СІМДОР ЧЕРИ

Сиа Рая чойлы

Фронт вылын усьӧм батьсянь райсобес сьӧмтор мынтыштіс. Мам ним-ов вылӧ. Но медым меным деньгасӧ сетасны, рытнас вель дыр «Дӧверенность» гижим.

— Коді нӧ тайӧс сетіс? — тетрадьысь косялӧм листвывса гижӧд лыддьӧм бӧрын юаліс сиктсӧветса секретарь.

— Некод эз сет...

— Хы! Коді гижис, юала?

— Ачым.

— Ачыд? И деньга кӧсъян тайӧ кабалаторнас босьтны?

— Сы могӧн и пыри. Печат колӧ гижӧд улас пуктыны...

— Ачыд, шуан, гижин? Но быд гижӧдтор улӧ ми печатьяс ог шняпйӧдлӧй!

— Мамкӧд гижим... Сійӧ висьтавліс, а ме гижи. Печат пӧ сельсӧветын пуктӧд. Сытӧг пӧ деньгатӧ оз сетны... Со и пыри тіянӧ.

— Ачыс нӧ мыйла оз волы?

— Кокыс висьӧ. Гортын беддьӧн муртса ветлӧдлыштӧ. Гижи ме, а кырымпасыс ӧд мамлӧн... Митерассяньыс нӧ Айкинаӧдзыс кыдзи волас висигас?

— Ме тэнӧ ог тӧд. Гашкӧ пӧръясян? Документыд ӧд абу?

— Абу.

— Ноко, петкӧдлы тетрадьястӧ? — недыр мӧвпалыштӧм бӧрын, ог тӧд мыйла, корис нывбабаыс тетрадьясӧс.

Перъялі, мыччи пызан вомӧныс.

— Ы-хы... «Ученик четвёртого класса Шежамской начальной школы...» Ачыд и гижӧмыд, эн пӧръяв, — но печатьсӧ эз пукты, а телефонӧ кутчысис, звӧнитіс кытчӧкӧ.

Повзьышті... Гашкӧ, шышӧн чайтӧ да милицияӧс корӧ. Сёрнитыштіс кодкӧдкӧ. Ним-овӧс висьталіс, кӧні велӧдча, Митерас грездӧс казьтыштіс.

— Но, но, — бӧр ӧшӧдіс телефон трубкасӧ да кыв шутӧг и пуктіс печатьсӧ, кырымпассӧ. — Айкинаас, райсобесас, сетан.

Райсобесын индісны, кутшӧм жырйӧ пырны. И колӧ жӧ, зэв на и тӧдса нывбабаыс. Грездӧ гожӧмнас и арнас чӧд да пув вотны куим-нёльысь кайліс. Локтігас и мунігас миянын шойччыштліс. Мамлӧн бур тӧдса. Аньыс, Иллария Никандровна, некор куш киӧн эз пыравлы: преник-кампет пызан вылӧ падъянсьыс перъялас, а миян — самӧвара пӧсь чай. Ме и нуӧдлывлі вотчынысӧ, кӧні чӧд-пувйыс медгырысь да медчӧскыд.

— Школа бӧрад ӧд, Паша, тшыгмин, юышт кампета-преника чай.

Ыдждӧдчыны эг кут, кык стӧкан пӧсь чайсӧ юи да аттьӧалі бур аньсӧ.

— Но, пуктіс секретарыс печатьсӧ? — нюм пыр юалӧ Иллария Никандровна. — Звӧнитліс татчӧ, висьталіс ним-овтӧ... Митерасса пӧ... Сійӧ тэнӧ оз тӧд, а ме тӧда и тшӧкті могмӧдны.

— Пуктіс... Со «Дӧверенностьыс» — перйи сумкаысь печатя бумагасӧ.

Гижӧдӧс кутшӧмкӧ кыз тетрадьӧ вурыштіс деньга сеталысь том аньыс, кырымӧдіс, а сэсся и сьӧм мыччис.

— Лавкаясӧд эн ветлӧдчы. Гортад пыр жӧ и котӧрт. Мед оз кыскыны деньгатӧ, — стрӧжитіс Иллария Никандровна.

— Нянь тупӧсь колӧ ньӧбны.

— Со тайӧ — нянь вылад, а папушсӧ пыдӧ дзеб. Эм пытшкӧс зептыд?

— Эм. Пальтоын и пинжакын.

— Пинжакса пытшкӧс зептад и сюям, — бур аньыс ачыс и дзумгис деньгаӧс зептӧ. — Но, татысь он уськӧд, — быттьӧ ичӧт кагалысь, кизяліс зеп юрйывсӧ, пинжакӧс, а сэсся и пальтоӧс. — Эн мыччась деньганад, воштысян!

— Ог воштысь, ог. Нянь вылӧ ӧд гортысь босьтлывла жӧ.

Аминьӧй! Йӧзыс лавка дорас! Ӧчередяс, гашкӧ, сё морт! И кильчӧ вылыс быттьӧ нопъя. Морт кызь сэні. Паськыд пельпомъяса дядьӧяс ӧчередьсӧ воча пыкӧны. Найӧ, дерт, медводз пырасны. Мый нӧ вына мужичӧйясыдлы нывбабаясыд да пӧчьясыд?

Ӧчередь бӧрас видзӧдлытӧг кильчӧ вылас жӧ кайи. Помас кӧ сувтны — дзикӧдз пемда да нӧшта шедӧ-ӧ, воас-ӧ сэтчӧдз няньыс? Ме бӧрӧ унаӧн на сувтісны.

Недыр мысти локтіс вузасьысьыс. Дядьӧяс вешйыштісны, лэдзӧны сійӧс ӧдзӧс дінас. Бӧрсяньыс и ме, пытш кодь ичӧт зонка, ӧдзӧсланьыс матысмышті. Но сэсся тай топӧдісны! Чужӧмӧс жмитісны водзын сулалысь дядьӧяслӧн мышланьыс, лолыштны сынӧдыс оз шед. Юр вежӧр гудыртчис.

«А-а-а!» — горӧді пӧдӧм гӧлӧсӧн, бӧрлань йӧткыся, мед дзикӧдз оз пычӧдны. Но — он на босьт!

— Мый морла тшемилӧас сюйсин! Лысьӧмтӧ варкӧдасны! Йӧз гыыслы кок уланыс мытшӧд — таляласны-масьтасны! — дядьӧыс менӧ вурӧ-вочӧ, но чатӧртчыштіс, бӧрньыдалыштіс.

Ывла выв сынӧдсӧ ӧтчыд-мӧдысь-коймӧдысь вом тырӧн апышті. Топӧдӧм тыясӧдз воыштіс — юр вежӧр ас паскалльӧ вылас воис. Но сэки кутіс гольскыны лавка ӧдзӧсса пуд джынъя томанӧ сюян ключ.

