КОМИ ОБЛАСЬТЫСЬ МУННЫ ВЫЛЬ МЕСТАӦ ОВМӦДЧЫНЫ ОЗ ПОЗЬ

«Коми Сикт» газетын № 19, август 22-ӧд лунӧ вӧлі статья «Мый колӧ тӧдны выль местаӧ овмӧдчыны мунысьяслы» нима. Сійӧ статьяас вӧлі шуӧма: «Миян коми йӧз пытшкысь сюрасны, дерт, выльлаӧ мунны окотитысьяс», да сэсся мый колӧ мунтӧдз войдӧр тӧдны крестьянинлы.

Тайӧ статья серти, Обласьтувса Видз-му Управленньӧӧ бара пондісны локны ходокъяс, выль местаӧ овмӧдчыны мунны документъяс корны. Ӧні матігӧгӧрса на локтӧны, а кор пӧлучитасны сійӧ статьясӧ ылысджык деревняясын, пондасны локны и ылісянь.

Медым крестьяна весьшӧрӧ уджалан бур пӧра оз воштыны выль местаӧ мунны тӧждысьӧмысь, Обласьтувса Видз-му Управленньӧ висьталӧ: СССР-са Видз-му Удж нуӧдан Комиссариат планӧ Коми обласьт абу шедӧма (сюрӧма) и выль местаӧ овмӧдчыны мунны Коми обласьтысь оз лэдзны, некутшӧм документ Видз-му Управленньӧяс выль местаӧ мунны оз сетны.

Статьяыс сійӧ «Коми Сикт» газетас гижӧма Мӧскуаса (центрса) газет вылысь, сэтчӧ абу пасйӧма торйӧн: кутшӧм губерняясысь да обласьтъясысь позьӧ выль местаас мунны ни, кутшӧмысь оз позь ни.

Обласьтувса Видз-му Управленньӧӧ тайӧ лунъясӧ воис Видз-му Комиссариатысь зэв стрӧгӧй циркуляр (гижӧд); сэні шуӧма: оз пӧ ков лэдзны ӧтик мортӧс весиг выль местаӧ мунны, кытысь Видз-му Комиссариатлӧн план серти абу шуӧма нуӧдны выль местаӧ. Некутшӧм документ пӧ оз ков сетны выль местаӧ овмӧдчыны мунӧм понда — местаяс видлавны ветлыны ни овмӧдчыны мунны. Весиг тшӧктӧма: волисполкомъяс кӧ либӧ сельсӧветъяс сетӧны кодлыкӧ справка, ыджыд-ӧ семьяыс либӧ уна-ӧ овмӧсыс, гижны сэтчӧ, мый сійӧ справка кузя выль местаысь видз-му овмӧдчыны оз сетсьы.

Обласьтувса Видз-му Управленньӧӧн

заведуйтысьӧс вежлысь Куклин.