КОДЪЯСӦС СИКТЪЯСЫН БӦРЙЫНЫ ДЕЛЕГАТКАЯСӦ
Ӧнія делегаткаяс пытшкын унджыкыс лоӧны судзсьытӧма олана нывбабаяс, слугаяс. Унджыкыс на пиысь дӧваяс да верӧс сайӧ мунтӧм нывбабаяс. Шӧркоддьӧма олысь нывбабаяс пӧвстысь делегаткаяс зэв этшаӧнӧсь. Уна делегаткаяс эмӧсь томиник нывъяс пиысь. Ӧткымынлаын делегаткаяс собранньӧяс вылӧ веськалӧмаӧсь нывбабаяс кулакъяс пӧвстысь.
Бӧрйигӧн колӧ зільны, медым сиктса делегаткаясӧ эз веськавны нывбабаяс-кулакъяс. Тшӧтш колӧ зільны, медым эськӧ сиктъясын делегаткаясӧ веськалісны этшаджык нывбабаяс, кодъяс оз уджавны видз-муяс, — шуам, служащӧй гӧтыръяс. Найӧс колӧ бӧрйыны делегаткаясӧ зэв этшаник дай лючки гӧгӧрбок видзӧдлӧмӧн, кутшӧм бур найӧ вермасны сетны делегаткаалӧмӧн. Бӧрйысигӧн колӧ ёна видзӧдлыны сиктса велӧдысьяс вылӧ нывбабаяс пӧвстысь. Ӧні эмӧсь зэв уна сьӧлӧмсянь партиялы дай Сӧвет власьтлы бур вылӧ уджалысь велӧдысьяс. Сы вӧсна нывбаба-велӧдысьясӧс колӧ зільны бӧрйыны делегаткаӧ.
Сиктъясын унджык делегаткаыс колӧ лоны видз-му бердын уджалысьяс нывбабаяс пӧвстысь, крестьянкаяс пӧвстысь, нывбаба-кустаръяс пӧвстысь.
Сэсся колӧ зільны, медым делегаткаясӧ веськалӧны оз куш судзсьытӧма олысь нывбабаяс, дӧваяс, бобыльяс, томиник нывъяс, медым тшӧтш накӧд веськалӧны унджык шӧркоддьӧма олысь нывбабаяс. Тадзикӧн позяс тӧдмавны коланлунсӧ ассьыныс унджык сикаса олысь нывбабаяслысь, татшӧм делегаткаясса собранньӧ вылӧ бурджыка кутасны видзӧдны став йӧзыс. Важ делегаткаяс, коммунисткаяс, комсомолкаяс бурджыка нин кужӧны уджавны; найӧ сюсьджыкӧсь нин удж вылӧ. Сы вӧсна колӧ зільны, медым выль делегаткаясӧс бӧрйигӧн мыйкӧ мында кольӧны важ делегаткаяс пӧвстысь. Кӧні войдӧр омӧля на уджавлісны делегатка собранньӧяс, сэні делегаткаӧн колӧ бӧрйыны сюсьджык видз-му уджалысь нывбабаясӧс, коммунисткаясӧс.
Тайӧ бӧръя воас ёна содіны бура нин обществоса удж нуӧдысь нывбабаяс. Содіны и коммунисткаяс, комсомолкаяс. Ставнысӧ найӧс делегаткаясӧ бӧрйыны, дерт, оз ков. Колӧ сӧмын на пиысь бӧрйыны сэтшӧмъясӧс, кодъяс неважӧн на уджалӧны да омӧльджыка на кужӧны уджавнысӧ.
Делегаткаяс серти и кутас мунны уджыс найӧ собранньӧяслӧн. Сы вӧсна колӧ делегаткаяссӧ бӧрйыны сьӧлӧмсяньджык, бура уджалысьджык нывбабаясӧс. Бӧръямӧй, кор воас тайӧ кадыс, унджык гӧрйӧн уджалысь нывбабаясӧс, бура да сьӧлӧмсянь делегатка собранньӧяс вылын уджалысьясӧс.
О. С.
