ГЕРМАНИЯСА РАБОЧӦЙЯСЛӦН ДЕЛЕГАЦИЯ СССР-ын

Став рабочӧйӧс ӧтувттӧмысь Амстердамса Интернационал мыжа

Мӧскуа. Германияса делегацияысь став шленыс бӧр локтісны Мӧскуаӧ. Локтӧм бӧртиыс Дворец Трудаын ВЦСПС президиумлӧн да германияса делегацияыслӧн вӧлі ӧтувъя заседанньӧ. Заседанньӧ вылас председателялысь Томскӧй ёрт шуис: ми пӧ пыр зільлім дай водзӧ зілям ӧтувтны гӧрд профсоюз Интернационал Амстердамса Интернационалкӧд, сӧмын пӧ Амстердамса Интернационалыс пыр ӧтувтӧмыслы паныд муніс. СССР-са рабочӧйяс пӧ зільӧны ӧтувтны став мувывса рабочӧйясӧс капиталистъяскӧд ӧтвылысь водзсасьӧм вылӧ. Сы вӧсна пӧ колӧ лӧсьӧдны став му вылын ӧти профсоюз Интернационал. Германияса делегацияын юралысьыс Фрейбергер воча шуис: германияса рабочӧйяс пӧ оз паныд мунны профсоюз Интернационалъяс ӧтувтӧмлы. Ме ногӧн пӧ, ӧнӧдз ӧтувтныс оз удайтчыв Амстердамса Интернационал вӧсна.