Бӧрсянь жмитысьяс ярмисны: быдӧнлы водзӧджык окота веськавны. Менӧ бара топӧдісны.

— А-а-а! Пӧда! — быттьӧ юрлӧс увсянь горза. — А-а-а!

— Ӧдзӧсыс эз на воссьы. Кытчӧ пыканныд? Зонкаӧс со варӧдінныд!

— Пиялін ли мый? — кодкӧ ылын, бӧрын, ӧчередьтӧг жӧ пырысь вашъялӧ.

— Зэв тай нин тшыгӧсь! Ичӧт зонка ме водзын сулалӧ. Варкӧданныд! — скӧрысь вочааліс мисьтӧм кывберитӧмсӧ дядьӧ, зумыд мыш-пельпомъяснас ӧлыштчис бӧрньыд да пальто гожгӧгӧрӧд кычипиӧс моз кыпӧдыштіс вывлань.

Пос джоджыс кок улысь воши, но эг усь: дядьыс ӧти кинас менӧ пукаланінӧд кутыштӧ, мед ог гывды увлань, а мӧд кинас азяма-пася-пуфайкаа мусюр кодь дядьӧясӧс пыкӧ, мед менӧ эз пычӧдны.

Гольсмуні кӧрт пробойысь перъян томаныс да воссис и ӧдзӧс. Йӧймӧм ыжъяс кодь йӧз гыыс, кокъяс джоджас оз инмавны, пыртӧдіс лавка пытшкас. Помас, но стойка дінас на веськалі. Топыда жӧ сулалам, но оз нин кильчӧ вылас моз жмитны. Йӧзыс жыр тырыс. Дерт, дядьӧясыс ӧчередьтӧг ньӧбасясны, но стойкадорсаыдлы тупӧсь вичмас жӧ быдса вӧв додьсьыс.

Регыд и няня вӧла-доддяыс воис. Ӧшинь розьтіыс мыччалісны тупӧсьяссӧ, ыткӧбӧн пырӧм дядьӧяс ньӧбасисны, а сэсся и ӧчередьыс вӧрзис.

Петі лавкасьыс тупӧсь няньӧн. Ывлаас югыд на. Сідзкӧ, тэрмасьӧмӧн кӧ, рӧмыднас, ёна пемдытӧдз на и воа гортӧ.

«Кос чери! Ньӧбӧй кос чери! Ок, чӧскыд юква пуанныд! — чуксалӧ ветлысь-мунысьясӧс тыртӧм ящик вылын пукалысь кутшӧмкӧ нывбаба.

Матыстчи. Аньыс вӧлӧм тӧдса: Керӧс сиктса Марья. Вуж-бӧжнас мамлы рӧд на лоӧ. Ачыс сідз висьтасьліс миянӧ волывлігъясӧ.

— Видза олан, Марья тьӧт! Чериӧн вузасян?

— Шыть! Шпана пи! Тьӧтӧн тай тэныд лои? — наян пон вылӧ моз горӧдіс, чери тыра сепыссӧ асланьыс кыскыштіс да пидзӧсъяс костас топӧдіс.

— Митерасӧ, миянӧ волывлінныд. Салдат Вань Любаыслӧн ме пи.

— А-а-а-а! Волывлі грездад, волывлі... Мамтӧ тӧда, а тэнӧ вот ог помнит... Ті кодьыс ӧд... код тӧдас? Но, но, ньӧбасьышт, — Марья бӧр ӧтдортыштіс сепыссӧ, восьтліс да перйис шӧр чунь кузьта, польдчӧм рушкуа, пражитӧмӧн косьтӧм банйӧм йӧрш. — Видлы пинь улад, аклялышт — кывтӧ ньылыштан.

Кос йӧршыс пинь улын сӧмын и куж-кажмуні, да эг и тӧдлы, кыдзи ньылыштчис. Нюжӧді киӧс мӧд ловла.

— А-а-а! Веляммин? Ньӧб! — бӧр асланьыс кыскыштіс сепыссӧ Марья тьӧт.

— Ачыд кыйсян? Вузӧс вылӧ весиг со сепыс тыр вайӧмыд?

— Кысь нин менам здоровьеӧн? Зэв ылӧ ветлі, Сімдорӧ... Белет доныс кӧть, мися, вузышта... Дзик ӧд деньгатӧмми...

— Дона-ӧ нӧ килограммыс?

— Тилоыс? Комын вит шайт... Абу дона, а вӧлӧгаыс чӧскыд, — ошкӧ черисӧ Марья, кӧть и сылӧн ошкытӧг кӧрсӧ кывлі. Чӧскыд, абу сісь пипу кодь сола трескаыд. — Ньӧбан? Тило весита?

— Та дон, — гусьӧн перйи пытшкӧс зептысь дас шайта.

— Но-о-о! Сэтшӧм этша ньӧбан? А эм ӧд деньгаыд, эм! Кывлі, кышӧдчин пытшкӧс зептад! Надзтысян?

— Тайӧ сӧмын и эм...

— Но, сідзкӧ тайӧ дон вылас и муртала. Меным ӧд Сімдорас эз жӧ жаляддза, дон мынтытӧг сетны... А туйыс! Туйыс! Уселон-шпанаяс дінті, тюрьма-лагеръяс пыр чериысла лои ветлӧдчыны... Ветлӧмыс юр пудъялӧм кодь! Туй вылас грабитӧмысь и лоӧ повны! Виӧмысь и... Дона? Треска, сола треска донтӧм, но сэтшӧм юкваыд вомад оз пыр...

— Дас шайт вылад весиг тув * чери оз сюр, — Марья тьӧт безменнас веситіс бумага тубрас чери да тшапкыліс на сэтчӧ кузь чуньяса кисӧ, кондіс сэтысь чугунын пумӧн йӧршловсӧ да бӧр шлапкис мешӧкас. — Со, дас шайт доныд, тув чери...

* Тув — 400 грамм (сьӧкталӧн важ роч арт).

— Да-а! Тув тэныд! Кондін мыйтӧм!

— Деньга доныд!

Дӧзмылі, кӧть бӧр кора сьӧмӧс, но видзӧда, кос йӧршыс вель ыджыд тубрас. Эг сэсся и мӧд вензьыны. Перйылі книга-тетрадьясӧс дӧра сумкаысь, черисӧ пыдӧсас пукті — сумка джын лоис, ӧдва и тӧрисны выліас книга-тетрадьясӧй.

Грездса челядь, мамъяслысь юасьтӧг, деньга ас коланінӧ эг таргайтлӧй, а со, тойліс кодкӧ.

«Дас шайт видзи!» — майшася вӧр туй кузя гортлань котӧртігмоз.

— Но, дыр талун? Пемыд со... Узьмӧдчин, чайті, Шожымас, — майшасьыштӧмӧн паныдаліс мам. — Деньгатӧ сетісны?

