ПЕРНАА ЫЖ

Сандрик Кӧстелӧн зэв пустуйтчысь ыж вӧлі. Лёкиника вердӧны, кӧнкӧ, сы понда сёркни-галанка да капуста градъяс йӧрысь оз и петав. Став грездсӧ дӧзмӧдіс. Паличӧн гусясьысьсӧ йӧръясысь зонпосни вӧтлам. Кӧстелы быд лун норасям, да сійӧ тшӧтш дӧзмис асланыс пемӧс вылас.

— Дугӧда, уйлаӧс, гусясьӧмсьыд — кӧсйысис Кӧсте.

И вӧчӧма верстьӧ зонмыд ыжыслы перна. Куим бедьтор школьнӧй треугольник моз помъясӧдыс тувъялӧма да ыжыслы сьыліас ӧшӧдӧма. Юрӧдыс оз тӧр, он на пӧрччы.

— Ӧні потшӧс косттіыс оз тӧр, — ошйысьӧ Кӧсте.

Но пемӧсыд нӧ мыйӧн гӧгӧрвоас, мый пернанас оз вермы йӧрас пырнысӧ? Кӧсйӧма пырны, чӧскыд сёяннас нуръясьыштны, да потшӧс костас и сибдӧма. Ӧдва и мездім, кулан выйын нин вӧлі.

— А мед нин и вердчӧ, кыдзи сяммӧ, — шуим ас кежысь да сэсся пернасӧ пӧрччим. Дугдім паличӧн вӧтлысьны и. Мед нин вердчӧ, кыдзи велалӧма...