АЧЫС МЫЖА-А — НОРАСЬӦ ЕЩӦ

Веськыда газетӧ гижӧмысь оз ков повны

«Югыд туй» газетын (март 31-ӧд лунӧ, № 70) вӧлі статья «Юысь акушерка» — Кӧрткерӧсса акушерка Тентюкова йылысь. Статьяас вӧлі гижӧма: акушерка Тентюкова пӧ пыр ӧтарӧ юӧ да лекарствояссьыс калым босьтӧ — дзикӧдз аньыд яналӧма вӧлі. Сійӧ статьяыд зэв ёна Тентюковалысь, буракӧ, сьӧлӧмсӧ гудыртӧма. Сетӧма вӧлі сэсся жалӧба, корӧма газетӧ гижысьсӧ судӧ сетны: гижӧма пӧ лӧжӧс (клевета). Сы серти вӧлі вӧчӧма дознанньӧ. Сэтысь тыдалӧ: акушерка Тентюкова збыльысь вӧлӧм юлывлӧ. Калым босьтӧмсӧ кӧть абу аддзылӧмаӧсь, да Тентюковаыс ачыс крестьяна конференция вылын шулӧма: «Збыльысь ме босьта, кодкӧ кӧ мыйкӧ ваяс».

Август 5-ӧд лунӧ Тентюкова норасьӧм йылысь делӧсӧ видлаліс Обласьтувса прокурор да шуис: газетӧ гижӧма веськыда, газетӧ гижысьӧс сыысь судӧ не сетны.

Ачыд кӧ «грека», оз нин ков весьшӧрӧ корсьысьны чукыль-мукыльӧн туйтӧ мукӧдӧс мыждыны.

А газетӧ гижысьяслы ме шуа: веськыдтор гижӧмысь энӧ полӧй, сыысь вӧрзьӧдны некод оз лысьт.

Св.