УНМОВСЬТӦМ ӦШИНЬЯС

Володя Канев асывводзсянь ноксис аслас машина дінын совхозлӧн отделениеса гаражын, весиг пажнайтнысӧ эз ветлы гортас. Уджаліс тэрмасьӧмӧн, но быд пӧрйӧ выльысь видлаліс крепитӧм детальяссӧ: оз-ӧ вӧрны? Тыдалӧ, кӧсйис, медым эськӧ машинаыс эз узьтӧд кӧнкӧ кузь вӧлӧк вылын, а лючки журъяліс быдсяма туйяс вывті. Но эз вӧв долыд шофёрлӧн сьӧлӧм вылас. Сійӧ тшӧкыда ышловзьыліс, дугдывліс уджысь. Синъясыс сэки аддзытӧма видзӧдісны ылӧ-ылӧ, мӧвпӧн. Бура дыр тадз думыштчылӧм бӧрын Володя зіля босьтчыліс гольскыны гайкаяс гартан ключӧн.

Эз вӧв окота сёрнитны и Сергей Васькӧд, коді сэн жӧ орччӧн мавтіс ассьыс машинасӧ.

Мӧдыс эськӧ унаысь пуктыліс кутшӧмкӧ мог, мед пырны сёрниӧ, но Володя воча кыв пыдди сӧмын мыйкӧ нурбыльтас либӧ ӧвтыштас кинас.

«Да-а-а, — ыджыда ышловзис Володя, — эг чайтлы, мый татшӧм крута ставыс бергӧдчас...»

...Каневлӧн суседкаыс, Якӧ Марья, корис вайны заптылӧм пес. Эз вермы шофёр ӧткажитны ӧтка пӧрысь нывбабалы, муніс удж бӧрас контораас, кӧсйис висьтасьны управляющӧйлы, но некодӧс эз су и мӧдӧдчис юасьтӧг: «Пенсионеркаыдлы отсыштӧмсьыд оз мӧдны видчыны, — такӧдіс асьсӧ. — Уна вылӧ кык час ветла...» Но артмис эз мӧвпыштӧм ногыс — локтігас машинаыс зурасис тыдавтӧм мырйӧ да жугалі. Ковмис сиктӧдз тракторла котӧртлыны.

Мӧд луннас чукӧртчыліс рабочком. Ёна видісны шофёрӧс асныралӧмысь, а ёнджыкасӧ, дерт, машина жугӧдӧмысь.

— Дзоньталан машинатӧ да сдайтны ковмас. Вуджӧда слесарӧ, — помаліс ассьыс сёрнисӧ фермаса управляющӧй Вячеслав Петрович Огнев. — Ог эскы ме тэныд.

Сыкӧд сӧгласӧ воисны отделениеса механик Педьӧ Егор да рабочкомса членъяс. Шуисны вештывны Володяӧс куим тӧлысь кежлӧ слесарӧ.

— Сідзи и лоас, — управляющӧй чеччис пызан сайысь, матыстчис Володя дінӧ да пуктіс кисӧ сылы пельпом вылас.

— Мед лоас сідз! Сӧмын машинатӧ, Канев ёрт, ас тшӧт вылад ковмас дзоньтавны... Ас тшӧт вылад... Кылан? Шыблӧс деньга миян абу. А сэсся ставыс ас саяд: старайтчы, судзӧд дӧверие и бӧр пуксьӧдам машина вылӧ...

Некымын лун да вой мӧвпаліс лоӧмтор йывсьыс Володя, лыддис асьсӧ мыжаӧн, но управляющӧйлӧн кывъясыс парскисны сьӧлӧмас.

«Ӧні, синъяс улас кӧ веськалі, быд воськов кутас кыйӧдны. Дӧвери-и-йӧ, тьпу! А кыдз на сійӧс судзӧдан? Абу ӧд сійӧ шапка», — мӧвпнас вензис управляющӧйкӧд зон.

