КЫДЗИ СКОДУЙТНЫ

Миян деревняясын крестьяналӧн общӧй собранньӧяс — сельскӧй скодъяс — омӧля на мунӧны, прамӧя скодуйтӧм оз и тӧдны. Унджык скодыс тадзи овлӧ: чукӧртчасны кымынкӧ керка юрысь медгырысьясыс (кӧзяинъяс) дай восьтасны скод. Сёрнияс панасны кодлы мый йылысь дум вылас усьӧ. Весиг председатель ни секретар мукӧддырйиыс оз бӧрйывны, протоколъяс оз гижлыны ни. Лючки скодуйтӧм пыдди лыбас зык-шум, вензьӧм, он и гӧгӧрво нинӧм. А кодъяслӧн скодуйтны праваныс абу — налы сійӧ и любӧ. Нывбабаяс да томджык войтыр скодъяс вылад оз и волывлыны.

Сэтшӧм скодуйтӧм зэв омӧль. Колӧ лӧсьӧдны деревняясын прамӧй общӧй собранньӧяс. Сельсӧветъяслы бура колӧ босьтчыны скодъяссӧ нуӧдны, отсавны сэні сёрнитігас, скод вылын шуӧм кузя нуӧдны делӧсӧ (решенньӧсӧ) водзӧ, помӧдзыс. Скод вылӧ оз ков сибӧдны сэтшӧмъясӧс, кодъяслӧн бӧрйысян праваыс абу.

Сэсся гырысьясысь (кӧзяинъясысь) кындзи скод вылӧ колӧ кыскыны (привлекать) тшӧтш нывбабаясӧс да том войтырӧс. Найӧ сэні вочасӧн велаласны сӧветса уджӧ. Велӧдысьяслы, агрономъяслы, пельшӧръяслы, лесничӧйяслы, мукӧд деревняса культурнӧй удж нуӧдысьяслы колӧ волывлыны быд общӧй собранньӧ вылӧ да тшӧтш отсасьны крестьяналы, кыт-мый оз тӧдны — индыны-туйдӧдны найӧс.

Общӧй собранньӧ вылын позьӧ сёрнитны быдтор йылысь, мый колӧ деревнялы. Сельсӧветъяслы колӧ скодъяс кежлӧ водзвыв лӧсьӧдчыны, медым скодыс эз пӧр зыксьӧмӧ бӧрвылас. Правильнӧ кӧ гоз-мӧдысь нуӧдан скодтӧ, крестьяна асьныс велаласны да оз кутны сэсся увгыны водзӧ. Сэки пӧльзаыс унджык артмас, весьшӧрӧ пӧраыс озджык кут кольны. Медся ыджыд пӧльзаыс со кутшӧм лоас: сельсӧветлӧн уджыс кыптас, ӧдйӧджык кутас мунны, дай крестьяна регыдджык тӧдмасясны став сӧветса уджнас.

С—ва.