ГЕРМАНИЯСА РАБОЧӦЙЯС ДЕЛЕГАЦИЯЛӦН МИЯНЛЫ ПИСЬМӦ

«Колӧ ставмувывса рабочӧйяслы ӧтувтчыны ӧти профсоюзӧ. Ми пуктам та вылӧ став выннымӧс».

Германияса рабочӧйяслӧн делегацияыс Германияас мунтӧдзыс шыасис газет пыр сӧвет союзса рабочӧй да крестьяна дінӧ. Делегация висьталӧ налы сьӧлӧмсянь пасибӧ, бура найӧс Россияын видзӧмысь. Сэсся водзӧ шуӧны: ставным ӧні тӧдам: Сӧвет Россия социализмлань мунан туй вылын, сійӧ пӧ нуӧдӧ нин социализмсӧ олӧмӧ. Рабочӧй да крестьяна збыльысь кутӧны власьтсӧ ас кианыс. Став му вылын россияса рабочӧйяс сӧмын нуӧдӧны политика удж некодысь повтӧг. Шӧркоддьӧм россияса рабочӧй ӧні олӧ германияса рабочӧй моз нин. Крестьяна босьталісны муяс гырысь помещикъяслысь. Государствоыс зільӧ быд ногӧн югдӧдны сиктса крестьянаӧс. Став гырысь школаяс, наукаыс Россияын рабочӧй да крестьяна пӧльза вылӧ. Пабрик-заводъяслӧн удж пыр ӧтарӧ бурмӧ, кыптӧ. Капиталистъяс ӧні гӧгӧрвоисны нин — пыр кӧ тадзи кутас кыптыны овмӧс Сӧвет Россияын, рабочӧйясӧс пӧдтыны он вермы. Сы вӧсна капиталистъяс СССР вылӧ кыпӧдасны война, вермасны кӧ, регыд. Та вылӧ ми, германияса рабочӧйяссянь делегацияысь шленъяс, шуам ставмувывса рабочӧйяслы: мед тайӧ войнаыс оз ло, колӧ ставмувывса рабочӧй профсоюзъяслӧн ӧтувтчӧм да ӧтвылысь капиталистъяскӧд водзсасьӧм. Ми пуктам ассьыным став выннымӧс тайӧ удж нуӧдӧмӧ. Мед олас Сӧветскӧй Россия! Мед лоас профсоюзъяслӧн Интернационал! Мед лоас ставмувывса революция!

Видза коляд!..

Медводдза германияса делегация тшӧктӧм серти гижи Фрейбергер.