СССР-лӧн ЗАГРАНИЧАКӦД ВУЗАСЬӦМ ПАСЬКАЛӦ

Колян во серти, таво мукӧд государствояскӧд вузасьӧм ёна паськалі. Огӧ кӧ кутӧй лыддьыны нянь петкӧдӧм (колян во няньсӧ заграничаӧ петкӧдім вывті этша), став тӧварсӧ мукӧд государствоясӧ петкӧдӧма бӧръя ӧкмыс тӧлысьнас 354 миллион шайт дон. Колян во став тӧварсӧ вӧлі петкӧдӧма сӧмын 195 миллион шайт дон. Сідзкӧ таво ми тӧварсӧ мукӧд государствоясӧ петкӧдім пӧшти кык мында колян во серти.

Мукӧд государствоясысь тӧварсӧ СССР-ӧ пыртім колян во серти кык мында жӧ: таво вайим тӧварсӧ 499 миллион шайт дон, а колян во 249 миллион.

Таво миян колӧ ёна тэрмасьны мукӧд государствоясӧ нянь петкӧдӧмӧн. Ӧні сэні нянь вылас доныс сулалӧ вылын на. Нянь доныс вермас дзикӧдз усьны, кор кутасны сэтчӧ ёна вайны няньсӧ южнӧй странаяссянь. Сэтӧні няньсӧ чукӧртӧны кык-куим тӧлысьӧн сёрӧнджык миян дорысь да, ӧні эз на удитны вайнысӧ. Миян крестьянинлы зэв выгӧднӧ лоӧ вузавны няньсӧ ӧдйӧнджык, доныс усьтӧдз. Няняинъясын СССР пасьта уна няньыс вӧсна доныс сылӧн дзикӧдз нин уси. Мед доныс ещӧ оз усь, колӧ отсавны кооперативъяслы чукӧртны унджык нянь. Кор лишнӧй няньсӧ ми петкӧдам мукӧд государствоясӧ, асланым миян нянь доныс вывтісӧ оз усь, крестьяниныслы лоӧ выгӧднӧджык. А сійӧ нянь вылас ми заграничаысь вермам вайны миянлы колан тырмытӧм тӧвар.

С. Губерман.