КУТШӦМ ЖАЛӦВАННЬӦ БОСЬТӦНЫ СӦВЕТСА ГОСУДАРСТВОЫН МЕДГЫРЫСЬ ЮРАЛЫСЬЯСЫС

Кӧні ыджыдджыкӧс — СССР-ын али Германияын?

Унаӧн ӧд миян думайтӧны, дай кывлан мукӧддырйи сёрни костын:

— Кӧнкӧ медгырысь юралысьясыд миян уна и жалӧванньӧ куралӧны.

Неважӧн Харьковын (Украинаын) вӧлі торжественнӧй заседанньӧ германияса рабочӧйяс-делегатъяскӧд. Сэні налӧн председательыс Офергаген юаліс:

— Збыль али абу нӧ сійӧ: быттьӧ пӧ медгырысь юралысьясыс Сӧветса Республикаын босьтӧны вывті уна жалӧванньӧ да олӧны важ буржуйяс моз?

Сылы Петровскӧй ёрт (Ставукраинаса Исполкомын юралысь) вочакыв шуис:

— Быдӧнлы миян СССР-ын жалӧванньӧяс лӧсьӧдалӧ профсоюз. Украинаын медыджыд жалӧванньӧыс — правительствоса шленлӧн — 180 шайт тӧлысь, Мӧскуаын — 192 шайт. А уна-ӧ нӧ ті мынтанныд асланыд правительстволы?

— О, миян ёна гырысь! Эберт (важ Германияса президент) вӧлі босьтӧ 40.000 (нелямын сюрс) марка зарниӧн вонас. Ӧнія президент — Гинденбург — босьтӧ 100.000 марка зарниӧн да миллион марка представительство вылӧ. (Маркаыс 37 ур).

Со ӧд кодъяс олӧны уджалысь йӧз сьылі вылас!