Веськыда кӧ шуны, зон эз на аддзыв олӧмсӧ. Школа бӧрас велӧдчис шофёрӧ да со, тӧлысь и уджыштіс. «Дӧ-ве-ри-йӧ!.. Судзӧда, быть судзӧда, но ог сылысь, мукӧдлысь, коді мортӧс гӧгӧрвоны кужӧ, — Володя ки мышнас личкыштіс морӧс зеп весьтсӧ. — Сьӧрын... Гортӧ мунігӧн сета».

Дум вылас уси, кыдзи тӧрыт вой шӧрӧдз гижис шыӧдчӧмсӧ: то чернилаыс перӧ помсьыс войтыштас, то гижигас бумагаыс розяссьӧ, то шыпас кытчӧкӧ кольӧма, то гижӧдыс вывті скӧрӧн либӧ норӧн кажитчас да курыда нюммуніс: «Кора мездыны удж вылысь, аслам кӧсйӧм серти... Хм, лӧсьыда артмӧ. Аслам кӧсйӧм серти!.. Э-эк, сідзи кӧ эськӧ вӧлі збыль вылас!» — топавліс Володялӧн сьӧлӧмыс.

— Мыйкӧ тай дзикӧдз нормин? — юаліс кияссӧ чышкалігмоз Сергей Вась.

— А мыйысь мем радлынысӧ? Лӧсьӧда вот машинаӧс, мед выль кӧзяиныс эз кут лёкӧн казьтывны, и кыськӧ мӧд удж корсьла.

— Збыльысь шуан?! — быттьӧ радлыштӧмӧн моз артмис Васьлӧн юалӧмыс. — Сідзкӧ, ме ӧтнамӧн кольла? Ок, сэки синтӧм гутъяссьыд спас оз ло: ӧти пес вайны чукӧстас, мӧд — турун, коймӧдлы — кирпич, лыа либӧ сёй ковмас... Он жӧ ӧд вӧрзьы некытчӧ шоныд позйысь?

— Кодлы шоныд, а кодлы и.., — Володя пуктіс машиналӧн мотор вылӧ ключсӧ. — Эг ӧти лун да вой мӧвпав. Мӧдлаын, чайта, лёкджыкыс оз ло. Муна.

— Тэныд повны нинӧмысь: правоыд — сьӧрад, вылысь улӧджык он усь. Мун и эм, машинаыд важиндзи жӧ: ӧтилаті дзоньталан — мӧдлаті жугалӧ, коймӧдлаті — чегӧ. Ме кӧ тэ местаын, тайӧ тачка вылас ӧти лун эг уджав. Сэсся тэнад — челядь ни семья. А кодарлань нӧ эськӧ думсьыд сетчан?

— Машина кӧ оз сюр — стрӧитчанінӧ...

— О-о, деньгатӧ, вокӧ, содз тырнад кутан кульны!

— Ог кузь рубъяс бӧрся вӧтлысь! — дӧзмыштіс Володя. — Уджалӧмыс эз артмы тані...

— Гӧгӧрвоа... Огнев синъяс улӧ кӧ веськалін — бурӧн он мын. Но эн маитчы. Юрыд кӧ, шуӧны, эм — сийӧсыд пыр сюрас... А овнытӧ, вокӧ, веськыда шуа, абу на велалӧмыд: быд няргӧм оз ков пыдди пуктыны... Уна-ӧ Марьяыд сетіс? Вит шайт! А воштін?.. Вот и артышт, бур туйӧд верст сайӧ гуркнитлӧмысь — вит шайт, и кызь вит верст кадйӧсь вӧр туйті шердйысьӧмысь — вит шайт жӧ...

— Тэ ногӧн, пӧчыслысь кучиксӧ колі кульны? Ог на тшыгъяв, мед быд жель бергӧдӧмысь сьӧм пычкыны. Эг босьт деньгасӧ.

— Йӧй! Мирыдлысь, шуӧны, сунисӧн, а тэд дӧрӧм тыр.

— Эг на велавлы сэтшӧм пӧслӧвичаяс кузяыс овнысӧ, том на буди? — Володя мудера читкыртліс синъяссӧ.

