ВЕЛӦДІС

— Вурдысьяс пикӧ воштісны! — ӧтчыд норасис миянлы Модя.

— Аддзӧмыд майшасянтор! — чуйдіс Веня. — Вӧтлы дай!

— Вӧ-ӧтлы найӧс кыдзкӧ? — нюркнитіс Модя. — Вурдысьясыс ӧд абу ыжъяс, вӧтлан найӧс?

— Ме сета тэныд сьӧдбӧж капкан. Кый вурдысьсӧ. Ловйӧн сюрӧ да кӧртав бӧжас кудель ёкмыль, карасинав, ӧзты да и лэдз вурдысьсӧ амбар улад. Ӧдйӧ став вурдысьыс пышъясны!

Модя сідзи и вӧчис. Мӧд лун асывнас и сюрӧма налькйӧ вурдысьыс. Чукӧстіс менӧ и Веняӧс... Вурдысьясӧс Модяясысь кутам вӧтлыны.

Ёна полӧмӧн — горзӧ ӧд, курччасьӧ и — вӧчим ставсӧ, кыдзи Веня велӧдіс. Ӧзтім вурдысьыслы бӧжас кӧрталӧм кудельсӧ и лэдзим, ас мӧвпӧн, ветлан розяс, но сійӧ эз миянлы коланаинас пыр, а орччӧн додь джынъя кымын зорӧд вӧлі, да сэтчӧ и униртіс.

И мый сэні заводитчис! Ӧзйис ӧд туруныс!.. Бур, мый ведраяс да зыр синъяс улӧ веськалісны. Ӧдва и кусӧдім ӧзйылӧмсӧ.

— Велӧдін! — скӧраліс Веня вылӧ Модя. — Вежӧрыд курӧглы кокыштмӧн жӧ вӧлӧма!

Мый татчӧ и шуан? Куим юрӧн ӧд уджалім. А вурдысьыслы колӧ жӧ вӧлі турун зорӧд улас пырны! Му розяс кӧ пырис, кусӧдчыны эськӧ эз ков, и збыль, гашкӧ, став вурдысь котырсӧ повзьӧдіс?..