ВӦТЛІСНЫ ЗАСЕДАННЬӦ ВЫЛЫСЬ КЫК КОММУНИСТ ДЕПУТАТӦС

Вӧтлӧны правда висьталӧмысь. — Бӧр лоӧ лэдзны.

Берлин. Рейхстагса (государственнӧй дума) заседанньӧ вылын мунӧ вӧлі вензьӧм (прения) налогъяс йылысь выль закон лэдзӧм вӧсна. Вензьӧмас колӧ вӧлі сетны кыв коммунист депутатлы. Сэки рейхстагса председатель пыддиыс Грефе (националист партияысь) шуис: кадсӧ пӧ вензьӧмын сёрниталысьяслы (ораторъяслы) чинтыштам. Коммунист депутат Гелеин сувтіс паныд та вылӧ. Мукӧд коммунист депутатъяс сувтісны Гелеин дор, кыпӧдісны шум. Сэки председатель пыддиыс Грефе шуис: онӧ кӧ пӧ ланьтӧ, вӧтла пӧ тіянӧс заседанньӧ вылысь, дай пырысьтӧм-пыр вӧтлыны шуис коммунист депутатӧс Яддашӧс. Яддаш эз кывзы, заседанньӧ вылысь эз мун. Сы вӧсна лои недыр кежлӧ заседанньӧсӧ тупкывны. Заседанньӧ заводитчӧм мыстиыс Яддашӧс шуисны не лэдзны кызь заседанньӧ вылӧ. Грефе тшӧктӧм серти Яддашӧс да Гелеинӧс пӧличейскӧйяс мырдӧн петкӧдісны заседанньӧ вылысь. Сы бӧрти коммунист фракция нимсянь депутат Штеккер шуис: Грефе председателявны оз туй, тшӧктіс пырысьтӧм-пыр бӧр лэдзны заседанньӧ вылӧ Гелеинӧс да Яддашӧс.

Б.