ТӦДМАСЬТӦГ СИБЫРӦ МУННЫ ОЗ КОВ

Мунӧмаӧсь да олӧны омӧля. — Челядьнысӧ корны лоӧма ыстыны.

Айкатылаысь (Емдін уездысь) таво тулыснас мунлісны Сибырӧ овмӧдчӧм вылӧ сизим кӧзяйство. Муніганыс став овмӧснысӧ ассьыныс вузавлісны. Ӧні Сибырсянь найӧ гижӧны асланыс рӧдвужлы со мый: «Шыӧдчӧй Айкатыласа волисполкомӧ, медым сійӧ миянлысь видз-мунымӧс сетас кӧртымӧн миян рӧдвужлы. Миян олӧмным тані зэв омӧль. Арнас бӧр гортӧ кӧсъям локны». Тайӧ йӧзыс овмӧдчылӧмаӧсь Томскӧй губерняын. Челядьныс ветлӧны да корӧны, сёйныс нинӧм абу да. Коми йӧз! Нем думайттӧг мунны Сибырӧ оз ков. Зэв кӧ нин сьӧкыд тані кодлы овны, колӧ войдӧр ыставны йӧзӧс да гӧгӧрбок тӧдмавны, позьӧ оз Сибырӧ мунны, сюрӧ оз сэні тыртӧм муыс. Сэки сэсся вӧлисти вӧрзьӧдчыны ас оланінсьыныд.