ИЧӦТИКА ВИДЗ-МУӦН ВӦДИТЧӦМ ЙЫЛЫСЬ

Юалӧм. Кыдзи позьӧ видз-му перйыны уджавны, кодлӧн видз-муыс абу, а кӧсйӧ уджавны (батракъяслы)?

Висьталӧм. Видз-му закон чукӧрса 9-ӧд статья серти, коді кӧсйӧ уджавны видз-му, быдӧнлы видз-му сетсьӧ. Коді кӧсйӧ видз-му вылын уджавны ас выннас — налы колӧ шыӧдчыны земельнӧй обществоӧ, кытчӧ сійӧ гижсьӧма, либӧ Видз-му Управленньӧясӧ, эм кӧ налӧн запаса фондас видз-муыс. Общество татшӧм шыӧдчӧмсӧ видлалӧ скод вылын да шуӧ: либӧ сетны видз-му, либӧ ӧткажитны. Видз-му корысьсӧ кӧ войдӧр нин вӧлі гижӧма сійӧ обществоас, сэтшӧм мортыслы видз-мусӧ обществолы быть лоӧ сетны кыв шутӧг. Видз-му уджавны, корысьыс кӧ кытыськӧ бокысь локтӧма, сэтшӧмыслы общество скод вылын вермӧ ӧткажитны, обществоас кӧ абу лишнӧй видз-муясыс.

Миян обласьтын обществояслӧн лишнӧй видз-муяс абуӧсь, сідзжӧ абуӧсь пырысь-пыр уджавны шогмана (гӧрны да ытшкыны) видз-муяс и видз-му управленньӧяс фондын. — Колӧ войдӧр вӧчны на вӧрысь. Вӧра местаыс, кытысь позьӧ вӧчны видз-му, миян обласьтын уна эм. Батракъяслы, обществоысь кӧ оз сетны видз-му, колӧ ӧтувтчыны артельӧ либӧ тӧвариществоӧ да корны бурджык места вӧрысь — сэки сетсьӧ налы вӧчны му-видз да овмӧдчыны. Вӧрӧ овмӧдчыны мунысьяслы государство отсалӧ: керка-карта пуктыны вӧр сетсьӧ дон босьттӧг, выль местаӧ овмӧдчӧм бӧрти вит во вотысь мездыссьӧ; Гӧрд армияын служитӧмысь мездыссьӧ; видз-му вӧчны удждысян банк пыр уджӧн сьӧм сетсьӧ, да сэсся ещӧ на мукӧд пӧлӧс кокньӧдъяс.

Куклин.