ПОН ВАРЫШ

Айкатылаын Яр Вань Ёгор овліс. Вӧралысь. Митерас грездті аръясын тшӧкыда пищальӧн вӧлі прӧйдитлас.

Веняяслӧн Альчикыс колльӧдыштӧмӧн увтӧдыштӧ бокӧвӧй морттӧ.

Ӧтчыд, видзӧда, водз асылын Ёгор Венялысь Альчиксӧ дэльӧдӧмӧн миян йӧр помӧдз нуӧдіс, а сэсся и камӧбтіс-лыйис сылы. Альчик лявзӧмӧн гортас пышйис. Бур, мый абу лючки веськалӧма ылісяньыд, да регыд и бӧр бурдіс миян вӧралан понным. Но ме ёна скӧрми, Венялы и Модялы висьталі. Колӧ, мися, быть водзӧс косӧдны, но кӧть нин кыдзкӧ...

Ӧтчыд паныдасим школаӧ лэччигӧн Яр Вань Ёгоркӧд, да ме и шыӧдчи сы дінӧ:

— Ёгорӧ?

— Мы-ый? — юаліс, оз ӧд тӧд, мыйла сы дінӧ шыаси, зэв бурысь кӧсйӧ тӧдмавны, мый сылысь юала.

— Пон лыйысь тэ, вот коді! — шуи. — Пон варыш на нӧшта! Лёклуныд кӧ кучик пиад оз тӧр, мыйла грезд пыр ветлан, а он вӧр пырыс мун!

— Пон варыш! Пон варыш! — кутісны и нывкаяс горзыны.

Сійӧ кадсяньыс Ёгор сэсся и збыльысь дугдіс миян синъяс водзӧ петкӧдчывлыны.