— Ы-ы, сетісны... Нянь кӧрыш со... Нӧшта кос чери. Керӧсса Марьяыдлысь косьтӧм йӧрш дас шайт дон ньӧби.

— Но-о, аски выль пӧлӧс вӧлӧга, сідзкӧ, пуам. Кос чериысь чӧскыд юква, — мамлы весиг нимкодь лои. — Умим картупеля сёянторсьыс. Вом кӧр кӧть вежыштам...

— Дона зэв... Килограммсьыс комын вит шайт корӧ. Тув сӧмын ньӧби, — эг нин кут норасьны, мый тувсьыс быдса ыджыд китыр вузасьысьыс кондіс.

Дона ли донтӧм, а Марья тьӧтлӧн чериыс вежон чӧж чӧсмӧдліс.

«Вот эськӧ аслыным кӧ Сімдорас ветлыны? — воис юрӧ мӧвп. — Куимӧн — Модя, Веня да ме. — Сэні, тӧдӧмысь, донтӧмджык. Унджык позяс ньӧбны.

Модялы, Венялы висьталі, мися Сімдорысь йӧзыс зэв чӧскыд чери ньӧбалӧны да Айкинаын дона-донысь вузалӧны. Килограммсьыс комын вит шайт корӧны, а сэні, гашкӧ, джын донсьыс позьӧ ньӧбны? Чуйда ёртъясӧс, но миян пиысь некод оз тӧд, кӧні сійӧ Сімдорыс.

— Ветлам кӧрт туй станцияас, Айкинаӧ, — бур мӧвп вӧзйис Модя.

Шуӧма — вӧчӧма. Мунім станцияас, Модя юаліс билет вузалысьыслысь, кодарын Сімдорыс. Ичӧтик жырйын пукалысь тьӧтыс петаліс миян дінӧ да залас ӧшӧдӧм ыджыд карта вылысь петкӧдліс Синдор станция.

— Миянлы оз Синдор, а Сімдор колӧ, — шыаси ме.

— Сійӧ и эм Сімдорыс, — эскӧдіс вокзалса билет вузавлысьыс. — Кодсюрӧ, тьӧтӧяс, сэтчӧ черила ветлывлӧны... Со, видзӧдӧй: Айкино, Шежам, Микунь, Чуб, Княжпогост,.. а сэсся некымын станция бӧрын и Синдор воас.

— А дыр сэтчӧдз поездыс мунӧ? — Модя юаліс.

— Рытнас тані пуксянныд, а асывнас,.. Ноко, стӧча тӧдмала, — пырис аньыс аслас жырйӧ, звӧнитліс Микуньӧ, а сэсся юӧртіс: — Ичӧт станция. Сэтчӧ сӧмын Котлас — Вӧркута поезд сувтлывлӧ, а воӧ Синдорас квайт час асылын... Талун рыт тані пуксянныд, а аски водза-водз сэні лоанныд... Мый могӧн нӧ мунанныд? Черила?

— О-ог. Сідз тай кӧсйим тӧдмавны, — вочавидзис Модя.

Коланасӧ лои тӧдмалӧма. Сёрнитчим ёртъяс субӧта рытӧ петны туйӧ. Абу зэв ылын и вӧлӧма да выльлунӧ эськӧ бӧр вермим воны гортӧ. Ӧти лунсьыд школаын оз видны... Позьӧ и помка кутшӧмӧскӧ корсьны. И дыр кад кежлӧ чӧскыд сёянаӧсь лоам. Модялы да Венялы, дерт, эг висьтав, мый Сімдорас туйыс тюрьма-лагеръяс пыр мунӧ. Марья тьӧтӧс тай некод абу сёйӧма. Повзьӧдчӧ на, буди, мед некод чериысла оз мун, а сылысь ньӧбаласны.

Воис и туйӧ петан лун. Школаысь тэрмасьӧмӧн гортӧ кайим. Колӧ ӧд и ноп дасьтыны да рытъя, Микуньӧдз кайысь, поезд кежлас переездӧ лэччыны. Пуксьысь кӧ эм, сувтлӧ Митерас горулӧ поездыс.

Но, ме дась лои туйӧ петны.

— Модя да Веня дінӧ петала, — висьтаси мамлы. — Дасьӧсь нин, чайта, но поездӧдзыс со час сайӧ на.

Пыри Модя ордӧ. Сійӧ паччӧр дорас пукалӧ. Абу, тыдалӧ, и чукӧртчӧма туйӧ петігкежлӧ.

— Тэ нӧ мый, Модьӧ? — юала. — Регыд ӧд поездыс петас Айкинасьыс... Абу на дась?

— Мам оз лэдз. Некутшӧм пӧ чери он вайӧй, а воштысянныд.

— Кӧсйысьлін ӧд! Аслыд, буди, дыш лоис?

— А гӧгӧрбок кӧ мӧвпыштны, абу и окота... Оз сюр миянлы некутшӧм чери... Тыртӧг бӧр ковмас локны... Ылалам-вошам кытчӧкӧ да черинас вузасьысь ордас ог и веськавлӧй...

Модякӧд тӧлкуйтны — весьшӧрӧ кад воштыны. Петі Веня ордӧ.

— Мам оз лэдз, — бӧрдӧмӧн моз артмис Венялӧн. — Юрнытӧ пӧ пудъяланныд куим йӧй... Нӧшта и деньгаӧн дай!

— Ог лэдз, ог! — шыасис Венялӧн мамыс. — Ылі туйӧ, тӧдтӧминӧ! Грабитасны! Шабаш, меным! Петала вот мамыд дінӧ! Нюдз ньӧр тіянлы.

«Сёрнитчим, а со, кыкнан ёртӧй вузалісны! — курыд мӧвпсьыс кымӧсӧй пӧсявліс. — Сідзкӧ нӧ, ветлытӧм лоӧ? Морыс мед тіянӧс лыяс! Ӧтнам ветла, некод менӧ оз сёй! — но веськыда висьтасьны тадзи оз позь. Опонь Лидь петалас миянӧ, висьталас, мый мунысьыс ӧтнам, да сэки и менӧ мам оз лэдз.

— А ме ӧд, Веньӧ, ог жӧ мун... Модя оз мун ни...

— Он мун? — кыпыда юаліс Веня.

— Ог... И Модялы висьталі... Веня, мися, мед оз жӧ лӧсьӧдчы, петала сы ордӧ.

— Дӧведясям, сідзкӧ?

— Талун ог... Юр мыйкӧ висьмис. Муна, водыштла...

«Этадзи дасьтысим! Тьпу!» — сьӧвзи кильчӧ вомӧныс посводз ӧдзӧссӧ пӧдлалӧм бӧрын да довги гортлань.

— Но, дасьӧсь ёртъясыд? — юаліс мам.

— Дасьӧсь, — видзӧдлі часі вылӧ. — Поездыс час мысти на сӧмын воас. Кынмам переездас. Дыр-ӧ миян километрсӧ котӧртыштны...

