлы крещеннӧй! — нӧшта и матькыштіс пырысьыс. — Кӧні саботажничаыс?
Кылі мисьтӧм сёрнисӧ, паччӧрӧ каян приступ вылӧ нин кокъясӧс лэдзи. Пырисны колхозса пред да шынеля-погона зэв скӧр дядьӧ. Милиционер! Чур-чермуні: «Мыйла? Мыйла?»
— А-а-а! Тайӧ тэ саботажничаыс?
— Вердышттӧг нылӧс удж вылӧ ог жӧ лэдз,.. — мам зёльӧдчыштіс лёдвидзанын, бекар-лӧшка сэтысь судзӧдіс. — Пуксьылӧй, тшайӧн юктала...
— Некор! Война! Фронтлы нянь колӧ, а колхозыд вартнысӧ на эз босьтчыв!
— Сёйтӧгыс нӧ кыдзи тшыг мортыс уджалас?
— Но! Мед тэрмасьӧ! Ме кильчӧ вылад куритчышта... Вердышт...
Кутшӧм сёйӧм... Киӧ нянь босьтлытӧг панясьышті, пасьтаси да гумла дорӧдз медводзын, быттьӧ конвой улын, усьла-чечча, котӧрӧн сорӧн моз муна. А юрын ӧти мӧвп: «Эськӧ мед заведитчас! Мед эськӧ заведитчас! Мынтӧдча эськӧ тайӧ тшӧгӧм польӧсьыс, заведитчас кӧ моторыс», — Енлы нин мӧвпӧн кевмыся.
Мотор увсӧ биӧн шонті, пӧсь ва радиаторас кисьті. Босьтчи мотор заведитан вугъяс. Джын кытшолӧн ӧтчыд, мӧдысь... дасысь нетшышті — мотор сӧмын «несйыштас», весиг тшынтор оз петав.
— А-а! Саботажнича! Мыйла кругӧвӧйӧн он гарт? — арыштчис погонъяса шынеляыд.
— Вынӧй оз тырмы...
— А ноко, нӧшта видлы! Лыя места вылад, он кӧ заведит! Аддзывлі тэ кодь саботажникъяссӧ! Эстӧн — фронт, а тэ?! — нагансӧ кыскис: — Лыйла!
Нӧшта кызьысь кымын нетшышті мотор заведитан вугсӧ. Трактор сӧмын несъялӧ. Лигышмуні. Кокын ни сойясын — некутшӧм вын. Уси.
Чургӧдӧм нагана киа дядьӧлӧн чужӧмыс кумач гӧрд лоис:
— Лыйла места вылад!
— Ог вермы... Вынӧй оз тырмы... А ноко, ачыд видлы...
Погона дядьӧыд тойыштіс менӧ, босьтчис кыкнан кинас мотор заведитан вугйӧ. Наганыс — киас...
Вердаса вына мортыд куимысь гӧгӧрпӧв бергӧдіс мотор заведитан вугсӧ. Трактор пытшкын гораа клопмуні, а сэсся кӧрт вугйыд вурыштіс бӧрньыд да дядьӧыд веськыдвыв воськов вит сайӧ тутіс, наганыс юр вывтіыс код тӧдӧ кытчӧ жуньгис...
«Ой-ой-ой! Доймис мортыс!» — повзьӧмӧн ли серам пырысь, пойгӧны нывбабаяс.
Ме вылӧ уськӧдчисны:
— И мыйла тэ, Аннуш, бур нылӧй, вайӧдін татчӧ тракторшойсӧ? Мыйла? Абу ли мый МТС-ад бурджыкыс?
— Сэнітӧ, дерт эм, но абу мӧдӧдӧмаӧсь да...
Сэк кості энкӧвӧдӧшник кок йылас нин сувтіс, кывліс нывбабаяслысь сійӧс жалитана пойгӧмсӧ, пыркӧдчыштіс гач-шынеляс кӧласьӧм няйтсьыс да коньӧр моз рама юаліс:
— Пистолетӧй? Кӧні менам пистолетӧй? Корсьӧй, бабаяс.
Нагансӧ, дерт, пон эз пышйӧд, регыд и аддзисны...
— Вот мый, нылӧ, лэччылам менам машинаӧн Сторожевскӧ...
— Арестуйтан? Мыйыськӧ?
— Мун, эн матькӧд! МТС-ӧ лэччылам... Талун жӧ мед бӧр тані вӧлін! Медбур тракторсӧ тшӧкта сетны!
Пуксьӧдіс машинаас орччӧн. Скӧрлуныс абу нин.
— Сьӧкыд трактор вылас? — бурысь нин туйын юасьӧ.
— Гӧригӧн — улисджык му вылын йӧрмывлам, а сідзсӧ, тракторыс кӧ му вылас оз вӧй, зэв позьӧ уджавны.
— Тшӧктысьясыс ме вылын унаӧн! Приказӧн на мӧдӧдӧны уджсӧ ӧддзӧдны, подневольнӧй. Планным пӧ орӧ...
— Эськӧ и лыйин? — туйын, палялі да, веськыда и юавсис.
— Э-эг! Ме шпанаясӧс, гусясьысьясӧс куталысь...
МТС-ын погона дядьӧыд эз нин наганась. Кык час мысти уджалан тракторӧн петі. Сёр рытын гортӧ вои... Вартім... План тыртім... А сэсся — Воркутаӧ муні.
— Кыдз нӧ нин сы ылнаас Висер вожсяньыс веськалін?
— Корасис асланым сиктса, гӧтыртӧм мужик. Воркутаас шахтаын уджаліс. Война помассян воас, тӧвнас, гортас вежон кежлӧ воліс. Ошйысис: деньгасӧ пӧ зэв уна мынтӧны. Менӧ тшӧтш кӧсйысис шахтаас инавны. Петі верӧс сайӧ, мунім Воркутаас да сэні дас во шахтаас уджалі.
— Из шом перйин?
— Эг... Му выв, веркӧс уджыс сэні зэв уна...
— Медальяссӧ мыйысь сетлісны?
— Ӧтиыс — война кадся уджысь, мӧдыс — шахтасянь, а нӧшта кыкыс — юбилейнӧйяс. Но, позьӧ шуны, морӧсӧ медальяссӧ эг ӧшӧдлы. Кор бӧръясӧ сетісны, сэки тай снимайтісны. Вӧр посёлокад медаляястӧ он аддзыв.
