КОЛӦ ВЫЛЬЫСЬ ЮКЛЫСЬНЫ

Миян Арабачын (Айкатыла вӧл.) зэв ёна торъялӧны мӧда-мӧдсьыс крестьяна, гӧля да озыра олысьяс. Видз-му зэв лёк ногӧн юклӧма (важыс на): кодлӧн некутшӧм пай абу, мукӧдлӧн куим морта семья вылӧ сы мында жӧ му-виддзыс, мыйта 7−8 морта семьялӧн. Гӧль семьялӧн, шуам, туруныс вит додь, а озырлӧн, сы ыджда семья жӧ да, — кызь да нелямын доддьӧдз. Сэсся озыръяс видз-мунас ёна ньӧбасьӧны-вузасьӧны да кодлы оз ков сеталӧны (неважӧн кыськӧ локтіс Кӧсьта поп; озыръяс пырысь-пыр жӧ корсисны да сетісны сылы видз-му — куш видзсӧ 15 додь ув, а семьяыс сылӧн сӧмын куимӧн).

Колӧ лючки выльысь видз-мусӧ юклыны (олам важ земство дырся юклӧмӧн на). Кольӧм во эськӧ босьтчылім юклыны, сӧмын тай озыра олысь крестьяна дугӧдісны Айкатыла исполком пыр. А сэні пукалӧны ставыс озыр крестьяна пиян. Таво выльысь бӧрйысигӧн колӧ нин бурджык йӧзӧс, гӧльджык йӧзӧс бӧрйыны да зільны видз-му юклӧм вӧчны.

Арабачса.