ВЫЛЬ ЗАКОН ГӦТРАСЬӦМ ЙЫЛЫСЬ

Тайӧ лунъясӧ Народнӧй Комиссаръяс Сӧветын видлалӧны выль закон гӧтрасьӧм йылысь.

Важ мозыс жӧ, выль закон серти, вичкоын венчайтчӧм оз кут лыддьыссьыны (пыдди пуктыссьыны) — асьныс кӧ окотитасны венчайтчыны, кутас разрешайтчыны. Гӧтрасьӧм прамӧйӧн кутас лыддьыссьыны сӧмын исполкомын (ЗАГС-ын) гижсьӧмӧн.

Выль закон серти, гӧтрасигӧн ЗАГС-ын гижны кутасны гырысь юралысьяс (ответственные), оз посни гижысьяс (кыдзи вӧлі войдӧр). Сэсся юралысьясыс пондасны гӧтрасьысьяслы сэки жӧ висьтавлыны гӧтрасян законысь статьяяс.

Гижсьытӧдз войдӧр, свидетельяс дырйи, кутасны юасьны: кымынӧдысь гӧтрасьӧ либӧ верӧс сайӧ мунӧ; кымынлы кольӧ мынтысьны важ гӧтрасьӧмысь (гашкӧ, воддза гӧтырыслӧн челядь кольӧны).

Сідзжӧ гижсьытӧдз войдӧр жӧникыс да невестаыс висьталӧны: оз-ӧ висьны кутшӧмкӧ висьӧмӧн.

Тайӧ вӧчсьӧ сы вӧсна, медым гӧтрасьӧм вылӧ видзӧдісны бурджыка, прамӧя. Унаысь войдӧр вӧвлі тадзи: гӧтрасьлісны сӧмын уджалысьӧс корсьӧм понда; гӧтырыс мунтӧдзыс эз тӧдлы жӧникыслысь висьӧмсӧ, ачыс тшӧтш висьлывліс дай челядьсӧ висьмӧдліс.

Шуны кӧ, ӧні быдӧнлы колӧ лючки артыштны, мый вылӧ сійӧ мунӧ, кутшӧма кӧсйӧ водзӧ овмӧдчыны.

Гозъя кост юксьӧм (развод) выль закон серти лоӧ кокньыдджык жӧ важсьыс. Юксьыны оз ков судӧ мунны, позяс ЗАГС пыр жӧ. Овмӧсыс тадзи кутас юксьыны: мый вӧлі асланыс ӧтлаасьтӧдзныс (гӧтрасьтӧдзныс) — сетсяс аслыныс, мый лӧсьӧдісны ӧтлаын олігӧн — юксяс шӧриӧн.

Сэсся выль закон серти, позяс пи пыдди пыртасъясӧс босьтны (усыновление).