БОМБА

Ичӧт арлыднад уна жӧ позьтӧмторсӧ челядь котыр, зонпосниыс, вӧчлім. Ӧтчыд меным кино лента сюрис. Вель кузь. А сэки сійӧ зэв сотчысь вӧлі. Ӧзтан кӧ — ыргӧ сӧмын, нинӧмӧн он кусӧд.

— А вай ми, Пашӧ, тэкӧд бомба вӧчам! — шуӧ Веня. — Бутылкаӧ сюялам, ӧзтам да пробкаалам... Ок, и йиркнитас!

— Асьным кӧ взрывитчам? — падъяла.

— Шыбитам ӧд! — шуӧ Веня. — Мед камӧбтӧ!

Няйт бутылка сюри да сэтчӧ и сюялім лентасӧ. Вӧчим газетысь зэлыд пробка. Веня бутылкасӧ киас кутӧ, а ме истӧг тув ӧзта да дозмукас шыбита. Ӧтчыд, мӧдысь. Бутылкаыс еджыд тшынӧн тыри, а кинолента оз ӧзйы. Истӧг кӧрӧб джын, гашкӧ, видзи. Шыбита ӧзъяна истӧг тув — Веня ӧдйӧ пробкаалӧ бутылкасӧ, шыбитӧ, а бомбаным оз взрывитчы.

Бара ӧзтысям...

Дыр тадзи ноксим. Дышӧдіс нин.

— Полан да сійӧн оз артмы! — скӧралӧ Веня. — Истӧг тув ыпнитігас и лэдз сійӧс бутылкаас, мед плёнкаыс ӧзъяс, — бара босьтіс шыбитлӧм бутылкасӧ Веня да кӧсйӧ нетшыштны пробкасӧ, а сэк тай кыдз йиркнитіс!

Видзӧда, Венялӧн чужӧмыс негрлӧн кодь сьӧд, киыс сьӧд и. Чуньяс костӧдыс вир войталӧ.

Ёна и повзим. Котӧртім юкмӧс дінӧ. Мыссис Веня. Чужӧмыс бӧр еджыд лоис. Киыс кыклаті стеклӧ торпыригнас вундыссьӧма.

Гортсаяслы, дерт, та йылысь немтор эг висьталӧй. Сюрліс эськӧ кыкнаннымлы бомбаасьӧмсьыным.