ВЫЛЬ ЗАКОН ВОЕННӦЙ СЛУЖБА ЙЫЛЫСЬ

Неважӧн петіс выль закон военнӧй служба йылысь Сӧветса Республикаяс Союзын. Став служба срокыс лыддьыссьӧ 21 во — 19 арӧссянь 40-ӧдз. Сэтчӧ тшӧтш пырӧ призывӧдз велӧдчӧм (допризывная подготовка). Тайӧ велӧдчӧмыс мунӧ 19 арӧссянь призывайтчан воӧдз. Допризывникъяс лыддьыссьӧны военнообязаннӧйясӧн нин. Найӧ велӧдчӧны вонас ӧтик тӧлысь сӧмын, а сійӧ лыддьыссьӧ во чӧжся служба туйӧ.

Таво арнас призывайтсьӧны 1903 воын чужысьяс. Водзӧ кутасны быд воын, арнас, призывайтсьыны сэтшӧмъяс, кодлы январ 1-ӧд лун кежлӧ тырӧ 21 арӧс.

Действительнӧй службаыс ӧні лоӧ 5 во кузя — 21 арӧссянь 26-ӧдз. Сӧмын оз кутны став витнан восӧ призывайтӧм йӧз армияын служитны. Прӧстӧй салдатъяслы (пехота) срокыс 2 во, воздушнӧй флотын — 3 во, матросъяслы (моревывса флотын) — 4 во. Сы бӧрын найӧс лэдзасны гортаныс. Сэки найӧ 5 во тыртӧдзыс (26 арӧсӧдз) кутасны лыддьыссьыны кузь срока (долгосрочный) отпускын. Медым найӧ эз вунӧдны военнӧй делӧсӧ, кутасны найӧс корлыны кымыныськӧ повторительнӧй сборъяс вылӧ. Территориальнӧй часьтъясысь призывникъясӧс сборъяс вылӧ чукӧртлӧны вит во чӧжнас 8 тӧлысь кежлӧ — ӧтик либӧ кык тӧлысь кежлӧ вонас. Сэсся найӧ пыр гортас олӧны.

Вит во кольӧм мысти гӧрдармеечьяс кутасны лыддьыссьыны 14 во чӧж запасын.

Выль закон серти, военнӧй службаӧ кутасны призывайтсьыны став гражданаыс, сӧмын оз ставныслы кут сетсьыны оружйӧ. Выль законыс шуӧ: Октябрса революцияӧн перйӧмтор (завоевания) оружйӧӧн видзны врагъясысь вермӧ сетсьыны толькӧ уджалысь йӧзлы (рабочӧйяслы да крестьяналы). Уджавтӧм (нетрудовые) йӧз — тӧрговечьяс, кулакъяс — кутасны служитны нестрӧевӧй часьтъясын.

Сэсся выль закон шуӧ: быд гражданин вермӧ служитны ас сёрниа йӧзкостса (национальные) военнӧй часьтъясын — сійӧ службаыс ӧткодя кутас лыддьыссьыны. Войдӧр (сар дырйи) татшӧм праваыс некодлы эз сетсьыв.