ВОЛСЯЫН

Няньяс-пуктасъяс абу омӧльӧсь.

Волсяын (Сыктыв у.) няньяс абу омӧльӧсь, сӧмын уналаті жарнас вевйӧ вӧтлӧма идъястӧ. Няньтӧм гӧль крестьяна заводитісны нянь вундыны август коймӧд лунъясӧ — сёйны да кӧйдысъяс вылӧ. Уна крестьяна идъяс кӧдзавлісны машинаӧн весалӧм кӧйдысӧн. Ӧні найӧ шуӧны: идйыс пӧ быдмӧма мичаджыка весавтӧм кӧйдысӧн кӧдзӧм дорысь. Крестьяна таво видлӧг вылӧ кӧдзавлісны турнепс (мӧс сёркни), сӧмын агрономыд Волсяад абу да, найӧ эз кужны вӧдитныс, этша воас. Турнепссӧ жӧ кӧдзліс комсомол ячейкабердса видз-му уджалан кружок, да налӧн быдмӧма буракодь. Найӧ вӧдитӧм йывсьыс ветлісны юасьны Визинӧ агроном дінӧ. Градвывса пуктасъяс быдмӧны шӧркоддьӧма.

РЕДАКЦИЯСЯНЬ: Турнепстӧ вӧдитӧм йылысь ёна вӧлі гижӧма «Югыд туй» газетӧ. Колӧ ёнджыка крестьяналы лыддьыны коми газетъяс: «Югыд туй» да «Коми Сикт».

Оз бура исполком уджав.

Таво гожӧмӧдз исполкомын удж мунліс зэв бура, сӧмын ӧні мыйкӧ пондіс торксьыны. Юралысь юӧм йывсьыс газетын вӧлі нин гижӧма. Ӧні сэтчӧ делопроизводителяс босьтісны Кузьбӧжовӧс. Сійӧ дзонь вежонъясӧн оз палявлы, пыр юӧ.

Исполком ки улас вӧліны важ казеннӧй видзьяс. Сійӧ видзьяссӧ сеталіс десятаяслы зэв неладнӧ: Велпон десяталы сетӧма кыськӧ Межадор улысь, а Кырув десяталы сетӧма Велпон десяталы бердсьыс; Кырув десятаыслы Межадорувса видзьясыс вӧліны дзик бердасӧсь. Исполкомыс матыстӧм пыдди ылысталӧ крестьянаысь видзьяссӧ. Этша турун вӧснаыд, дерт, крестьянаыд эз сы ылнаад мунны видзьястӧ пуктыныд. Бӧрыннас эськӧ исполкомыд бӧр вежлаліс, да джын турунсӧ нин скӧт вӧлі талялӧма.

Кооператив

уджалӧ шӧркоддьӧма, сӧмын мыйлакӧ оз вермы вайны карасин, да табак пыр этша, шленъясыслыджык сеталӧны. Лавкалӧн эм вартан машина. Таво крестьяна унаӧн кӧсйӧны вартны вартан машинаӧн.

Комсомолечьяс бура отсалісны.

Комсомолечьяс таво гожӧм отсалісны куим крестьяналы: ӧтилы тшупсисны, мӧдлы пес кералісны, коймӧдыслы ытшкисны. Куимнаныслӧн пияныс да мужикъясыс Гӧрд армияынӧсь.

Жыдач.