— Вот, вот, велӧдчыны колӧ том мортлы. Пӧслӧвичаястӧ, вокӧ, юра йӧз думыштлӧмны... Мед лоӧ миян костын, — Вась лӧньӧдыштіс гӧлӧссӧ, — мирыдлы честяд некор он во, а сибдас кӧ кытчӧкӧ бӧжыд, кӧть виньгырт — оз отсавны, а тэ вылын жӧ вашъявны мӧдасны.

Сергей Васьӧс фермаын лыддьылісны бур уджалысьӧн: мортыс оз ышмы винаӧн, позьтӧмторйысь киӧдыс эз кутлыны, кужӧ йӧзкӧд, начальствокӧд сёрнитны, а мыйкӧ кӧ оз кажитчы — щӧтитчӧ чин вылӧ видзӧдтӧг, и пырджык сы ног лоӧ. «Принципиальнӧй», — шуасны. Почётнӧй грамотаяснас кӧть стенъяссӧ кышас. Деньгаыдлысь серсӧ тӧдӧ — сідз-тадз оз шыблась. Кодсюрӧ, дерт, дивитӧны: горшджык пӧ. Жмитун кодь. Но унджыкыс шуисны эськӧ: «Топыда олысь морт, быдтор артыштысь».

Володя ӧтдортчыштіс Васькаысь, но эз кулитлыв сійӧс йӧз водзын ни ӧтарӧ, ни мӧдарӧ: «Кыдзи кужӧ, сідз мед и олӧ» — шулывліс аслыс, но ӧні биӧн моз сотыштісны Васьлӧн кывъясыс.

— А ме мӧдарӧ думайта. Не бур йӧзыс кӧ, тшыг пӧраӧ, гашкӧ, Кӧдзаягӧ нуисны. Мыджлісны сьӧкыд кадӧ и, мыйӧн верма, водзӧс мынта. Дон босьттӧг, кылан, дон босьттӧг!

— Но, но, но, но!.. — повзьӧмӧн мӧдіс бӧрыньтчыны Сергей Вась. — Тэнад делӧ сійӧ, тэнад делӧ... Кыдз кужан, — джын гӧлӧсӧн броткигтырйи варгыльтіс аслас машина дінас.

Недыр мысти гаражӧ пырис управляющӧй.

Володя тэрмасьӧмӧн чышкаліс сьӧдасьӧм кияссӧ, перйис шыӧдчӧмсӧ да чургӧдіс управляющӧйлы.

— Пышъян? Мыжмин и пышъян? — здук кежлӧ бумага вылӧ синъяссӧ чӧвтлӧм бӧрын коса юаліс Огнев. — Колӧма жӧ эськӧ кульыштны нёль лунъя простойсьыс да! — сэсся ӧвтыштіс кинас, сюйис нёль пельӧ куснялӧм тетрадь листсӧ морӧс зептас да, няйтӧссьӧминъясӧ гӧгӧртышталігтырйи, матыстчис Вась дінӧ.

— Кыдз делӧясыд, Василей Сергеевич, мырсян?

— Старайтча, Вячеслав Петрович. Тормознӧй колодкаяс вежлалі, мавтчи. Во джын видзӧдлытӧг позьӧ журъявны.

— Тэ молодеч, тшӧктӧм-индӧм он виччысь, ставсӧ ачыд аддзан, артыштан, — Огнев видзӧдліс часі вылас. — Вит час нин со...

— Пӧра, тай, гортӧ, — окотапырысь варовитіс Васька. — Эг и тӧдлы, кыдзи луныс коли.

— Уджалігад кольӧ кадыд... Мог суис, Василей Сергеевич... Аски лӧсьӧдчы водзджык, соляркала журкнитлан Центральнӧй усадьбаӧдз.

«Куим час бӧрӧ-водзӧ, а удждон — лунтыръя. Выходнӧй кузя, гашкӧ, и унджык на гижасны, — ас кежас артыштіс шофёр, но эз тэрмась воча кыв сетны: Вась войдӧр думыштас гӧгӧрбок да вӧлись кывтӧ шуас, а шуас кӧ — вундас: — Делӧыс ме сайын, машина — ӧти. Ог кӧ мун — водзӧ вылӧ лыддьысьныджык мӧдасны».

