ПОС

Тулыссяньыс на лӧсьӧдалі кыснанъяс, кузь шатин. Гожся каникулъяс дырйи, мися, Генякӧд войколӧн ветлам кыснасьыштны сир-ёкышӧн озыр Шожымка ю дорӧ. Геня — менам сусед. Тшӧтшъяӧсь пӧшти. Ӧтлаын вӧравлім, ёртасьлім и. Мортыс эськӧ асланьысджык синӧ, но тайӧ оз на висьтав сы йылысь, мый сыкӧд оз позь другасьны, ветлыны вӧравны.

Пуксис нин гожӧм, а кыснасьны сідзи эг и слӧймӧй ветлыны. Ставыс кӧсйысьӧмӧн и коли. Доза дыр ковмис ноксьыны асланым град йӧрын. Сэсся потш-майӧгъяс кералі да дзоньталі потшӧсъяс. Наян кӧзаясысь, писькӧс ыжъясысь кӧдзаяс да пуктасъяс видзысь бур пастукӧс — джуджыд потшӧс сувтӧді. Сэсся колхозын силос вылӧ петісны. Ми, зонпосни, гу дорас уль веж турунсӧ телегаяс вылын вӧвъясӧн кыскалім.

Ӧтчыд, удж помалӧм бӧрын, ме дінӧ матыстчис колхозса бригадир.

— Лун-мӧд мысти Шожымкаӧ ытшкыны мӧдӧдчам, — шуис бригадир. — Ті эськӧ Геня другыдкӧд аски кайлінныд сэтчӧ, вӧчыштінныд ю вомӧныс пос, медым мӧдар бечевникъяссӧ ытшкыны позис вуджавны. Кыкнас кӧ сьӧкыд, босьтлӧй со ещӧ Егор Коляӧс. Куим друг, чайта, регыдӧн и эштӧданныд. Кыйсьыштанныд и... Сёрнитчим?

Рад лои меным. Колялы и. Висьталім Генялы.

— Позьӧ и ветлыны, — веськодя шыасис Геня да эз зэв бурысь видзӧдлы Коля вылӧ: «А тэ пӧ мыйла тшӧтш кӧвъясин, егерь пи?»

Туйӧ петны шуим сійӧ жӧ рытнас. Миян лэдзасиг, вӧвъясӧс йӧрталігкості Коля лӧсьӧдыштіс ноптор, кыснанъяс. Сэсся миян грездӧ локтім. Туйыс Шожымкаас миян грезд пыр и мунӧ. Ми регыд жӧ нопторъяс чукӧртім. Ме босьті пӧрт, пань, кружка. Истӧг кудйӧ — совтор. Эг вунӧд и кыснанъяс да кузь шатин. Коля шатинсӧ босьтіс жӧ. Ылын пӧ эськӧ кыскынысӧ, но важ кос шатиннад вуграсьны-кыснасьнытӧ кокни, ворсӧм кодь.

Петі керкаысь, чукӧсті Геняӧс. Коля вирич дорӧ лажыньтчӧмӧн и виччысис. Чукӧстлі эськӧ нуръясьыштны, но эз и пырав. Ме пӧ пӧт, гортын сёйышті.

— Мый нӧ, ва дорсьыс ньӧрйыс оз сюр? — сералӧ ми вылын Геня. — Дас верст сайӧ, вӧрӧ, нуанныд зіб. Ой, ой! — серам петкӧдлысьяс. Но, чери кыйысьяс дай сӧмын. Паськыд дора идзас шляпа оз тырмы вот, кутшӧмӧс картина вылысь аддзывлан.

— А тэ вӧралысь кодь дзик. Нопъя, пищаля. Уръясӧс кыйны быттьӧ мӧдӧдчӧмыд. Оз ӧд позь гожӧмын вӧрӧд тадзсӧ ветлыны, — збоя вочавидзис Генялы Коля.

— Э-э, понтӧг да пищальтӧг кӧч люкалас, ош парсалас. Тайӧ — оборона вылӧ, а крукыля бӧжаыс — тӧварыш пыдди лоӧ, — эз сетчы, кыв вылас сулаліс Геня. — Сьӧд вӧр шӧрӧ мӧдӧдчам. А пышъялысь шыш кӧ вӧр керкаад воас? Тшуп, егерь пи, нырад — быд пищаля морт абу на вӧр-ва куштысь. А миян сійӧ абу гӧль...

