КОНИСА КООПЕРАТИВ (ЕМДІН У.) ОМӦЛЯ УДЖАЛӦ

Лавка тупкӧса, тӧвар туплясьӧ, приказчиклӧн растрата

Быдса юль тӧлысь — дай со август джынйыс кольны кутіс — миян лавка век тупкӧса. Крестьяналы лоӧ ньӧбасьны ветлыны Туръя кооперативӧ, ӧкмыс верст сайӧ.

Юль 13-ӧд лунӧ вайлісны кык пыж тыр тӧвар, да приказчикыс век на эз примит, ставыс лавка пос вылас чукӧрын куйлӧ.

Юль 2-ӧд лунӧ вӧлі лавкаас учёт (прӧверка) — приказчиклӧн эз судзсьы 94 шайт да уджӧн сеталӧма 45 шайт дон. Шуӧны вӧлі судӧн перйыны, да он пӧ вермы — овмӧсыс пӧ абу ас вылас.

Сэсся кооперативӧ воӧ зэв уна нигаяс да газетъяс — ставыс сійӧ туплясьӧ, весиг шленъясыдлы оз и висьтавлыны.

Тайӧ ставыс кооперативас служакъяс юӧм вӧсна. Шленъясыс вӧлі вежӧны нин найӧс апрель тӧлысьын, да другъясыс Попов (инструктор) да Поповцев (Емваса Обсоюз контораысь) кинас и кокнас кутчысьӧмӧн дорйисны. Колӧ жӧ эськӧ тайӧ ставсӧ кыдзкӧ лад вылӧ лӧсьӧдны да.

Лежнӧг.