— Аски? Вы-ход-нӧ-яс?! — быттьӧ садьмис Васька.

— Комсомолечьяс кык тракторӧн куйӧд мӧдасны разӧдны, а горючӧй абу.

— Колӧ... Ой, ой! Коскӧ кыдзи лыйыштіс. Лунтыр лыйлӧ. Висьӧм, тыдалӧ, кӧсйӧ топӧдны. Ог вермы, Вячеслав Петрович, висьӧдча.

— Мудеритан жӧ эськӧ да? — падъялӧмӧн моз юаліс управляющӧй.

— Кӧть аски жӧ справка... сёмокасьтӧ, но оз уджав больничаыс... Кӧть уджалысь мортыдлы кув. Понедельникӧ инӧ, ог кӧ быттьӧ бурд, — гыжйыштіс балябӧжсӧ Васька.

— Оз справка ков, а горючӧй.

— Механиктӧ ыстыв, а мукӧдлы машина ог дӧверит.

— Командировкаӧ удитіс мунны, — шогӧ уси управляющӧй.

— Висигтыр ме некытчӧ ог вӧрзьы.

— Мудеритан, Василей, мудеритан, — Огнев первойысь шыасис Васька дінӧ сійӧс вичавтӧг. — Синъяс сертиыд аддза... Надейтчи ме тэ вылӧ, йӧзлы пример вылӧ сувтӧдлі, а тэ ӧтчыд пикӧ воӧмысь он кӧсйы мездыны.

— Он жӧ бара тіянлы честяд волы! Быд пон кок чеганінӧ ме кола!

Володя эз аддзыв управляющӧйлысь чужӧмсӧ, но кыліс, кыдзи сійӧ мазутӧсь гуранъяса джоджӧд веськыда шлапиктіс ӧдзӧслань, кокъясас быттьӧ пуд джынъя гираяс ӧшалісны...

Коркӧ вой шӧр гӧгӧр нин Володя пӧдлаліс мотор вывсьыс капотсӧ, пуксис кабинаас да личкыштіс стартёр вылӧ. Мотор раз-мӧд несйыштіс, гуркмуні да шумтӧг мӧдіс уджавны.

— Но, ставыс лючки, — чышкыштіс соснас пӧсялӧм чужӧмсӧ зон.

«Код тӧдас, кутшӧм киӧ на веськалан? — Володя ёртыскӧд моз сёрнитліс машинаыскӧд. — Ме эськӧ тэнӧ дыр на уджӧді... Но ерӧмаканьӧ, ог-ӧ нин вежӧгты? — ӧдйӧ петіс кабинасьыс, крапнитіс ӧдзӧссӧ. — Но, другӧ, ӧні сэсся пыр кежлӧ нин янсӧдчам. Кор сэсся удайтчылас пуксьывны руль сайӧ, небыд пуклӧс вылӧ?»

Медым дзикӧдз эз нормы сьӧлӧмыс, котӧрӧн петіс гаражысь.

Лӧня узис сикт. Контора дінті мунігӧн Володя аддзис управляющӧйлӧн жырсьыс биа ӧшиньсӧ.

«Пыр на пукалӧ? Кор и узьнысӧ удитлӧ? — но лӧглуныс пыр жӧ пӧдтіс тайӧ жалитана мӧвпъяссӧ. — Мед пукыштас, гашкӧ, нарадъяс гижӧ, вӧв-додьясӧн кӧсйӧ вайӧдны соляркасӧ». Володя весиг чиктыліс тайӧ мӧвпсьыс.

Сикт шӧрӧ воигӧн сылы воча мигнитісны Огневлӧн керкаысь унмовсьтӧм на ӧшиньясыс. Ӧти пыр ывла пемыдас видзӧдіс стеклӧ бердӧ ляскысьӧм ичӧтик чужӧм.

