КОММУНИСТЪЯСЛӦН УДЖАЛӦМ КРЕСТЬЯНА ПӦВСТЫН

Олӧмыд миян ӧні пыр кутіс вежсьыны; тӧдчымӧн нин бурмис важ серти. Крестьянаыд унджыкыс нин гӧгӧрвоӧны коммунист партиялысь бурлань зільӧмсӧ, овмӧс кыпӧдӧм вӧсна тӧждысьӧмсӧ. Коммунист партия СССР-ын оз гусьӧн уджав, кыдзи лоӧ пессьыны мукӧд государствоясын коммунист партиялы. Мый вӧчӧ миян коммунист партия — ставсьыс ӧтвет сетӧ крестьяналы: быд во пиын (весиг куим тӧлысь пытшкын) чукӧртлӧ беспартийнӧй крестьянаӧс конференция вылӧ. Татшӧм конференцияяснас коммунист партия вӧчӧ кык пӧлӧс удж: ӧти-кӧ, висьталӧ аслас удж йылысь крестьяналы; мӧд-кӧ, тыр пельнас кывзӧ крестьяналысь висьталӧмъяссӧ, норасьӧмъяссӧ, налысь тӧждысьӧмъяссӧ. Сэсся крестьяналысь тайӧ сёрнияссӧ став СССР пасьталаысь ӧтилаӧ чукӧртасны да выль кокньӧдъяс бара лӧсьӧдасны законъяс вӧчигӧн.

Дерт, вӧліны война воясад быдсяма коммунистъясыд, дай ӧні на эмӧсь: оз кужны крестьянакӧд сёрнитны, кужӧны сӧмын самӧкур юны, горзыны-матькыны, тышкасьны-косясьны — быдторсӧ. Коммунист партия сэтшӧмсӧ оз видз ас пытшкас, шуӧ — он кӧ пӧ куж овны — мун, пет.

Партия шуӧ: медым пӧ быд коммунист вӧлі ӧткодь бура уджалысь. Сы вӧсна быд воын ыстывлӧ каръяссянь коммунистъясӧс деревняӧ, крестьяна пӧвстын удж нуӧдны, тшӧтш крестьянаыслысь велӧдчыны, кыдзи колӧ крестьяна дор уджавны. Мукӧдсӧ, коді кужӧ уджсӧ бурджыка нуӧдны деревняын, ыставлӧ пыр кежлӧ (постоянная работа). Сідзжӧ кыскӧ и деревняясысь каръясӧ уджавны.

Таво тӧв кежлӧ Коми обласьт пасьтасьыс ӧтилаысь мӧдлаӧ кӧсйӧны вештавны (перемещение) морт 100 кымын либӧ унджык: кодӧс обласьтысь да уездъясысь деревняӧ, кодӧс деревняысь уездӧ да обласьтӧ.

Тадзи коммунистъяс удж нуӧдӧны крестьяна пӧвстын да асьныс крестьяналысь велӧдчӧны уджавны.

Н. Чук.