СЕЛЬХОЗНАЛОГ

Кытчӧ да кыдзи норасьны

Сельхозналог йылысь став норасьӧмъяссӧ видлалӧ вӧлӧсьтувса налогӧвӧй комиссия. Сійӧ комиссияас унджык шленыс — крестьяна. Вӧлӧсьтувса налогӧвӧй комиссияӧ норасьӧмыс сетсьӧ тӧлысся срокӧн окладнӧй листсӧ пӧлучитӧм мысти. Норасьӧмъяс вылӧ некутшӧм гербӧвӧй марка оз пуктыссьы.

Норасьӧмъяс комиссияӧ сетігӧн колӧ ёна видзӧдлыны, медым сійӧ вӧлі гижӧма дженьыда да гӧгӧрвоана, дай медым сы бердӧ вӧлі тшӧтш пуктӧма мукӧд пӧлӧс колан документъяс.

Норасьӧмъяс позьӧ сетны и срок кольӧм бӧрын (тӧлысь бӧрын). Сӧмын тадзи норасьӧмтӧ босьтасны сэки нин, нюжӧдчӧмыс кӧ эз ло норасьысь вӧснаыс, лои мукӧд вӧсна. Шуам, норасьӧм бердас колӧ вӧлі тшӧтш кутшӧмкӧ справка волисполкомсянь. Волисполкомыд справка сетӧмнас нюжӧдчис. Сэки норасьӧмтӧ позьӧ сетны срок кольӧм бӧрын.

Норасьӧмъяс воӧм мыстиыс волисполком видлалӧ: веськыда-ӧ (правильнӧ-ӧ) норасьӧмсӧ гижӧма, эм-ӧ став колан документыс норасьӧм бердас. Веськыда кӧ гижӧма да эмӧсь кӧ документъясыс, пырысьтӧм-пыр волисполком сетӧ видлавны налогӧвӧй комиссияӧ.

Абу кӧ норасьӧм дінас став колан документыс, норасьысьыслы волисполком тшӧктӧ вайны куимлунъя срокӧн тырмытӧм документъяссӧ.

Вӧлӧсьтувса налогӧвӧй комиссиялӧн шуӧмыс норасьӧм кузя пырысьтӧм-пыр жӧ вӧчсьӧ (проводится в жизнь). Тайӧ комиссия шуӧм кузяыс бара позьӧ норасьны уездувса комиссияӧ. Та вылӧ сетсьӧ тӧлысся срок. Уездувса налогӧвӧй комиссиялӧн шуӧмыс медбӧръя нин. Сійӧ шуӧм кузя норасьӧмъяссӧ некытчӧ нин оз босьтны.

Тавося сельхозналог йылысь законын тшӧтш шуӧма вӧлӧсьтувса налогӧвӧй комиссияӧн норасьӧмъяссӧ видлалӧм ног йылысь. Законын шуӧм серти, вӧлӧсьтувса налогӧвӧй комиссия вермӧ норасьӧмъяссӧ видлавны сійӧ сиктын, кӧні олӧны норасьысьясыс. Сэки комиссия аслас заседанньӧ вылӧ корӧ норасьысьяссӧ, юасьӧ налысь, на дырйи видлалӧ норасьӧмсӧ дай на дырйи лӧсьӧдӧ норасьӧм кузяыс шуӧмсӧ.

Норасьӧмъяс сетігӧн оз ков вунӧдны со мый: кӧть и норасьӧмсӧ сетӧма, срок кежлӧ сельхозналог мынтӧмысь оз позь нюжӧдчыны (быттьӧ эз на кӧ удитны вӧлӧсьтувса налогӧвӧй комиссияын видлавны норасьӧмсӧ). Повны нинӧм, кӧть и сельхозналог лоӧ нин мынтылӧма. Вӧлӧсьтувса налогӧвӧй комиссия кӧ норасьӧм серти шуас сельхозналогысь мездыны либӧ мыйкӧ мында чинтыштны, сельхозналог вылӧ мынтӧм сьӧмтӧ бӧр сетасны мынтысьлы волисполком пыр.

Тайӧ став висьталӧм сертиыс кӧ вӧчас быд крестьянин норасьӧм йылысь уджсӧ, некутшӧм нелючки сельхозналог босьтӧмын оз ло.