— Вензянныд нем абусьыс! Мӧдімӧй, — сюйси сёрниӧ ме. — Ас кокнас понйыс ветлӧдлас. Сыкӧд, и збыль, гажаджык. А пышъялысьясыд, стӧча шуан, ружьеа йӧз дінад оз лысьтны матыстчыны.

Кӧть кадыс вӧлі рыт горув нин — шонді сулаліс вылын на. Сылӧн югӧръясыс сотісны пельпомъяс, мыш, сьыліӧс. Номъяс вӧтчисны кымӧр мында. Горшӧсь. Сатшйӧдлісны ем кодь лэчыд ныръяснысӧ чужӧмӧ, зыньгисны пельяс водзын. Налӧн курччалӧмысь пыктісны весиг синдоръяс, вевттьытӧм сьылі. Веськыд мат дай сӧмын. Коля, видзӧда, матайтчӧма жӧ. А Геня бара вӧлӧма сюсьджык. Босьтӧма еджыд чышъян. Мыйӧн кежим векньыдик ордым вылӧ, чышъянасис пӧчӧ моз. Ном-гебйыс сы дорӧ эз кутны сибавны да ми вылӧ содтӧд на кымӧр кодь кельӧб уськӧдчис.

Абу зэв ошйысянатор мунны гожӧмын вӧрса туй вывті да ещӧ нопйӧн. Гортад, пельпомъяс сайӧ волысалігӧн, сійӧ кажитчӧ кокниӧн, а час кымын мунӧм бӧрын мешайтчӧ нин, кӧть шыбит.

Жарысла, кажитчӧ, жуялӧмаӧсь весиг козъяс. Найӧ чургӧдӧмаӧсь туйлань лапъяснысӧ, быттьӧ корӧны юктӧдны, норасьӧны кос поводдя вылас.

Туй вомӧн, бӧжсӧ вылӧ чургӧдӧмӧн, котӧртіс гӧрд ур. Сійӧ аддзис миянӧс, сувтыштліс, ас ногыс чиргыштіс-видчыштіс повзьӧдӧмысь да чеччыштіс медматысса пу вылӧ. Биа ньӧв моз визьнитіс пу йылӧдзыс. Ланьтӧдчис, дзебсис. Но сюсь вӧралан понйысь он мын. Генялӧн Шарикыс, кӧть эз аддзыв урсӧ, кок туй дук кузяыс пыр и воис кыськӧ.

Пармасӧ шызьӧдіс сылӧн ёсь гӧлӧсыс. Чеччалӧ пу улын, чегъялӧ пиньяснас медся уліса кос увъяссӧ. Тадзи вӧчӧны вывті горш да велӧдтӧм понъяс.

— Шойччыштам инӧ, — сувтовкерис Геня да пӧрччис нопсӧ.

Ми чӧвтім жӧ нопъяснымӧс, лажыньтчим небыд ош нитш вылӧ. Сійӧ кӧдзыдкодь, ыркӧдӧ. Разялім дӧрӧм кизьясӧс, чегъялыштім кыдз росъяс, повзьӧдлам-швачкӧдам номъясӧс. А Шарик — виньдалӧ-увтӧ.

— Вывті жӧ нин ёна, Шаричокӧй, яйыс тэд колӧ. Увт, увт. Час, видзӧдлам, кытчӧ дзебсис урыс, — пон дінас шыасис сылӧн кӧзяиныс.

Геня перйис козъянсьыс черсӧ, матыстчис коз пу дінӧ, лӧсыштіс кырсьсӧ да мый вынсьыс клён-клён кучкис чер тышнас лӧсасас.

Ур ӧдӧбӧн чеччыштіс орччӧн сулалысь ыджыд кыдз вылӧ, котӧртіс увъяс кузяыс пу мӧдарас да сувтіс. Водзӧ палӧднысӧ вӧлі некытчӧ. Пуясыс сулалісны ылын.

Шариклы быттьӧ тальччисны бӧж вылас. «И-и-и!» — ливкйӧдлыштӧ. Кисьтны-увтны кутіс.

