ЛӦСЬӦДЧӦЙ ВОДЗВЫВ!

Сентябр 26 лунӧ — выставка.

Выставка — крестьяналы школа

Велӧдчытӧг видз-му уджавны, овмӧс кыпӧдны он вермы. Миян коми крестьяна мукӧд дорысь сійӧн ёна бӧрӧ кольӧмаӧсь. Пыр на уджалӧны важ пӧльясныс моз. Сы понда и сьӧкыд, сійӧн и ньӧжйӧн кыптӧ овмӧсныс.

Сӧвет власьт зільӧ крестьянаӧс велӧдны выль ногӧн уджавны, петкӧдлыны налы, кыдзи бурджык да кокньыдджык уджавны, кыдзи удж помсьыс унджык пӧльза босьтны.

Кыдзи нӧ крестьянаӧс велӧдныс, кыдзи петкӧдлыны налы выль ногӧн уджалӧмсӧ?

Выставкаясӧн.

Миян обласьтувса выставка вылын (воссьыліс юнь 29-ӧд лунӧ 1923 воын) бура унатор крестьяна аддзылісны. Гашкӧ, кодсюрӧ сы серти и уджалӧны.

Медым уджалӧмыс крестьяналӧн пыр ӧтарӧ бурмас, медым найӧ тӧдасны выльторъяс, выставкаяс вӧчалӧны унджыкысь: олӧмыд вежсьӧ — и уджыд ӧд сідз жӧ.

Сыктывдінкарын сентябр 26-ӧд лунӧ воссяс 2-ӧд районнӧй выставка (воддзаыс вӧлі колян гожӧмын). Сэні петкӧдласны (лоӧны юкӧдъяс): му уджалӧм, видз уджалӧм, скӧт бурмӧдӧм, вӧрӧн вӧдитчӧм, лыд-тшӧт (статистика) овмӧслы лӧсьӧдӧм, кооператив кыпӧдӧм, машинаясӧн уджалӧм, унатор.

Ставсӧ тайӧ петкӧдласны да висьтавласны выставка вылын крестьяналы. Висьталасны, кутшӧм выль туйяс аддзисны бӧръявылыс бурджыка уджавны.

Кӧть мый, а колӧ унджык коми крестьяналы (весиг ылыссалы) волыны тайӧ выставка вылас. Сыысь некутшӧм убытка оз ло. Унатор выставкаысь позьӧ велӧдчыны, тӧдмавны.

Миянлы колӧ регыдджык петны бур олӧмӧ. Бур олӧмыс — бура уджалӧм помын. Сэтчӧ велавны вермам ӧдйӧджык выставка вылысь.

Лӧсьӧдчӧй, коми крестьяна!