БОСЬТЧЫЛАМӦЙ ПӦСЬ ВЫВСЬЫС!

Но вот — и коми йӧз аддзылісны лэбалан машинатӧ, уна крестьяна сы сьылӧ пуксьылісны, лэблісны. Пӧшти став Коми му вомӧныс шаркӧдіс сійӧ. Уна грездъяс весьтӧд лэбис — кӧть эз уналаӧ пуксьыв эськӧ да, уналасянь видзӧдісны сылысь шывгӧмсӧ. Унаӧн гӧгӧрвоисны сылысь бурлунсӧ, колантуйсӧ — пӧльзасӧ. Лэбалан машиналы абу некутшӧм кутӧд — лэбӧ сынӧдӧд (воздухӧд), лэбӧ 125 верст часнас.

Мый нӧ сэсся миянлы вӧчны та бӧрын? Воліс тайӧ лэбалан машинаыд Коми муӧ, лэбаліс-лэбаліс, сэсся и дзикӧдз миянысь лэбас (мунас). Код тӧдас, кор сэсся бара волас татчӧ.

Та понда, медым пыр миян Коми муын лэбаліс сэтшӧм машинаыс, колӧ аслыным лӧсьӧдны аэроплантӧ. Мыйкӧ мында чукӧртӧма нин сьӧм «Коми морт» нима аэроплан вылӧ. Сӧмын вывті на этша. Крестьяна отсӧгтӧг дыр оз ло миян «Коми мортыд».

Кӧнъясын лэбаліс тайӧ гидропланыс, быдлаын крестьяна костын сёрнитӧны: лэбалан машинаыд пӧ тай вывті бур добра вӧлӧма. Колӧ пӧ Коми обласьтлы аслыс лӧсьӧдны татшӧмсӧ кыкӧс кымын. Ми пӧ, крестьяна, отсалам мый вермам.

Со мый шуӧны миян коми крестьяна.

Кык аэроплантӧ, гашкӧ, ӧтпырйӧ огӧ вермӧ лӧсьӧдны — уна сьӧм колӧ (тайӧ волысь гидропланыс сулалӧ 36.000 шайт), а кӧть ӧтиксӧ дзик нин колӧ лӧсьӧдны — ӧтикыд вылӧ вермам корсьны сьӧмтӧ. Крестьяна отсаласны, дай тӧргӧвӧй кӧзяйственнӧй организацияяс отсыштасны.

Оз ӧд уна и ков: быд керка юрысь кӧ сетасны ур 50−60 — сэки и ставыс, лоас асланым аэроплан. Крестьяна кӧсйысьӧны отсавны: сетам пӧ сы мынданикнад, сетам. Весиг кӧнсюрӧ шуӧны: колӧ пӧ аэроплан вылас сьӧм чукӧртӧмсӧ вотӧ сюйны, медым пӧ быдӧн мынтасны.

Вотӧ сы вылӧ оз позь сюйны, колӧ чукӧртны ас кӧсйӧм серти (добровольнӧя). Сы понда колӧ пырны став йӧзыслы «Авиахим» нима обществоӧ.

Вайӧ жӧ, коми войтыр, чорыдджыка босьтчыламӧй тайӧ удж бердас! Вайӧ ӧтвылысь, сьӧлӧмысь шуамӧй: «Коми морт» нима лэбалан машина лӧсьӧдам, сійӧ миян лоас, недыр мысти кутас лэбавны Коми му вомӧн!

Дась пӧсь вывсьыс колӧ босьтчыны тайӧ уджас!