Геня матыстчис ноп дорас, пуктіс черсӧ муӧ да перйис зепсьыс патрон.

— Лыя инӧ, лыя, Шаричокӧ, медым арӧдзыс вир дуксӧ он вунӧд, — босьтіс киас пищальсӧ.

Вывті жаль меным лоис ки пыдӧс вылын моз, восьсаинын пукалысь ичӧтик гӧрд ур. И дорйысьнысӧ сылы некыдз, и дзебсьынысӧ некытчӧ. Чеччыштас — оз во орчча пу вылӧдз. Усьӧ муӧ, веськалас горш понлы вомас. Пукавны кутас тадзи — косьыштасны дрӧбйӧн. Мездыны колӧ урсӧ Шарик вомысь. Та вылӧ торйӧн нин ыджыд кӧсйӧм вӧлі сы вӧсна, мый эг радейт, мустӧмті тайӧ понсӧ. Сійӧ весиг челядь вылӧ скӧраліс. Орчча керкаӧй, а прӧйдитігъясӧ, куйлӧ кӧ мудӧд вылас, быть чеччылас да увтӧдыштас. Быттьӧ видзӧ ыджыд озырлун.

«Оз, оз позь, медым дорйысьны вермытӧм ур веськаліс горш Шариклы пиньяс улас. А Генялӧн пищальыс — со киас нин, он и тӧдлы, косьӧбтас». Тувки гырддза помӧн Колялы. Сійӧ скӧрмис жӧ.

— Висьтала паплы, — мырддяс ружьетӧ, — стрӧжитіс Коля.

— Мый нин, лӧдз курччис, — серӧктыштіс Геня. — Пос вӧчысьяс, чери кыйысьяс. Дурыштнытӧ нин оз позь, пыр и — висьтала, висьтала. Ог лый, ог. Арнас, гашкӧ, Шариклы жӧ сюрӧ...

Та бӧрын дырсӧ эз нин пукавсьы. Нопъясим да вӧла ордым кузя мӧдӧдчим водзӧ. Но горш Шарик эз кӧсйы эновтны вом чӧскӧдсӧ. Кольччис увтны. Гӧлӧсыс ӧдва нин кутіс кывны, но пон увтіс яра, воддза мозыс тшӧкыда.

— Шарик аддзӧмтортӧ оз эновт, — ошйысьыштӧмӧн ли, жальпырысь ли, мый эз удайтчы гӧститӧдны понсӧ, нюркнитіс Геня.

— Ӧткодьӧсь понъя-кӧзяина, — воча кыв пыдди серӧкті ме. Коля пыльснитіс жӧ. Тыдалӧ сы вылӧ, кыдзи здук сайын ӧзйыліс ур вылӧ Генялӧн синмыс да мый ӧдъяӧ бӧр кусі лёк кӧсйӧмыс.

Водзӧ туйсӧ талялім сёрниттӧг. Геня, дерт, гӧгӧрвотӧг эз ов, мый сылы паныд ми сувтім кыкӧн. А ми сійӧс дивитім ичӧтик вӧрса зверь вылӧ ковтӧг кисӧ лэптыны кӧсйылӧмысь. Ыджыдтор тай — аддзыны да лыйны гожся уртӧ. Яйсӧ горш понлы вомас, а кучиксӧ — коз пу лап вылӧ. Мед видлӧ, кыйсьӧ сёр арын. Сэки, кор урыс кӧмасяс, оз на быд понлы и сюр.

Шожымка ю дорӧ воим вылын кодь шондіӧн на. Вӧралан керкаӧ колялім нопъяс, черъяс. Босьтім сӧмын кыснанъяс.

— Талун ог нин пӧрӧдчӧй, — медводдзаӧн бурпырысь шыасис Геня. — Рытъя кыа вылас кыснасьыштам. Мыйкӧ кӧ шедӧ, пуам юква и — шойччыны.

— Кыснасьыштам и эм, — сӧглас сеті ме. — Телепит нин. Потш кодь сизим-кӧкъямыс путӧ аски здукӧн пӧрӧдам да ю вомӧныс нюжӧдам. Тэрмасьтӧг кык-куим час удж.