— Но, сёйышт, сідзкӧ, туй вылад. Тшыгман, а войнас коді тэнӧ вердас? — мам лӧсьӧдіс деньга. — Этайӧс билет вылад, а чери вылас пинжак зептад сюя да вурышта, мед он уськӧд.

Панясьышті, но кутшӧм вермас лоны сёйӧм: менӧ пӧръялісны, ме мамӧс ылӧдлі... Мӧдӧдчӧма да эг нин вермы лӧньны. И оз нин сэтшӧма чериыс ков, кыдзи кӧсйӧмыс чуксалӧ-кыскӧ...

Переездын поездсӧ здук и виччысьышті. Машинистыс, аддзис пуксьысьӧс да, пода морт ӧдӧдз ньӧжмӧдчис. Воссис ӧти вагонысь ӧдзӧсыс.

— Микуньӧ мунысь эм? — юаліс проводницаыс, аддзис менӧ да кыпӧдіс вагонас пыран сод весьтсьыс кӧрт вевтсӧ.

Ур моз кавшаси поскӧдыс да вагонса кӧзяйкаыслӧн киняулӧдыс и пыри тамбурас.

— Сэсся некод абу пуксьысьыс?

— Абу... Ӧтнам.

Проводницаыс ӧвтыштіс машинистыслы биа пӧнарнас.

«И-и-у-у-у! — дівӧстіс «Овечка» паровозыс да содтіс ӧдсӧ.

Билетсӧ сӧмын Микуньӧдз вузаліс вагонса кӧзяйкаыс.

— Синдорӧдзыс сэні, Микуняс, ньӧбан, — шуис.

Микуньӧдз Митерас грездса зонкаяслы, да тшӧтш и нывкаяслы, туйыс зэв тӧдса. Унаысь пызьла кайлывлім. Тӧдсаӧсь и билет вузалысьясыс. Унаысь аддзывлісны, кодсюрӧ и вотчыны на Митерасӧ волывлӧны гожӧм-арсӧ.

— Меным Сімдор станцияӧдз билет колӧ общӧй вагонын, — матыстчи билет вузалан касса ӧшинь дорас.

— Тӧдса, видзӧда, — билет мыччигмоз шуис ӧшинь саяс пукалысь нывбабаыс. — Мый могӧн нӧ сэтчӧ?

— Чери ньӧбыштны... Кӧні вот вузалӧны? Аддза-ӧ?

— Кык час мысти воас Котлас — Вӧркута поезд. Квайтӧд вагон. Пуксигад проводницаыслы висьтав, мед чеччӧдас Синдор станцияас. Чериысла Синдор тыбокса грездас ветлывлӧны, кывлі. Векни кӧрт туйвывса поезд пӧ сэтчӧ, дзик грезд дорӧдзыс, ветлӧ. Юасян — нуӧдасны и вайӧдасны, эн маитчы, — велӧдӧ бур аньыс. — Пуксьы йӧз чукӧрас да кывзы, кор дежурнӧйыс юӧртас Котласса поезд матыстчӧм йывсьыс, да квайтӧд номера вагон дінас и котӧрт.

Кык часыд виччысигад зэв вӧлӧм ньӧжйӧ кольӧ. Но сэсся коркӧ и воис жӧ колана поездыс. Котӧрті индӧм вагон дінӧ, петкӧдлі билет, юалі, кытчӧ позьӧ пуксьыны. Вагонса кӧзяйкаыс мам кодь авъя да мелі:

— Кытчӧ кӧсъян, сэтчӧ и пуксьы. Со кӧть этатчӧ, бабушъяс дорас.

— Меным Сімдор станцияӧдз. Мед бара оз жӧ узьсьы. Юӧртӧй, кор кутам сэтчӧ воны, — висьталі вагонса кӧзяйкаыслы.

— Шойччышт, верман на и водыштлыны. Чуксала, эн маитчы... Вит час нелямын вит минутын воам Синдорас.

Кутшӧм водыштлӧм да узьӧм! Вунӧдас кӧ проводницаыс чуксавнысӧ? Вӧркутаӧдзыс нуӧдасны, да сэні и збыль воша. Видзӧда ӧшиньӧд, лыддя воӧм станцияыслысь нимсӧ: абу на Сімдор — бӧр лӧня, водзӧ гурӧдам-тӧвзям.

Код тӧдас, дыр-ӧ мунім. Часі менам абу. Пӧчӧясыслӧн абу жӧ. Найӧ, тыдалӧ, ылӧ мунӧны, некутшӧм маитчӧм. Вугралӧны. Чеччи пуклӧс вылысь, ветлі проводница купе дорас. Ӧдзӧсыс восьса. Сійӧ, видзӧда, вугралӧ жӧ.

«Ачыс со узьӧ, чуксалас, небось!» — юалі: — Сімдор станцияас регыд воам?

— Кык час да джын мысти, — видзӧдліс часі вылас. — Узьышт, чуксала.

Кыдзи кӧть эг крепитчы, вугыртсьӧма чорыда.

— Зонка! Садьмы, регыд воам!

— Нӧшта вит минут узьышта, — нурбыльті. Чайті, мамӧ школаӧ чуксалӧ.

— Синдорӧ матыстчам, Синдорӧ! Синдор станция! — гораа юӧртіс вагонса кӧзяйка.

— Узьсис? — повзьӧмӧн чеччи пуклӧс вылысь. — Прӧйдитім нин?

— Локтысь станцияыс — Синдор. Дасьтысь. Ӧти минут сэні сулалам.

Минут кызь мысти воис меным колана сувтланін. Петі вагонысь. Станцияыс — ичӧтик пу стрӧйба. Ӧдзӧс весьтас дзик ӧти лампочка ломалӧ. Пыри станцияас. Касса ӧшиньыс восьса.

— Кыдзи меным Сімдор грездас воӧдчыны? — юалі билетсӧ вузавлысь аньыслысь.

— Этайӧ ӧдзӧстіыс петан да бияс вылас мун... Сюръяяс вылас тай лампочкаяс ӧшлӧма. Сэні вылыс склад, вӧр сэтчӧ ваялӧны. Час джын мысти грездланьыс поезд мунас, йӧзӧс нуӧдысь. Сэтчӧ и вӧзйысь.

— А билетсӧ кӧні вузалӧны?

— Рабочӧй поезд, лагерыслӧн... Некутшӧм билет оз ков.

— Босьтасны?

— Босьтасны, босьтасны! Котӧрт, мед он сёрмы!

— Э-т-т-ты кей поезд? — джынвыйӧ пемыд жыръяс, диванъяс вылас, кык дядьӧ вӧлӧм узьӧны. Эг казяв пыригӧн. Сёрнинымӧс кылӧма ӧтиыс, кыпӧдліс юрсӧ да мыйкӧ юаліс, но эг велав.

— Чево? — рочӧн юалі.

