ПОМАЛАМ РАСТРАТА!
Бӧръявылысь ёна кутіс мунны кӧнсюрӧ растрата. Растратаыс — зэв ыджыд лёк. Сійӧ орӧдӧ миянлысь овмӧснымӧс, кутӧ (торкӧ) кыпӧдчӧмысь, лӧгӧдӧ (лёкмӧдӧ) войтырӧс.
Тӧрытъя газетын ми растрата йылысь лэдзим шыӧдчӧм профсоюзъяс дорӧдз. Уна профсоюзъяслӧн вӧлӧм мунӧ лёка вӧдитчӧм сьӧмӧн, уналаын нин вӧлӧма растрата, кодсюрӧӧс и судитісны нин.
Ӧні босьтам ми деревняясын олӧм. Кӧні медуна растратаяс сэні овлӧны? Дерт, кӧні ёнджыка сьӧмъясӧн да тӧварӧн вӧдитчӧны — кооперативнӧй лавкаясын. Кутшӧм общественнӧй (потребительскӧй) лавка оз ревизуйтны, унджыкласьыс аддзӧны растрата: приказчикыслӧн сьӧмыс (либӧ тӧварыс) оз судзсьы, либӧ правленньӧас юралысьыслӧн, либӧ став правленньӧыслӧн.
Нэмдінса (Кулӧмдін уезд) кооператив лавка правленньӧса председатель Игнатов тратитӧма 1189 шайт; Айкатыласа (Емдін уезд) инвалид кооперативса правленньӧ растратитӧма 400 шайт — судӧ сетӧма вӧлі делӧсӧ та йылысь, да век на нинӧм абу; Пожӧгын (Кулӧмдін уезд) приказчикыс тшӧт нуӧдысьыскӧд юӧмаӧсь 300 шайт; Кониса (Туръя вӧл. Емдін уезд) потребительскӧй лавкаын приказчикыслӧн абу судзсьӧма 94 шайт да 45 шайт дон уджӧн сеталӧма тӧварсӧ (сійӧ растрата кодь жӧ). Тайӧ ставыс — талунъя газетын. Воддза газетъяс кӧ видзӧдлан, уна на татшӧмыд сюрас.
Коми обласьт кузя пӧшти быдлаын сьӧм лотайтӧны. Коді сьӧмӧн ичӧтика вӧдитчӧ, сы дінӧ и сибдӧ сьӧмыс. Ставыс сійӧ сьӧмыс — трудӧвӧй кӧпейка, ставсӧ чукӧртӧма крестьяналысь да рабочӧйяслысь. Сӧвет власьт да коммунист партия кыдз-мый вермӧны зільӧны бурмӧдны-кыпӧдны крестьяналысь овмӧссӧ, торъя ёна тӧждысьӧны кооперативъяс ёнмӧдӧм понда. А лёк йӧз, отсалӧм пыдди, толькӧ дзугӧны-кисьтӧны выльысь стрӧитчӧмсӧ.
Мыйла кутіс татшӧм ёна растратаыс мунны? Со мыйла. Шоча овлывлӧ ревизия. Правленньӧясас дай ревизионнӧй комиссияясас веськалӧны лёк йӧз. Сэсся оз быд растратаысь судӧ сетны мыжаяссӧ, жалитӧны да прӧститӧны — сійӧ, дерт, толькӧ пӧвадитӧ мӧдысь кежлӧ растрата вӧчны.
Сӧвет власьт растрата вӧчӧмысь тшӧктӧ ёна чорыда судитны-мыждыны.
Миян Коми обласьтувса судлы растрата йывсьыс делӧяссӧ колӧ регыдджык видлавны, сэсся судъяссӧ колӧ нуны (вӧчны) сиктъясын, кӧні растратасӧ вӧчӧмаӧсь, да чорыдджыка мыждыны. Мыждыны тшӧтш колӧ и ревизионнӧй комиссияяссӧ, коді дыр эз видлавлы правленньӧыслысь уджалӧмсӧ да сы вӧсна лои растратаыс.
Колӧ чорыда босьтчывны ӧтвылысь ставнымлы растрата бырӧдны. Тырмас нин уджалысь йӧзлысь сьӧм лотайтны!