Коля сӧгласитчис жӧ. Геня корсис да кераліс кузь кодь пипу шатин, волис кырсьсӧ. Видлі. Нюдз, но ме серти куим пӧв сьӧкыд.

— Лун-мӧд косьмас — лоӧ добра, — шуи, — а ӧні, дерт, сьӧкыдджык.

— Олас, — ӧвтыштіс кинас Геня.

Юын ыркыд ваас дыркодь купайтчим. Сэсся ме вуджӧді кӧлуйӧс да шатинӧс мӧдар берегас, кӧмаси-пасьтаси да сэтчӧ и кольччи, а Геня да Коля кутісны кыснасьны ӧти берегсянь. Дерт, ыджыдкодь костӧн ӧта-мӧдсяньным сувталім. Кыснасям, каям ньӧжйӧник визув паныдсӧ. Недыр мысти ме лэпті тув кыка сирӧс. Сэсся курччис мӧд, ичӧтджык. Шонді лэччигас нин мойвиис коймӧд кыйдӧс — ки пыдӧс пасьта ёкыш.

Коля лэптіс жӧ ӧти ёкыш да сирпи. А Генялӧн дженьыдджык да сьӧкыд шатиннас оз артмы кыйсьӧмыс. Ветлӧдлӧ-кышакылӧ джуджыд пырей пӧвстті дзик ва дортіыс да повзьӧдлӧ-вӧтлӧ черияссӧ. Найӧ бӧрвыв, Колялань чепӧсйӧны либӧ менам береглань ызмунасны. Мӧд чериыс, сирыс, тыдалӧ, Геняӧн повзьӧдӧмаыс и кӧласис вугырӧ. Бузмуні сы кокъяс дорысь да пӧшти пыр и тракнитчис кыснанӧй.

— А-а, чӧр-ту-у! Номъяс вильӧдӧны и! — дӧзмис Геня да гартіс зібъяс кыснан кӧвсӧ. — Тіян, тыдалӧ, кыснанъясыд бурджыкӧсь. Курччӧ. Кыйсьыштӧй, а ме муна да пуся. Вӧр керкаысь горсӧ ломтыла, мед узьны лоӧ шоныдджык. Мый пуам? Шӧна? — синъяссӧ читкыртліс Геня.

— Мыйла шӧна? Юква, чӧскыдӧс. На, кутав, — ӧти бӧрся мӧдӧс шыблалі ю вомӧн чериясӧс. Тыдалӧ, ыджыдджык вынӧн. Сир-ёкышъяс шнёпкысисны ылӧ берег вылас, джуджыд турун пӧвстӧ. Генялы дыркодь ковмис корсьны-чукӧртны найӧс. Сетіс ассьыс черияссӧ и Коля.

Колим кыкӧн. Ми дыркодь на кыснасим, но сэсся эз шед ни ӧти лов. А бӧръя помас весиг крукассис кыснанӧй. Дыр сюрӧдчи — весьшӧрӧ. Аски вылӧ надеяӧн сідзи и коли кыйсян снасьтӧс берег вылас. Он ӧд орӧд, аски сунсьыла да сюрӧда. Сэсся корси ляпкыдін, вуджи юсӧ. Колякӧд локтім вӧр керкаӧ. Думысь пӧсь чӧскыд юква дорӧ.

Но Геня понсӧ сывъялӧмӧн шкоргис-узис джоджӧ вольсалӧм турун вылын. Локтӧма ӧд понйыс. Оз тай эновт кӧзяинсӧ!

Юква пӧрт удитӧма нин кӧдзавны. Гурсниті паньӧн. Юръяс да бӧжъяс мыччысьлісны. Ещӧ гурсниті — пӧртйын чери абу, пачдорса джаджйын тасьтіас абу жӧ.

— А пӧттӧм горш жӧ эськӧ вӧлӧма, — норасьышті Колялы. — Вит лов пулӧма да ставсӧ вильӧдӧма! Понсӧ на, гашкӧ, чӧсмӧдіс.

Вӧчны немтор. Гурскыштім-панялыштім кӧдзыд юквасӧ — сьӧлӧм эз бурмыв. Сідзи тшыгйӧн сорӧн и водім.

