ВӦР ЛЭДЗЫСЬ ПОН

Григорий Микушев лесопунктын начальникаліс. Пӧрӧдчысь-увйысьысьясысь, дерт, унджык босьтіс. А видзӧдлас ош лапа кодь ки пыдӧс вылас — он на озырмы та мында сьӧмнад. Унджык эськӧ колӧ.

Дыр мӧвпаліс Григорей да коркӧ и пӧшти кык пӧв унджык удж донсӧ кутіс кульны. Крукыль-мукыль ручкаӧн вӧчыштас ведомостьын кыкысь — зептас, видзӧдӧ, кызджык нин деньга турышыс. Шутьлялӧ, дӧвӧльпырысь пӧлучка рытас гортас мунӧ.

Матӧ во джын тадзи жыкруйтіс. И колӧ жӧ: ревизияӧн локтісны. Деньга сеталан ведомостьясӧ синъяснысӧ сатшкисны. А сэні вӧр лэдзан участокса став рабочӧйыслӧн, кыдзи и колӧ, — ов, ним, вич, мыйӧн уджалӧ, удждоныс тӧлысьнас ыджыд-ӧ — ставсӧ урчитӧма.

Шемӧсмӧдіс йӧз чукӧрысь финансъяс кузя сыщикъясӧс ӧти ним-ов: «Микушев Мора Григорьевич», «Дружба» пилаӧн пилитчӧ-пӧрӧдчӧ».

— Тешкодь и ним сетлӧмаӧсь мам-батьныс дядьӧыслы! — вашмуніс ӧти нывбаба-ревизорыс. — Кыдзи чайтан, Мария Васильевна? — юалӧ бухгалтерлысь.

— Миян посёлокын татшӧм нима мортыс абу. Ог тай тӧд-а. Кодкӧ, буди, локтӧм морт. Начальник ӧд удж нарядъяссӧ сетӧ. Сылысь колӧ юавны.

— Кӧнкӧ ӧд Мораыслӧн «Уджалан книжка» либӧ шыӧдчӧм эм жӧ? — эз лэдзчысь ревизор.

Корсисны, но некутшӧм гижӧд эз аддзыны. Юалісны Микушевлысь. Дыр кытшлаліс, но воштысьнысӧ некытчӧ, висьтасис:

— Мораыс — менам пон... А сылы ӧд сёйнысӧ колӧ жӧ... Микушев Григорийыс ме, а понйӧй — Мора. Микушев Мора Григорьевич, тыр нимӧн кӧ...