— Кей поезд, спрашиваю? — пидзӧсъяс да гырддзаяс вылас кыпӧдчыштіс. — К-кы-ды поезд?

— А-а-а! Котласский, на Воркуту...

— Н-но... Нам на юг, — бӧр пласьтнитчис диван вылас да дзик пыр унмовсис.

«Шпанаяс, тыдалӧ? — воис юрӧ повзьӧдлана мӧвп, усйыси станция жырсьыс да котӧрӧн мӧдӧдчи уна биясланьыс. — Этайӧяс шӧрӧ кӧ веськалан, грабитасны и пӧрччӧдасны!»

Недыр мысти петі векни ота кӧрт туй вылӧ да регыд и вои нёль-вит вагона поезд дінӧ. Ичӧт вагонъяс. Сэтшӧмсӧ эг на аддзыв. Матыстчи ичӧтик паровоз дінас пӧнарӧн сулалысь дядьӧ дорӧ.

— Меным эськӧ Сімдор грездӧ кыдзкӧ колӧ воӧдчыны? — шыаси.

— Миянкӧд и мунам! Ӧдйӧ гургӧдас поездыс. Регыд, здук мысти вӧрзям. Сулавлы тані, ме бӧръя вагон дінӧдзыс ветла. Видзӧдла, ставыс-ӧ лючки.

Дядьӧыс ветліс поезд помӧдзыс, бӧр локтіс, ӧвтыштіс юр весьтас кыпӧдӧм пӧнарнас поездланьыс да меным нин шуис:

— Пуксьы вагонас, мӧдӧдчим, — ачыс ме бӧрся пос кузяыс кайис да пӧдлаліс вагон ӧдзӧссӧ.

Паровозыс вӧсньыд гӧлӧсӧн, ливкнитӧмӧн тутӧстіс, вагонъясыс вӧрзисны да пыр ӧддзалісны и ӧддзалісны. Векньыд ота кӧрт туй вывтіыс вагонным ӧтарӧ-мӧдарӧ сӧмын и зімакылӧ-шатлалӧ.

— Татшӧм ыджыд ӧдӧн мунам да, ог пӧрӧй кытчӧкӧ? Со кыдзи вагоныс шатласьӧ? — полӧмӧн юала дядьӧыслысь.

— Эн пов, ог пӧрӧй! — серӧктіс дядьӧыс. — Со, видзӧд, войтырыс пукалӧны, веськодь налы.

— Могӧн Синдор грездас? — юалӧ дядьӧыс.

— Чериторла эськӧ, вузыштасны кӧ.

— Вузаласны. Коді волӧ чериысла, некор на некод тыртӧг бӧрсӧ эз бергӧдчыв... Грездас унджыкыс нывбабаяс кыйсьӧны. Аслыныс тырмӧ и вузӧс вылӧ вичмӧ.

Пукалам вагонса векньыдик лабич вылын бур дядьӧыскӧд орччӧн. Поездыс, кажитчӧ, пыр на содтӧ ӧдсӧ, сӧмын и пылльӧ-тӧвзьӧ. Вагонным шатласьӧ, быттьӧ гыа ва вылын дзибрӧс пыж.

— Пӧрам ӧд, пӧрам! — полӧмпырысь кутчыси ӧшиньдорса пызанас.

— Эн пов! — серӧктіс орччӧн пукалысь. — Быд лун ӧтарӧ-мӧдарӧ тадзи ветлам да эг на пӧрлӧй. Видзӧд со, кымынӧн вагонас мунам да некод оз пов. Медводдзаысь на, татшӧм поездас?

— Первойысь.

— Ылісянь воан?

— Айкинасянь...

— Вӧвлі сэні... А чериыдла Марпа Петровна ордӧ пырав. Нывбабаяс пӧвстас сійӧ медбур кыйсьысьыс. И черисӧ, шуӧны, зэв сямӧн косьтӧ. Чӧскыд. Медсясӧ сы ордысь и ньӧбасьӧны, кывлывлам татчӧ волысьяслысь. Зэв озыр Синдор тыыс черинас. Срок помассяс регыд да татчӧ и кольчча, ставыс кӧ лючки-бура артмас. Уджыс деньгаа, вӧр-ваас зьвер-пӧтка и чери, — воссис дядьӧыс да висьтасьӧ и висьтасьӧ. — Бӧрсӧ нӧ кор мӧдӧдчан?

— Талун жӧ эськӧ и колӧ туйӧ петны.

— Квайт час кежлӧ, сідзкӧ, лок поезд дорас.

Сёрниӧн кузь туйыс тӧдлытӧг коли. Гырысь кер чукӧръяс дорӧ сувтіс поездыс. Вагонъясысь петалісны йӧзыс да кутісны разӧдчыны коді кытчӧ, асланыс уджалан местаас. Дядьӧыскӧд тшӧтш, медым водзӧ туйсӧ сылысь юавны, петі и ме.

— Этайӧ туйӧдыс чой горувсӧ и лэччы. Марпа Петровнаыслӧн туй помас, дзик ты дінас керкаыс, шуйгавывланяс... Рытнас, мӧдӧдчысь кӧ, эн сёрмӧдчы поезд вылас.

Аттьӧалі бур дядьӧсӧ да мӧдӧдчи вӧла туйӧд чой горув. Ылын водзын, асъя югыдас, тыдовтчис помтӧм-дортӧм лымъя эрд.

«Тайӧ и эм, сідзкӧ, Сімдор тыыс, — вежӧрті. — И збыльысь саридз!» Водзас берег ни вӧртас оз тыдав. Грездланьыс тыыс векнялӧ. Ӧтар-мӧдар берегъяс вылас — парма вӧр. Водз на, да тэрмасьны некытчӧ. Вуджи грездсӧ, лэччылі ты дінас.

«А ёна жӧ нин мича места вичмӧма татчӧс войтырыслы! — вежаланаа мӧвпыштсис. — Миян Митерас грезд зэв жӧ мича местаын пукалӧ. Тулысын кильчӧ вылӧ петан да гӧгӧр тар кургӧм да чушкӧм кылӧ, но татшӧм тыыс абу».

Саридздорса мичлуннас нимкодясигкоста мыччысис да вылӧдзкодь нин кыпӧдчис шонді. Позьӧ, сідзкӧ, и могӧн индӧм керкаас пыравны: абу нин войын, йӧз узигас, ветлысь кодь. Тэрмасьтӧг кайи лажмыд кырйӧд, кежи восьса дзиръяа керкалань. Шӧр арлыда нывбаба кильчӧ бокас поткӧдліс пес.

— Ен отсӧгӧн, жар пес, Марпа Петровна! — пӧрысь йӧзӧн велӧдӧм ног чолӧмаси нывбабаыскӧд.

— Лок видза, лок! Ылысса ли матысса гӧсьт? — видзаасис кӧзяйка.

