САР ДВОРЕЧЬЯС — КРЕСТЬЯНАЛЫ БУРДӦДЧАНІН

Мый шуӧ Кулӧмдінса крестьянин сэні олӧм йылысь

Дас воысь нин дыр ме виси морӧсӧн. Май тӧлысьын таво Здравотделса Комиссия индіс менӧ мӧдӧдны бурдӧдчыны лунвылӧ, Ливадияӧ. Ошкисны ёна бура. Веськыда кӧ шуны, ыджыд надеяяс ме эг пуктыв. Но, мися, мый лоӧ — лоӧ, ветла.

Мунім зэв бура (ми вӧлім кыкӧн — ещӧ мекӧд ветліс Козлов ёрт Емдінысь). Ливадияын примитісны, видзисны, вердісны-юкталісны сэтшӧм бура — вӧтӧн не аддзывны сэсся миянлы сэтшӧмсӧ! Олім важ саръяс оланінын. Аттӧ, ыджыдӧсь да бурӧсь жӧ дворечьясыд! Овлӧмаӧсь тай, сё мокасьтӧй! Видзлӧмаӧсь жӧ йӧз добратӧ.

Кык дворечас ӧні бурдӧдчӧны куимсё крестьяна гӧгӧр. Вердісны зэв бура, витысь лунӧ: бергӧдчыныд он удит — бара нин чуксалӧны сёйны. Сынӧдыс зэв бур (Ливадияыд Крымын) — ой-ой, долыд морӧсыдлы лолавныд!

Татшӧм олӧмнад ме куим вежон мысти дзикӧдз бурді. Олім ми ставсӧ квайт вежон. Мӧдӧдісны бӧрсӧ зэв жӧ бура. Быдлаын — Сыктывдінкарын, санаторияас (Ливадия), быдлаын туй кузялаас примиталісны, видзисны, колльӧдалісны зэв бура (сӧмын мунігӧн и локтігӧн Мӧскуаын мыйкӧ зэв лёк вӧлі: шуӧны, быдлаын пӧ висьысьяслы медводз ӧчередьтӧг сетны, а сэні вокзал вылын лои миянлы перйыны билет суткиысь дыр, ёна дӧзмылім — тайӧ ставыс нэпманъяслы кесъясьысь носильщикъяс вӧсна, найӧ век быдсяма ногнас водзвыв босьталӧны билетъястӧ).

Бур делӧ Сӧвет власьт вӧчӧ — сар оланінъясын шойччӧдӧ-бурдӧдӧ крестьянаӧс.

Ыджыд аттьӧ Сӧвет власьтлы, тшӧтш асланым Обласьтувса Исполкомлы да Здравотделлы!

Кулӧмдінса крестьянин

Микайлӧ Епимович Ногиев.

Август 19 лун.