СЮ КӦДЗАН КАД ВОӦ
Колӧ сэк кежлӧ лӧсьӧдчыны
Гожӧмбыд крестьянин шойччывтӧг уджалӧ. Тулыссянь арӧдз сійӧ дугдывтӧг пыр тӧждысьӧ. Медъёна, дерт, нянь понда. «Медтыкӧ няньыд вӧлі-а, сэсся ӧд кыдзкӧ олам», — кывлан крестьянинлысь. Тавося няньсӧ на идравны оз удит, сійӧ нин мӧвпалӧ мӧд вося йылысь, сю кӧдзӧм йылысь. Быть ӧд тӧждысь: гашкӧ, кӧйдысыс на сылӧн абу да.
Со ӧд, бара нин матысмӧ сю кӧдзан кадыд. Сэк кежлӧ колӧ ӧнісянь нин лӧсьӧдчыны, абу кӧ нин сёр.
Мый нӧ колӧ вӧчны дзик пырсӧ?
Медвойдӧр коськӧм
колӧ лӧсьӧдны. Коськӧмыд кӧ омӧль, кӧть кутшӧм кӧйдыс кӧдз — бур няньыд оз во, джын кӧйдысыд весьшӧрӧ вошӧ.
Кутшӧм коськӧм лыддьыссьӧ бурӧн?
Мед вӧлі небыд, ёгтӧм да ӧзим сёйысь гагтӧм.
Колӧ унджыкысь гӧрлыны, гӧрӧм мысти пырысьтӧм-пыр жӧ бура пинёвтны. Сэки коськӧмыд небзьӧ дай ёг туруныс бырӧ. Ёг туруныс кӧ оз ло — гагъяс оз лоны, сёйныс налы нинӧм лоӧ да. Медся ёна колӧ тӧждысьны, медым эз вӧв коськӧм вылад ёг туруныс. Ӧнісянь жӧ колӧ босьтчыны сійӧс бырӧдны. Он кӧ бырӧд — ӧзимыд вошӧ.
Бур кӧйдысӧн кӧдзны.
Та йылысь ёна оз нин ков висьтавны, быдӧн нин гӧгӧрвоӧны. Ӧти-кӧ, омӧль кӧйдыссьыд омӧль и няньыд воас; мӧд-кӧ, прӧста няньсӧ муӧ коялӧм лоас. Лучшӧ этшаджык кӧдзны мича кӧйдысӧн, гырысьджык кӧйдысӧн. Колӧ весавны да сортируйтны да прамӧя видлыны — чужӧ али оз.
Сідзжӧ оз ков вывті тшӧкыда кӧдзны. Миян кӧдзӧны уна — пуд 8−10 гӧгӧр десятина улӧ. Агрономъяс висьталӧм серти, колӧ кӧдзны сӧмын 6−8 пуд гӧгӧр. Тшӧкыда кӧ кӧдзан — посни шепта сюыд воас дай посньыдджык кӧйдыс тусьясысь ӧзимыс лым улын куйлігӧн тшыкӧ.
Кӧйдыс судзӧдны.
Быд крестьянинлӧн ӧд ещӧ оз на и овлы ас кӧйдысыс. Ковмас бокысь корсьны. Унджыкысь водзӧсӧн босьтны (ссуда) вайӧм кӧйдыс. Дерт, медбур — ас кӧйдыс, татчӧс. Уналаын таво тулыснас вӧлі сю ӧзимъяссӧ мӧд пӧв идйӧн кӧдзалӧмаӧсь, абу чужӧма сюыс да. Агрономъяс шуӧны: мӧдлаысь пӧ вайӧм кӧйдыс тані оз лӧсяв. Ми сідз жӧ думайтам, дай гижлім нин та йылысь «Коми Сикт» газетын (видзӧд № 15), колӧ, мися, лӧсьӧдны ас кӧйдыс запас. Да ӧд кор на ещӧ сійӧ лоас, а кӧдзан кадыд юр вылад, крестьяниныдлы кӧйдысыд дзик пыр колӧ.
Ӧні кывсьӧ, весиг вайӧм кӧйдысыс на абу быдлаын.
Кодлы та йылысь мог — тэрмасьӧй!
Медым кӧйдыстӧмла ньӧти эз коль пуста коськӧм!