Асывнас садьми водз. Кисьті кольӧм юквасӧ чуманӧ понлы, биаси да куті пуны проса рок. Ывла би вылад пуӧм проса рокыд, мӧс выйыштан да, ёна на и чӧскыда панявсьӧ.

Садьмисны и мукӧд узьысьяс.

— Тӧрыт дыр эн воӧй да унмовссьӧма, — бурӧн пырӧдчӧ сёрниӧ Геня. — Эг и кывлы, кор локтінныд.

— Чӧскыд сёян бӧрад, пӧт кынӧмнад узьсьӧ, — чиктыліс Коля.

— Пӧсь юкваыд чӧскыд и эм, — ошкыштіс Геня. — Сӧмын тай дыр эн воӧй да дырджык, тыдалӧ, би вылас пӧртйыс видзис. Нырсис, рабаліс став чериыс, юкваас гудрассис... А талун бара юква? — Лэптыштліс пӧртлысь вевтсӧ: — Но-о, проса рок. Сёйсис тай, сідзкӧ, чӧскыд юкваыд... Рок!..

Рок эськӧ, но Геня эз жӧ этшаджыкысь паньышт. Нювсис на, а сэсся кык кружка сэтӧра чай юис.

Сёйӧм-нуръясьӧм бӧрын лэччим Шожымка берегӧ. Матысиндзи пӧрӧдім вӧсньыдик сизим пожӧм, ваялім берег вылӧ.

Друг юр вывті лэбис энь горда да неылӧ и пуксис, вӧрса ты вылӧ.

Геняӧс быттьӧ вежисны. Сійӧ ыстысис гырк висьмӧм вылӧ да котӧртіс вӧрлань, кӧні керасим. Сэні сылӧн куйліс ружьеыс.

— Сюсялӧ, — шуи ме Колялы. — Видзӧд, оз-ӧ вудж эсійӧ эрдсӧ.

Кыйӧдчам. Недыр мысти Геня збыльысь мышкыртчӧмӧн котӧртіс векньыдик эрд вомӧн вӧрса тылань.

— Лыйны кӧсйӧ позвывса уткасӧ, — пӧся шӧпнитіс Коля. — Ог сетӧй.

Син лапнитігкості, видзӧда, сійӧ котӧртӧ нин ылын. Ме уськӧдчи сы бӧрся. Эг и суӧд. Водзын, кыла, бертчӧны нин, кашкӧны. Коля, кӧть ичӧтджык тушаа, но со, мырддис Генялысь пищальсӧ да буз шыбитіс вӧрса тыӧ.

— Корсь ӧні, сунлась бурпӧт.

Геня эськӧ уськӧдчыліс косьӧ кок увсьыс сюрӧм беддьӧн, но ме сувті сылы паныд.

— Ачыд мыжа.

Кыв ни джын шутӧг ми бергӧдчим Колякӧд да мунім пос дінӧ. А Геня мыйкӧ керасис, тыдалӧ, увъя зіб, медым самавны вӧйтӧм ружьесӧ. Тайӧ лунӧ сійӧ миян дінӧ эз нин волы. Мый вӧчас сійӧ миянкӧд, кыклы паныд. Тывъяліс, тыдалӧ, ассьыс ӧберенасӧ, чукӧстіс понсӧ да лэччисны гортаныс.

Поссӧ ми Колякӧд помалім. Ме пӧрччысьлі да вомӧнавлі ваӧ лэдзалӧм пожӧм потшъяс, лэпталі помъяссӧ мӧдар берег вылас. Кӧртавлім потшъяс ньӧрйӧн. Весиг перилӧяс вӧчим. Любӧй пӧч пос вывтіыс вуджас повтӧг.

Бур пӧт на кыснасим. Уна чери эз сюр, а раз-мӧдтӧ пуны гортӧ лэччӧдім.

Тайӧ лунъясӧдзыс Колякӧд пӧшти тӧдтӧмӧсь вӧлім, а сэсся ёртасим. Аръясын ми унаысь ветлывлім ӧтлаын вӧравны. Матыстіс миянӧс ӧта-мӧд дінӧ тайӧ поскыс, сідзи жӧ, кыдзи ми йитім Шожымка юлысь берегъяссӧ.