ПЕЗМӦГЫН

(Кулӧмдін уезд)

Комсомол ячейка уджалӧ оз на дыр, организуйтчӧмыслы ӧти во на. Уджсӧ нуӧдны ячейкаыс сӧмын на заводитчӧ. Ячейкаын эмӧсь омӧлик шленъяс: ветлӧдлӧны вичкоӧ, асьнысӧ том йӧз дорысь вылӧ пуктӧны, юӧны да матькӧны. Найӧс комсомолсьыс оз вӧтлыны, кӧсйӧны найӧс велӧдны. Гашкӧ, коркӧ наысь бур комсомолечьяс лоӧны, ӧні эськӧ уна жӧ комсомолыслы вӧчӧны да. Эмӧсь, дерт, и зэв прамӧй комсомолечьяс.

Воспитательнӧй удж мунӧ омӧля на. Ячейкасянь эмӧсь представительяс кооперативын, исполкомын да мӧда-мӧдлы отсасян комитетын. Том йӧз заводитӧны нин гӧгӧрвоны, мый комсомол бур туй вылын, пондісны пырны комсомолӧ.

Лыддьысян керка ӧні оз жӧ зэв ёна уджав, дай страдна кадад ёнасӧ уджавныс оз и позь вӧлі. Праздник кындзи некутшӧм йӧз эз волывны лыддьысян керкаӧ. Лыддьысян керкаын вӧлі лӧсьӧдӧма Ленинскӧй уголок, сельскокӧзяйственнӧй кружок, сӧмын налӧн уджыс ньӧти оз тӧдчы.

Омӧля удж мунӧмсьыс комсомол ячейкаас да лыддьысян керкаас, ме ногӧн кӧ, абу мыжаӧсь татчӧс уджалысь том йӧз. Пезмӧгын миян абуӧсь бур уджалысьясыс. Колӧ эськӧ уджсӧ кок йылас сувтӧдны ыстывны татчӧ бурджык уджалысьясӧс. Шойнатыын эм зэв уна учрежденньӧяс, эмӧсь уна партийнӧй йӧз, кодъяс бура вермӧны нуӧдны удж. Сэтчӧ гожӧм кежлӧ уджавны практика вылӧ ещӧ на ысталӧмаӧсь вӧлі коммунист университетысь велӧдчысьясӧс. Ме ногӧн кӧ, бурджык эськӧ вӧлі сэтшӧм йӧзсӧ либӧ совпартшкольникъясӧс ыставны вӧлӧсьтъясӧ, кӧні уджыс слаба мунӧ.

Том морт.