— А кыдз ӧд шуны? Тӧрыт рытнас гортын на вӧлі, а талун асывнас со тіянын нин... Эжва берегсянь... Айкатыласӧ, кыдз пӧчьяс шуӧны, кывлывлінныд?

— Кывлі и волывлі. Абу ылын, но абу и матын. Ичӧт на, а кузь кока нин, сідзкӧ. Вой костӧн кӧ татшӧм вӧлӧксӧ сяммин вуджны.

— Поездъясыс тай ӧдйӧ вайӧдӧны. Бур йӧзыс, кытчӧ колӧ, туйсӧ индӧны и...

— Но, туй морт, пырам, сідзкӧ, керкаӧ. Шойччыштны-шонтысьны и нуръясьыштны кузь вӧлӧк бӧрад колӧ, — кӧзяйкаыс лэдзис кисьыс черсӧ чуркаяс бокас да ас бӧрсяыс корис пырны керкаас.

Пелькиник, электролампаӧн югдӧдӧм жыр. Мӧд жырйыс — восьса ӧдзӧс саяс. Сэні пемыд.

— Югыд тіян, электричествонад. Ми карасина лампаӧн на олам, — вежалӧмӧн ошкыштӧмӧй лои.

— Югдӧдісны вӧр лэдзысьясыд, — кӧзяйкаыс юрсӧ сюйліс мӧд жыръяс, чукӧстіс: — Ма-шӧ-ӧ! Чеччы! Жӧникыд юр вылад...

«Хы-хы-хы-хы!» — серам петіс. Венялӧн мамыс тадзи жӧ Магдалина нывсӧ садьмӧдліс.

— Сӧмын на югдӧ да, — кыліс пытшкӧсса ӧдзӧс сайсяньыс. — Талун ӧд шойччан лун...

— Шойчча-а-ан... Пес колӧ поткӧдлыштны... Вадорӧ лэччывны... Гымгаяс вежон лэптывтӧмӧсь...

— Но, вит минут, мамӧ?..

— Гӧсьт воис... Чеччы... Жӧникыд... — нывбаба гылыда серӧктіс.

— А-а-а... Но, но... Чечча, чечча...

— Асъя унма! — вашъялӧ керкаса кӧзяйка. — Кӧть вой шӧрӧдз пукалас, а асывнас он садьмӧд.

Маша, Марпа Петровналӧн быдтасыс, ар дас вита нывка, быйкнитіс пыді жырсьыс.

— А-а-а! Чолӧм! Кутшӧм жӧ, мися, жӧник? — серӧктіс менӧ аддзӧм бӧрын. — Кыдз нӧ нимыд?

— Па-а-ша, — яндысьӧмӧн висьтаси, а юрӧ воис: «Но-о-о, татшӧм збойыд куляс и вочас, невеста туйӧ кӧ быттьӧ! Миян класса нывкаяс рамӧсь... А мича-а-а!»

Татшӧм шыасьӧмсьыс, да нӧшта и нывлӧн мичлунсьыс, кывворӧс вошті. Пызан сайын — аддзывлытӧм сёян: чӧскыд юква, пражитӧм чери, ёкыша-сира черинянь. Кывйӧй ньылыштчас. Но зэв родӧмӧн сёя... А Машаыс... Збой, дерт, но мича, кӧть синтӧ эн вештыв сы вылысь. Гӧтрасьны кӧ сы вылӧ — непӧштӧ банйыштӧм нин морӧссӧ видлӧмысь, видзӧдлӧмнас пӧтан.

— Тэ, Паша, сёй, сёй! Миян чериа вӧлӧгаыд уровъю! Тӧда, мыйла локтін... Могмӧдам... Сёй, а сэсся шойччыштан...

— Немысь мудзнысӧ... Пестӧ тай шуинныд... Ӧтвылысьнад ӧдйӧ меститам. Поткӧдчынытӧ ӧд сямма...

— Но, сідзкӧ, и сёй топыда! — лӧньӧдӧ яндысьӧмӧс кӧзяйка. — Коді пӧ кыдзи сёйӧ, сідзи и уджалӧ, шулӧмаӧсь.

— Миян сідзи жӧ шуӧны! — петіс серамӧй аньыслӧн кывберитӧм вылӧ да чериняньсӧ родтӧгджык нин куті чеплявны.

Пессӧ поткӧдлыны босьтчи да ӧтчыд дай мӧдысь колунӧн чуркаас эг веськав: са-ап! чурка боктіыс ӧдӧба лымъяс керыштсьӧ. Мича Машаыс, дерт, мыжа: видзӧдӧ да кутшӧм нӧ удж артмас!

— Ӧ-ӧ-хӧ-хӧ! Вай ме поткӧдча, Паша, а тэ чипасӧ тэч, — серӧктіс Маша.

— Эн-н-лы-ы... Видзӧдан да вомдзавлан, буди... Вешйыштлы...

Чурка-мӧдысь клинъяс артмалісны.

— Вай ме поткӧдча! — оз лэдзчысь нывкаыс. — Ошйысян... Абу поткӧдчывлӧмыд...

— Мун эськӧ керкаад! — янӧдіс да, синйӧ да — удж оз артмы.

— Но, но! Пырала, — пыльсъялӧ.

Ӧтнам вит минут кежлӧ и кольлі — поткӧдлӧм пескыс торкасьны нин кутіс. Вештавны нин колӧ. Черыс кивыв лӧсяліс и. Шоналі... Пинжакӧс пӧрччи... Кыдз да пожӧм чуркаясыс сӧмын и бринакылӧны.

— Артмӧ тай, вӧлӧм, — эз нин килькъяв Маша, кор петіс мамыскӧд пессӧ тэчны.

— Чер воропас ӧд велавны на колӧ, а нӧшта и кыйӧдчан...

— Но... Ог, ог сэсся... Поткӧдчы, а ми чипасӧ тэчны кутам.

Лун шӧр гӧгӧрын кильчӧ дорыс куш нин вӧлі. Пажнайтім. Пӧтӧс, чӧскыд сёян. Чериа вӧлӧга кындзи и яя шыд вӧлі, но киӧй чери латкаланьыс тшӧкыдджыка нюжӧдчӧ: яя сёян и гортын пулӧны, а чериыс сӧмын лавкаса, сола треска.

Пажын бӧрын Марпа Петровна лӧсьӧдіс вель тӧрмӧна воръя ичӧтик дадь, кильчӧ вылас петкӧдіс пыридз.

— Ветламӧй сэсся и кыясьны.

— Медыджыд чериыс, гымгаяссьыс кодӧс перъям — Пашалы уджсьыс козин, — вашъялӧ Маша. — Мед эськӧ сир!

— Оз ков... Видзӧдлыны окота, кыдз кыйсянныд...

Ки вомлӧс кызта йи йӧрданъяссӧ вевттьӧма. Пыридзалім, восьталім йӧрданъяс. Нёль гымга... Ӧтиӧс, мӧдӧс, коймӧдӧс кыпӧдлім. Ведра кык чунь кузьта йӧрш да весьт кузьта куим ёкыш пырӧмаӧсь.

