ВОТ МЫНТЫНЫ КОКНЬӦДЪЯС

Удждысян тӧвариществоса шленъяслы пай вылӧ видз-му вот мынтан кад нюжӧдчыссьӧ

Татшӧм кокньӧдыс и колян во вӧлі, сӧмын уна крестьяна абу тӧдлӧмаӧсь, омӧля висьтавлӧмаӧсь сы йылысь крестьяналы волисполкомъяс да. Таво гижам газетӧ, медым крестьяна тӧдны кутасны, кыдз корсьны сійӧ кокньӧдсӧ.

Удждысян тӧвариществоса шленъяслы, эм кӧ налӧн крестьянскӧй пай да найӧ кӧ видз-му уджалӧны, сельхозналог мынтан кад налы нюжӧдчыссьӧ пай доныс 6 тӧлысь кежлӧ. Шуам: крестьянинлӧн эм кык 5 шайта крестьянскӧй пай. Январ 1 лун кежлӧ сылы колӧ мынтыны 6 шайт. Сылӧн сэк кежлӧ кыдзкӧ сьӧмыс оз ло. Сылы позьӧ водзджык пайсӧ пуктыны волисполкомӧ мынтан кадсӧ нюжӧдӧм вылӧ. Ӧти 5 шайта пайсӧ кӧ пуктас, вот нюжӧдчыссьӧ 5 шайт жӧ 6 тӧлысь кежлӧ. Сэки январ 1 лун кежлӧ пыддиыд 5 шайтсӧ сійӧ мынтас сӧмын юль 1 лун кежлӧ. Кадсӧ крестьянин вермас бӧрйыны ачыс, коді колӧджык (видз-му вот мынтыны лӧсьӧдӧма куим срок).

Кад нюжӧдӧмысь крестьянинлы колӧ шыӧдчыны гижӧдӧн волисполкомӧ. Гижӧдыскӧд ковмас мыччыны пай да окладнӧй лист. Волисполком сетӧ окладнӧй листкӧд эскӧданпас. Сэтчӧ индӧ пайлысь №, дона-ӧ пайыс да вот мынтан выль кадсӧ. Пай кольсьӧ волисполкомӧ, бӧрсӧ сетсьӧ вот мынтӧм бӧрын.

Мынтан кад кольӧм бӧрас кӧ крестьянин тшӧктӧ пай вылӧ видз-му вот (сельхозналог) мынтан кад нюжӧдны мынтытӧм вот вылас — сэки оз нюжӧдчыссьы.

В. Фролов.