КЫДЗИ БОСЬТНЫ СЬӦМ ГОССТРАХЫСЬ

Государственнӧй страхованньӧ аслас прибыльясысь сеталӧ йӧзлы сьӧм: либӧ уджӧн, либӧ дзикӧдз — пӧжаръясысь видзчысян удж вылӧ.

Уджӧнсӧ сьӧмыс сетсьӧ уна срок кежлӧ. Кымын уна удждыссьӧ, сымын дырджык кежлӧ сетсьӧ: 100 шайтӧдз во джынсянь да воӧдз кежлӧ; сё шайтсянь куимсё шайтӧдз восянь да куим воӧдз кежлӧ, куимсё шайтысь унджыкыс куим восянь да вит воӧдз кежлӧ.

Уджӧн либӧ дзикӧдз сьӧмсӧ Госстрах сетӧ нарошнӧ та вылӧ губерняын (обласьтын) лӧсьӧдӧм сӧвещанньӧ тшӧктӧм серти.

Татшӧм сӧвещанньӧясыс видлалӧны йӧзӧн отсӧгъяс корӧмъяссӧ, шуӧны — сетны-ӧ сьӧмсӧ дзикӧдз али уджӧн, дай тшӧтш лӧсьӧдӧны, мыйта сьӧмсӧ колӧ сетны.

Дзикӧдз (не мынтӧм вылӧ) сьӧм коригӧн Госстрах контораӧ колӧ сетны со кутшӧм гижӧдъяс:

1) Сиктса обществосянь приговор либӧ пӧжарнӧй дружинаса шленъяс собранньӧлысь шуӧмсӧ; приговорас либӧ шуӧмас колӧ индыны, кутшӧм пӧжарнӧй кӧлуй корӧны, либӧ сы пыдди индыны, мыйта сьӧм колӧ да мыйяс вылӧ. Тшӧтш колӧ индыны — кодӧс тшӧктӧма сьӧмсӧ босьтны, кодлы тшӧктӧма сьӧм вылас кӧлуйсӧ ньӧбавны да кодлы тшӧктӧма бура видзны кӧлуйсӧ, не тшыкӧдны.

2) Обществосянь, дружинасянь либӧ учрежденньӧсянь кӧсйысьӧм дзоньвидзаӧн пӧлучитӧм пӧжарнӧй кӧлуй видзӧм йылысь либӧ босьтан сьӧмсӧ не бокӧ видзӧм йылысь.

3) Госстрах агентсянь удостоверенньӧ сьӧм коланлун йылысь.

4) Вӧлӧсьтувса исполкомсянь удостоверенньӧ — мый корысьясыс ас тшӧт вылас пӧжарнӧй кӧлуйсӧ оз вермыны лӧсьӧдны дай гӧльлунысла оз вермыны сьӧмсӧ бӧр мынтыны.

Уджӧн сьӧм коригӧн Госстрах контораӧ колӧ сетны со мыйяс:

1) Сиктса обществосянь приговор либӧ пӧжарнӧй дружинасянь шуӧмсӧ уджӧн сьӧм корӧм йылысь. Тайӧ приговорыс либӧ шуӧмыс мед вӧлі вынсьӧдӧма (удостоверитӧма) волисполкомӧн-ӧ, сельсӧветӧн-ӧ.

Приговорас либӧ шуӧмас колӧ индыны, мыйта колӧ удждыны сьӧмсӧ да кутшӧм срок кежлӧ, код ногӧн кӧсйысьӧны мынтыны уджйӧзсӧ, кутшӧм пӧжарнӧй кӧлуй колӧ либӧ мый вылӧ сьӧмсӧ удждӧны, кодлы тшӧктыссьӧ босьтны сьӧмсӧ дай кодлы тшӧктыссьӧ видзны дзоньвидзаӧн пӧжарнӧй кӧлуйсӧ либӧ ньӧбавны пӧжарнӧй кӧлуйсӧ.

2) Кӧсйысьӧм дзоньвидзаӧн пӧжарнӧй кӧлуйсӧ видзӧм йылысь либӧ удждӧм сьӧм вылас сӧмын пӧжарнӧй кӧлуй ньӧбалӧм йылысь.

3) Госстрах агентсянь удостоверенньӧ уджӧн сьӧм коланлун йылысь.

4) Волисполкомсянь либӧ уисполкомсянь поручительство кадын уджӧн босьтӧм сьӧм мынтӧм йылысь.

Н. Сер.