— Оз талун кыйсьӧд, — нормыштіс Маша. — Пашалы эськӧ...

— Йӧршыс уна, а гырысь чериыс гежӧдджыка пыравлӧ, — меным моз висьталіс Марпа Петровна. — Тӧвнад найӧ гуынӧсь... Кодкӧ нин вӧтчылас посниясыслӧн кельӧб бӧрсяыс.

Нёльӧд гымгаыс кыйдӧса вӧлӧма. Шор вомӧ сійӧс вӧйтлӧмаӧсь. Йӧршыс — матӧ ведра жӧ, да нӧшта и сой кузя сир. Чигъя... Кило куима, буди...

Маша весиг йӧктыштіс:

— О-о-о, татшӧмыс важӧнкодь нин эз шедлы!

— Ваыс вежсьӧ, садьмӧ чериыс, — нюмдіс Марпа Петровна.

Гымгаяс бӧр вӧйталім. Катӧдім чери дадь. Куим час лун. Колӧ ньӧбасьны. Петі кильчӧ вылас. Резьӧді зептысь вылыс вурӧссӧ, перйи деньга. Поезд билет вылӧ кольышті, а папушасӧ гач зептӧ сюйи да бӧр пыри керкаас.

— Кос черитортӧ та дон вузалыштӧй. Со деньгаыс... Мыйта сетанныд сы доныс...

— Аминьӧй! Тані кык ведра дон! — кыпӧдіс синъяссӧ Марпа Петровна.

— Ы? — артмис менам. — Килограммсӧ ӧти тьӧтӧ миян комын вит шайтысь вузалӧ...

— А Ен тӧдтӧм ань тай! — шлапкис кинас пидзӧсас Марпа Петровна. — Дас шайтӧн килосӧ пыр на сеталі... И мукӧдыс сідз жӧ... Дивӧ тай!

— Керӧсса Марья, ылыс рӧд на, ёна и повзьӧдліс: ылын пӧ, поезд билет вылӧ колӧ мынтысьны, тюрьма-лагер пыр ветлыны...

— Мед нӧ... Бурӧсь миян тані йӧзыс... Немысь повнысӧ... Но, пукалӧны... Вӧр лэдзӧны, а эз на кывсьыв, мед кодӧскӧ грабитісны... Волас коркӧ! Вузала сылы нӧшта! Удта на и, мед грездсаяс бӧр тыртӧг мӧдӧдӧны! Куим дон кульӧ! Тьпу! Дас шайт! Мӧд дон миян грездын некодлӧн абу!

Кык ведра кос чериыс куль джын лои. И деньгаӧй на коли. Марпа Петровна коляссӧ бӧр мыччӧ. Эг босьт да бара на ведра джын содтіс, а сэсся и нёль весьта сирсӧ, выльӧн кыйӧмасӧ, рузумӧ гаровтіс да нопйӧ сюйӧ.

— Оз ков, оз! — пыкся.

— Отсасин! Колӧ! Ен отсӧгӧн, гымгаясыс и ӧні кыйӧны.

— Босьт, босьт! — сюйсис мам сёрниас и Маша нылыс. — Ме тай шулі: кыйдӧссьыс медыджыд ловсӧ тэныд!

Дон мынтытӧг яндзим та ыджда чери босьтны, но керкаса кӧзяйкаыс сюйис нин тубыртӧм сирсӧ нопйӧ, кӧрталіс сепысӧс вывсяньыс, а сэсся бара шлопнитіс кимӧдзнас пидзӧсас:

— Но и юр! Туйыд ӧд кузь. Аски рытланьыс сӧмын воан гортад! — ветліс инпӧлас да черинянь вайӧ. — Тайӧ туй вылад,.. — и юавтӧг нопйӧ жӧ сюйис.

Чукӧртчӧм-ноксьӧмнад кадыс ӧдйӧ кольӧ. Квайтӧд час нин...

— Мӧдысь бара на волы, бур зонка, — корӧ Марпа Петровна.

— Гожӧмнас волы, гожӧмнас! — шыасис и Маша. — Каникулъяс дырйиыд. Сэки пыжсянь кыйсьыштам...

— Окота эськӧ, но ог куж...

— Хы! Ме велӧда...

— Но, инӧ, слӧймӧдчыла... Мича тані вӧр-ваыс...

— Мича, — гогнитіс юрнас Маша. — Волы...

— Но...

Вӧр лэдзысьяслӧн поездӧдз Маша колльӧдіс.

— Ме тэныд гижа, Маша, позьӧ кӧ?

— Гиж...

— А овыд нӧ кыдзи?

— Максарова... Маша Максарова... Гиж... Гожӧмнас волы сэсся и чери кыйны...

— Но... Вола...

Бур дядьӧыс, кодкӧд водз асывнас вагонас орччӧн пукалім, аддзис менӧ да бара ас дінас чукӧстіс. Орччӧн, ӧти пуклӧс вылын и мӧдӧдчим.

— Но, сюри ньӧбасыд? — нюмпырысь юалӧ.

— Кыскымӧн... Марпа Петровна тэчӧ и тэчӧ...

— Бур нывбаба, — ыджыда ышловзис дядьыс, а сэсся, мед, буди, ог гӧгӧрво, мыйла ышловзис, юаліс: — А кыдзи нӧ нимыд, пиӧ?

— Паша.

— Менӧ Тимофейӧн шуӧны.

— Выльысь на волыны корисны гожӧмнас. Машаыс чери кыйны корис.

— И волы...

— Май помас ме этайӧ бушлатсӧ пӧрчча да ӧтлаын на, гашкӧ, и петалам кыйсьынысӧ? Ставыс кӧ, дерт, лад лоӧ?

Сімдор посёлокас Тимофей пыртӧдіс менӧ кутшӧмкӧ тьӧтӧ ордӧ.

— Узьтӧд тайӧ зонкасӧ, Нина Ивановна. Сылы Микуньӧдз.

— Мед узьӧ... Патератӧ мортыд сьӧрас оз новлӧдлы. Ӧтнам тай, тӧрам.

Аскинас Нина Ивановна, муртса на югдыштӧ, чуксаліс. Чайӧн юктӧдіс. Ме сылы кос черитор кольышті. Оз вӧлі босьт, но ӧд сетӧмасьыс оз бӧрыньтчывны...

— Но, сэсся мун... Котлас поездӧдзыс час джын коли. Котӧртан станцияӧдзыс, билеттӧ ньӧбан — воас поездыс.

Вокзалас морт эз вӧв. Весиг шензьышті:

«Татчӧс йӧзыс нӧ некытчӧ оз ветлывны ли мый?»

