ПОЗТЫ ВӦЛӦСЬТЫН

(Кулӧмдін уездын)

Волисполкомлӧн

уджыс сувтӧдӧма бура, нинӧм некор оз эндыв. Могӧн кӧ локтас крестьянин — пырысь-пыр жӧ сетӧны ӧтвет. Ёна бура сувтӧдӧма волбюджет да мӧда-мӧдлы отсасян комитетын удж. Юралысь Худяев ёрт зэв старатлив да сюсь морт. Сійӧ, страдна пӧра кӧть абу, некор пӧшти оз эновтлы исполкомсӧ. Мед сэтшӧм крестьяна дор старайтчысь ёртыс кольӧ и водзӧ вылӧ. Старайтчӧны и мукӧд шленъясыс.

Лыддьысян керка.

Страдна бӧрын лыддьысян керкалӧн бара кутіс уджыс кыптыны. Быд рыт сэні том йӧз лыддьысьӧны либӧ кывзӧны. Вӧлӧсьтувса йӧзӧс югдӧдӧм удж нуӧданін (волполитпросветком) индалӧ лыддьысян керкаас удж нуӧдысьыслы, кыдзи колӧ тайӧ пӧраас уджсӧ нуӧдны. Думайтӧны тайӧ лун-войӧ жӧ кыпӧдны уджъяс драматическӧй, сельскокӧзяйственнӧй и мукӧд сикас кружокъяслысь, налӧн гожӧмнас уджныс ланьтліс жӧ.

Партия да комсомол ячейкаяс

уджалӧны ӧтвылысь лыддьысян керкаыскӧд и сійӧн ёна кокньӧдӧны сылысь уджсӧ. Коммунист ячейкаыс кӧть и ичӧт (4 морт), но шленъясыс тӧдӧны ассьыныс уджнысӧ и вӧчӧны кыдзи колӧ коммунистлы. Абуджык сідз комсомолечьяс пытшкын. Став шленыс морт 22 гӧгӧр, но тӧлкаджыкыс (комсомол ног олысьыс) сӧмын морт 5−6. Мукӧдсӧ ёна на колӧ велӧдны комсомол ногыс овныс. Найӧ оз весиг вӧчны ассьыныс шуӧмъяссӧ (постановленньӧяссӧ). Пионеръяс костын некутшӧм удж гожӧмбыдӧн эз мун, ӧтчыд-мӧдысь чукӧртчылӧм кындзи. Гожӧмнас эськӧ ёнджыка колі уджавныс — сэки найӧ ывла вылын ёнджыка вермисны дзоньвидзалунсӧ ёнмӧдны. Пионеръяс костын уджалысь Нестеров ёрт кыдзкӧ слаба гожӧмнас кутчысис сійӧ удж бердас.

Ӧтувъя лавка (кооператив)

уджалӧ бура. Ставыс крестьяналы колан тӧвар дай некор пӧшти оз бырлыв. Сэсся тӧварыс абу и дона. Вяткаысь асланым вайӧм тӧвар ещӧ нин донтӧм вӧлі. Кооперативыс гожӧмбыдӧн омӧля и тупкысьліс: луннас кӧ пӧдса — рытнас век жӧ восьса. Ӧні шленъясыс шуӧныкодь ас вывсьыныс керка стрӧитны лавка улас (лавкаыс крестьянин керкаын), да мыйкӧ омӧля на сійӧ водзӧсӧ мунӧ. Шуӧмаӧсь вӧлі быд шленлы вайны кык керйӧн, а зэв на этша вайӧмаӧсь. Колӧ эськӧ сійӧ ӧдйӧджык вӧчны. Сэсся правленньӧыслы ӧдйӧнджык колӧ помавны дьӧгӧдь вӧчан заводсӧ, а то колян арсянь нин лэптӧма стопаыс дай вайӧма кык пач, а век помавтӧм. Правленньӧас да ревизия комиссияас бӧрйӧмаӧсь рӧдняясӧс — мӧдысь кежлӧ сідзисӧ оз ков вӧчны.

Эм ещӧ «Ленин» нима инвалидъяслӧн кооператив. Сэні тӧварыс ставыс жӧ крестьяналы колантор и абу дона. Сӧмын сійӧ гожӧмнад омӧльджыка воссьыліс. Приказчикыс, роботниктӧм понда, эзджык вермыв видзвывса уджъяссӧ эновтны.

«Вын» нима мелиорация (нюр косьтан) тӧварищество

кӧть неважӧн на воссис, но гижсьӧма нин 85 шлен. Заводитісны нин косьтыны «вой бок нюр». Уджалӧны куим гидротехник. Ӧні помалӧны мерайтны нюрыслысь ыдждасӧ. Шуӧны, лоӧ пӧ сюрс (1000) десятина гӧгӧр. Тайӧ удж бӧрас кӧсйӧны заводитны керавны вӧрсӧ да кодйыны канаваяс. Шленъясыс ӧні кежлӧ шуисны уджавны ӧчередьӧн. Кодсюрӧ дышапырысь мунӧны уджавныс — сэтшӧмыс ёна торкӧны, вермас гидротехникъяслӧн уджыс сувтны. Колӧ ӧд эськӧ думыштны вӧлі сэтшӧм шленъясыслы гижсиганыс — уджавтӧгыд ӧд нинӧм оз артмы. Абу кӧ окота уджавныд — эн и гижсьы.

Эм машиннӧй тӧварищество.

Шленыс эськӧ абу и уна — морт 15, но уджыс оз жӧ вермы лючки мунны. Джынйыс кымын (водзмӧстчысьясджык) зэв сьӧлӧмсяньыс кӧсйӧны уджавны машинаяснад, но мӧд джынйыс налысь уджсӧ торкӧ, весиг собранньӧяс вылас зэв дыша волывлӧны.

Тӧвариществолӧн ӧні эм вартан машина да тӧлӧдчан машина. Сӧмын вартан машинаыслӧн торъясыс абу аслас веськалӧма да, оз уджав. Кӧсйӧны жӧ лэччӧдны Сыктывдінкарса Госсельскладӧ вежны. Сэсся кӧсйӧны вайны кӧдзан машина. Сэки гашкӧ уджыс тӧвариществолӧн кыптӧ дай садьмасны и мукӧд крестьянаыс. Колӧ вӧчны машинаяссӧ видзны сарай, а то ӧні найӧ прамӧй вевттӧгыд (вевттьӧма сӧмын тьӧскӧн омӧлика) зэв регыдӧн вермасны торксьыны. Сы выйӧдз эськӧ оз жӧ ков воштыны.

Газетӧ гижысь.