КАД НИН ВӦРЗЬӦДЧЫНЫ

Талун петӧ 20-ӧдысь «Коми Сикт» газет.

Нёль тӧлысь да джын нин «Югыд туй» газетлӧн редакция лэдзӧ тайӧ газетсӧ — «Коми Сиктсӧ». Лэдзтӧдз войдӧр ми ёна думайтлім, ыджыд лача (надея) вӧлі миян: мися, коми крестьянаыд озджык лыддьыны «Югыд туйтӧ», озджык сэтысь, гашкӧ, аддзыны аслыныс пӧльзасӧ да, колӧ лӧсьӧдны налы торъя газет, дзик крестьяна газет, медым сійӧ газет пырыс найӧ вермисны бурджыка видз-мусӧ уджавны да овмӧснысӧ регыдджык кыпӧдны. Сэсся и кутім лэдзны «Коми Сикттӧ». Медводдза номерыс петліс таво апрель 17-ӧд лунӧ.

Бура унатор йылысь нин «Коми Сиктӧ» вӧлі гижӧма. Сэтчӧ статьяяс гижавны корим агрономъясӧс, техникъясӧс, врачьясӧс, мукӧд велӧдчӧм йӧзӧс. Чуксалім тшӧтш и крестьянаӧс сэтчӧ гижны. Бура ёна нин крестьяналы позис мыйсюрӧ вылӧ велӧдчыны «Коми Сикт» вылысь. Талунъя номерын ми пасйыштам: мыйяс медколанторъяс йывсьыс сэтчӧ вӧлі гижӧма тайӧ пӧранас.

Мый нӧ ми ӧні аддзам?

Миян тай коми крестьянаыд оз вӧлӧм лыддьыны «Коми Сикттӧ», оз лыддьыны ассьыныс газетсӧ, оз кӧсйыны велӧдчыны бурджыка овны!.. Сійӧ тӧдчӧ со мыйысь: ӧти-кӧ, зэв этша крестьянин судзӧд (выписывайтӧ) тайӧ газетсӧ; мӧд-кӧ, уналасянь юасьӧны: кыдзи пӧ колӧ сійӧ вӧчны да мӧдтор вӧчны, эськӧ сы йылысь вӧлі гижӧма нин «Коми Сиктад» воддза номеръясас.

Ми быд ногӧн арталам: мыйла, мися, коми крестьянаыс оз лыддьыны, оз кутчысьны асланыс газет дорас? Сӧмын некыдзи огӧ аддзӧ помкасӧ (причинасӧ). Гашкӧ нӧ дона? Оз позь шуны донаӧн — 20 ур тӧлысьӧн. Гашкӧ гӧгӧрвотӧм кывйӧн гижам? Кыдз-мый вермам — старайтчам эськӧ ёна кокньыдик кывйӧн гижны, медым крестьянаыслы ставыс вӧлі гӧгӧрвоана. Кыткӧ кӧ лёк — колӧ гижны редакцияыслы, справитам водзӧ кежлӧ.

Сӧмын ми чайтам, мӧдтор мешайтӧ крестьяналы «Коми Сиктсӧ» судзӧдны. Миян коми крестьянаыд сьӧкыдӧсь лыддьысян удж вылас кыптыныс, абу мукӧд йӧз моз сэтшӧм горшӧсь нигаяс-гижӧдъяс вылад, оз кӧсйыны либӧ водзмӧстчыны. Найӧ шуӧны: некор пӧ миянлы шойччывныс весиг, юрвывтыр уджным да, кутшӧм нин пӧ сэні ещӧ лыддьысьӧм. Эськӧ мӧвпыштан кӧ бурджыка, лыддьысьӧмнад ёнджыка быд уджыд кокнялас, велаласны выль ног уджавны — этшаджык вын пуктӧмӧн унджык пӧльза босьтны. Дерт жӧ сідзи.

Вайӧ жӧ, коми уджалысь войтыр, вӧрзьӧдчылӧй лыддьысьӧмлань!

Кад нин бурджыка овны, прамӧй велӧдчӧм йӧз моз.