ОТСАЛАМ ВОЗДУШНӦЙ ФЛОТЛЫ!

Крестьянаӧс корам «Авиахимӧ» пырны

Талун Сыктывдінкарӧ виччысям лэбалан машина — гидроплан^Лэбалан машина, пуксьӧ и кыпӧдчӧ ва вывсянь./^, нимыс «Смычка города с деревней» (комиӧн кӧ: «Карлӧн деревнякӧд топӧдчӧм» либӧ — «Рабочӧйяслӧн крестьянакӧд ӧтувтчӧм»). Коми муӧ тайӧ лэбалан машинаыс локтіс медводдзаысь на. Не Сӧвет власьтыд кӧ, гашкӧ, некор ми эгӧ и аддзывлӧ лэбалан машинатӧ Коми муад.

Мыйла локтіс миянӧ лэбалан машинаыс?

Ӧні уна лэбалан машинаяс ветлӧны СССР пасьта, медъёна деревняясӧд. Тайӧ «Смычка» нима гидропланыс Мӧскуасянь петліс важӧн нин, кык тӧлысь саяс нин лоӧ. Уна деревняясӧ нин воліс, уна крестьяна нин аддзылісны дай асьныс сы вылын лэбалісны. Коми муӧ воис тайӧ Перымскӧй губернясянь. Могыс талӧн со кутшӧм. Сӧветса государство миян зільӧ лӧсьӧдны (стрӧитны) ён воздушнӧй флот — уна лэбалан машинаяс. Дерт, йӧзӧн отсавтӧг государство оз на вермы регыдӧн лӧсьӧдны сійӧс. Рабочӧйяс кыдз-мый вермӧны отсалӧны государстволы: найӧ асланыс тшӧт вылӧ лӧсьӧдісны зэв нин уна аэропланъяс, быдса эскадрильяясӧн. Сӧмын крестьяна сыысь ёна бӧрӧ колисны.

Воздушнӧй флот лӧсьӧдны миян эм общество «Авиахим». Крестьяна пӧвстысь тайӧ обществоас шленӧ пырӧмъясыс пӧшти абу на, оз на тӧдчы нинӧм. Босьтам кӧть ми Коми обласьтысь: «Авиахим» ячейкаяс миян ставыс 98, шленыс 2183 морт (1% = сё морт пытшкысь сӧмын ӧтик морт пырӧма шленӧ): Сыктывдінкарын 24 ячейка — 659 шлен; Емдін уезд улын 21 ячейка — 481 шлен; Сыктыв уездын 22 ячейка — 445 шлен; Кулӧмдін уездын 26 ячейка — 433 шлен; Изьва уездын 5 ячейка — 165 шлен. Вывті на этша тайӧ. Тані унджыкыс (абу на, дерт, ставыс) служащӧйяс, крестьянаыд, гашкӧ, гоз-мӧд сӧмын сюрас. Ён воздушнӧй флот стрӧитны колӧ уна сьӧм. Сьӧм чукӧрмас, кор унджык крестьяна пырасны шленӧ «Авиахимӧ».

Вот медым крестьяна асланыс синмӧн аддзылісны лэбалан машинасӧ да тӧдмалісны сылысь ыджыд пӧльзасӧ, Мӧскуасянь и ыстісны тайӧ гидроплансӧ деревняясӧд лэбавны, уджалысь йӧзлы петкӧдлыны, найӧс кыпӧдны отсавны воздушнӧй флот стрӧитны.

Миян Коми обласьтын став сьӧмсӧ чукӧртӧма кык воӧн (организацияыс тані воссис май 15-ӧд лунӧ 1923 воын) сы вылӧ — 16.677 шайт 22 ур, на пиын «Коми морт» нима лэбалан машина вылӧ 2412 шайт 62 ур. Тайӧ этша на, сы вылӧ оз на шед лэбалан машинаыд.

Вайӧ жӧ, коми крестьяна, ёнджыка босьтчыламӧй сэсся лэбалан машина стрӧитан удж дорас! Отсаламӧй асланым Сӧветса государстволы лӧсьӧдны ён воздушнӧй флот, медым миян регыдджык овмӧсным кыпаліс да медым Сӧветса республика вылӧ некод оз лысьт водзӧ вылӧ кавшасьны да войнаӧн повзьӧдлыны!