«Ичӧтик пиыс оз на узь. Виччысьӧ, кӧнкӧ, батьсӧ, — Володялысь сьӧлӧмсӧ ӧттшӧтш песовтлісны и мелілун, и жалитӧм. Радейтіс сійӧ ичӧт челядьӧс. А Огневыс эськӧ мыйӧн мыжа, шофёр кӧ ыръянитӧ? Ми ас вӧсна сӧмын думайтам и то пӧраясӧн сьӧкыд овлывлӧ, а сы вылын быдса отделение кутчысьӧ, — визьнитіс Володялӧн юрын мӧвп. — Отсалісны сьӧкыд кадӧ... Мыйӧн верма, век водзӧс мынта... Дон босьттӧг, — воис вежӧрас Васьлы шулӧм кывъяс. — Ошйысьӧм лоис сӧмын, а збыль вылас... Батьӧ кулӧм бӧрын, позьӧ шуны, мирнас отсалісны, совхоз велӧдіс, мортӧн вӧчис, а ме?.. Кутшӧм векньыда, вӧлӧм, вежӧртсьӧ олӧмсӧ... Йӧз пикӧ воӧмаӧсь, корсьӧны петан туй, а ме кӧсъя уськӧдчыны небыд вольпась вылӧ, сайӧдчыны шоныд эшкынӧн. Артмӧ, Вась моз жӧ радла лёктор вылас», — Володялы шуштӧм лои тайӧ мӧвпъяссьыс, весиг йирмӧг босьтліс, зывӧкӧн ачыс аслыс кутліс кажитчыны.

Володя крута бергӧдчис да ыджыд воськовъясӧн мӧдіс шавксьӧдны контораланьыс.

Управляющӧй пукаліс аслас пызан сайын юрсӧ ки пыдӧсъяснас топӧдӧмӧн да чорыда думайтіс. Ӧдзӧс шы кылӧм бӧрын дрӧгнитіс да лэптіс гӧрдӧдыштӧм синъяссӧ.

— Ме вая соляркатӧ, Вячеслав Петрович, — негораа, но кывмӧн шуис зон.

Огнев чеччыліс улӧс вывсьыс, бӧр пуксис да перйис пызан йӧрсьыс путевӧй лист. Сэсся, быттьӧ, кватитчис да юаліс:

— А машинаыд нӧ?.. Босьтлан Кызродевлысь?

— Ог. Асӧн. Дась сійӧ... Бӧчкаясӧн вая...

Управляющӧйлӧн гижигас сырмыштіс киыс.

Путёвка сеттӧдз Огнев видзӧдліс зонлӧн чужӧм вылӧ. Володя сулаліс зумыша, но синъясас тӧдчис — кӧсйӧ мыйкӧ юавны. Огнев мыччис Володялы путёвкасӧ. Кызӧктіс, перйис пызан йӧрсьыс том шофёрлысь шыӧдчӧмсӧ.

— Этійӧ бумагаяснад... Эн дур, зонмӧ. Ышӧ-пашӧнад олӧмад лад оз босьт. Ставсӧ колӧ артыштны. Нэмнад, пиӧ, уна шыбӧльӧ верман веськавлыны. Овлӧ сэтшӧмыс, но колӧ сяммыны и петны сэтысь...

Володя босьтіс шыӧдчӧмсӧ, сюйис зептас.

Унмовсьӧм сикт кузя мунісны кык морт. Ӧтиыс, бӧръяыс — кузьджык тушаа, кокньыд вӧраса, мӧдыс, воддзаыс — латшкӧсджык. Сійӧ восьлаліс сьӧкыдпырысь нин, чотыштіс. Но кыкнанныслӧн тӧдчис збодерлун, быттьӧ эштӧдӧмаӧсь кутшӧмкӧ помасьлытӧм удж. Ылынкодь, водзын налы югнитісны унмовсьтӧм ӧшиньяс. Тӧвся ывла вылыс быттьӧ таысь шоналыштіс, кӧдзыд сынӧдыс небзьыштіс.