ВЫЛЬ ЗАКОН ВӦЛӦСЬТСА БЮДЖЕТ ЙЫЛЫСЬ

ВЦИК-лӧн президиумыс лӧсьӧдіс выль закон вӧлӧсьтувса бюджет йылысь. Та серти, вӧлӧсьтувса бюджет локтан (1925−1926) восянь бура ёна паськалӧ, доходнас и рӧскоднас.

Доходас, сельхозналогысь торйӧдӧм кындзи, 1925−1926 восянь кутас пырны:

1) вӧлӧсьтувса стрӧйбаясысь налог;

2) джынйыс, мыйта воӧ местнӧй бюджетӧ государственнӧй вӧрысь да видз-муысь доходыс;

3) нёльӧд пайыс, мыйта воӧ местнӧй бюджетӧ государственнӧй чери кыян угоддьӧясысь доход;

4) сэсся наследствоясса пошлинаясысь торйӧдсьӧ мыйкӧ мында.

Доход содӧм понда, вӧлӧсьт вермас паськӧдны и рӧскодсӧ ассьыс. Паськӧдны сідзи, медым волисполкомъяс вермисны асланыс бюджетнас бергӧдны став вӧлӧсьтувса кӧзяйствосӧ.

Сэсся, выль закон серти, локтан восянь вӧлӧсьтувса бюджетӧ кутасны пырны мукӧд пӧлӧс доходъяс, кодъяс войдӧр лыддьысьлісны уездувса бюджетын. Вӧлӧсьтувса бюджетысь водзӧ вылӧ кутас мынтыссьыны со кытчӧясӧ: бӧрйӧм йӧзлы жалӧванньӧясӧ вӧлӧсьтса велӧдысьяслы, пельшӧръяслы-бабкаяслы, яслиясын уджалысьяслы, мукӧдлы, кодъяс уджалӧны вӧлӧсьтын. Таысь кындзи, вӧлӧсьтувса бюджетӧ кутас пырны лечитчан учрежденньӧяс лӧсьӧдӧмъяс да сэтчӧясӧ струмент да лекарствояс судзӧдӧмъяс; сідзжӧ вӧлӧсьтувса сӧветъяс съезд чукӧртӧмъяс лоӧны вӧлӧсьтувса бюджет вылын.

Выль законсӧ помӧдз вынсьӧдас ВЦИК-лӧн сессия. Колӧ чайтны, тайӧ законыс кутас мунны тавося сентябр 1-ӧд лунсянь.

Тайӧ законыс — зэв ыджыд воськов водзӧ сӧвет власьтлӧн местаяс вылын уджавны, овмӧс бурмӧдны.