Ньӧби билет, здук виччысьышті, и Вӧркута — Котлас поезд воис. Вагонас йӧзыс этша. Ыджыд нопйӧн пыдіӧдзыс эг мун да купекодяс ӧтнам и лои. Ӧтар-мӧдар пуклӧсъясыс дзик прӧстӧсь.

«Но станцияяссӧ, кыті прӧйдитам, лун югыднас видзӧдала, нимъяссӧ лыддяла... Абу лёк и тӧдны, выльысь кӧ волӧм лоӧ», — ас кежын мӧвпала.

Недыр ӧтнам муні. Куим зон воисны. Меысь верстьӧджыкӧсь. Пыр и кылі-казялі: мисьтӧм сёрниаӧсь.

— О-о-о! Кореш кытчӧкӧ мӧдӧдчӧма? — былькнитліс наян синъяснас медічӧт тушааыс. — Вузасьны?

— О-ог,.. гортӧ...

— Мый нӧ нопъяд?

— Нем абу...

— Хы! Абу пӧ? Мешӧкыс тыр, а шуӧ: нем абу...

— Но, чери... Ньӧбасьны ветлі...

Сэк кості шӧркост тушааыс зепсьыс карті колода кыскис.

— Вешйӧй пызанланьыс, картіасямӧй.

Кӧсйи чеччыны ӧшинь дорсьыс, но ичӧт тушааыс оз лэдз.

— Ми сӧмын куимӧн, а ворсӧны нёльӧн...

— Ог сяммы...

— Велӧдам...

— Ог кӧсйы...

Пикӧ вои. Петны оз лэдзны. Картіӧн мырдӧн тшӧктӧны ворсны.

— Ворс. Уна деньга воан, — верзилӧ кодьыс сёрниӧ пырӧдчис.

— Менам грӧш абу.

— Водзӧсавла... Воан — мынтан...

«Вӧлись тай шпана гыжъяд веськалі!» — ёна повзи, кӧть лёкгоршӧн горзы, а лоӧ-ӧ кодкӧ отсалысьыс?

— Ті ворсӧй, ог кут торкасьны, но ме ог ворс, — пикӧ воӧма, пыкся.

Дыр-ӧ эськӧ тадзи ковмис вензьыны, кыдзи эськӧ сямми тайӧ шпанаяссьыс мынтӧдчыны, ог тӧд. Чери ноп бурӧн, дерт, эськӧ эг сет, а сьылітшуптӧ кӧ сетасны? Унмовся — чери нопйӧс сы мында и аддзыла... Но Енмыс, кыдз шуласны, вӧлӧма на...

— Билетъяс, билетъяс дасьтӧй! — вагонӧд тэрмасьӧмӧн вуджӧртіс проводницаыс, а здук мысти и ревизорыс, мусюр кодь дядьӧ, миян дінӧ воис.

— Билетъяснытӧ? — нюжӧдіс кисӧ.

Зонъяс ӧдйӧ дзебисны картісӧ, мыччисны билетъяснысӧ. Ревизор компостер-кльӧщинас тшолкӧдіс картонторъяссӧ, мелань нюжӧдіс кисӧ:

— Билет?

— Менам абу, — лӧсьӧдӧм усьӧм гӧлӧсӧн вочавидзи. Ӧд кымынысь Микуньӧ пызьла кайлім, тӧда: ревизоръяс оз шыльӧдны юрӧдыс «кӧчьястӧ». Нуӧдасны сьӧрсьыныс да мичаа и штрапуйтасны. А меным сійӧ мездлунӧн вӧлі... Коліс кыдзкӧ мынтӧдчыны шпана-зонъяссьыс...

— Абу кӧ — штрап!

— Хе! «Кӧ-ӧ-ӧч!» «Кӧ-ӧ-ӧч!» — вежыньтліс вомсӧ менӧ ӧшинь дорӧ йӧршитысь зонмыс.

— Мунам мекӧд, — юрнас довкнитӧмӧн мурӧстыштіс ревизор. — Кӧлуйыд эм? Босьт... Мӧдім... Проводник! Вагонад «кӧч». Мыйла лэдзин?

— Эз вӧв некутшӧм «кӧч».

— А этайӧ нӧ?

— Билета, буди, вӧлі?

— Эм билетыд? — юаліс ревизор.

— Абу...

— Билета вӧлі! — проводница вылас нин кыпӧдіс дӧзмӧм гӧлӧссӧ ревизор. — Восьтлы купетӧ, рӧзберитчам.

Пыртӧдісны проводница жырйӧ.

— Кытысянь, кытчӧдз туй кутан?

— Синдорсянь — Микуньӧдз...

— Билеттӧг? «Кӧчӧн?»

— Билетӧн...

— Ог аддзы!

Лукйысьышті пинжак пытшкӧс зептын, перйи билет. Ревизор кыпӧдліс картон рӧчсӧ ӧшинь югыдлань.

— Хы! Талунъя... Миян поездӧ... Синдор — Микунь...

— Ме тай шулі: некутшӧм «кӧч» вагонын абу! — югдіс проводницалӧн чужӧмыс.

— Мый нӧ менӧ бӧбйӧдлан? — дӧзмӧмӧн видзӧдліс ме вылӧ ревизор, но ассьыс уджсӧ тӧдӧ: клотшнитіс кльӧщи-компостернас, розьӧдіс билетӧс.

— Эсійӧ зонъясыс мырдӧн картіӧн ворсӧдӧны, а ме ог кӧсйы... Ог и тӧд весиг найӧс... Йӧртісны ӧшинь дорас, петны оз лэдзны.

— А-а-а! Со мыйын делӧыс! Мед, сідзкӧ, тэ дінын и мунӧ зонкаыс Микуньӧдзыс, — тайӧ проводницаыслы нин шуис. — А найӧс, — индіс кинас вагон мӧдар помланьыс, — Княжпогостын чеччӧд. Сэтчӧдз билетныс. Нем вӧчны ог вермы — билетаӧсь. Пукав тані Микуньӧдзыд...

Микуньын Айкинаӧ лэччысь лунъя поездсӧ на суи да Митерас переездӧдз лючки-бура вои, а сэтысянь гортӧдз — нимкодьӧйла коклябӧрӧй мышкӧ инмалӧ — котӧрӧн: эг воштысь и ноп тыр чери вая!

Маша Максаровалы дасысь унджык письмӧ гижлі. Радейта, мися, гожӧм пуксьӧмсӧ виччыны ог вермы... Но письмӧяссӧ сідзи эг и мӧдӧдлы. Куимӧс, весиг конвертасӧ нин, клеитӧмасӧ — сӧмын пошта кудйӧ сюйны — косявлі.

Яндзим лои... Мый, мися, нылыс ме йылысь шуас эськӧ, йӧйталана письмӧӧс лыддьӧм бӧрын. Мӧдысь Сімдорӧ чериысла ветлӧмыс сэсся эз жӧ ло дай. А гашкӧ, и колӧ вӧлі ветлыны? Код тӧдас.