ШТРАПЪЯС ОЗ ЛОНЫ
Коді оз мынты, кыскасны судӧ
Ми газетын уна нин гижлім тавося сельскокӧзяйственнӧй налог йылысь: мыйта сійӧ босьтсьӧ, мыйясысьджык босьтсьӧ, кыдзи да кӧні кутас босьтсьыны, кодлы кутшӧм кокньӧдъяс сетсьӧны, кытчӧ норасьны нелючки налог босьтӧмысь, сідз водзӧ. Ставсьыс ми аддзам, тавося налог кольӧм вося серти крестьяналы мынтыны быд боксянь ещӧ на кокниджык. Таво сельскокӧзяйственнӧй налог мынтӧм крестьяна овмӧсын ыджыда оз и тӧдчыв.
Сӧмын налог босьтӧмын вӧлі на ӧти неладнӧтор: штрапъяс. Кольӧм воясӧ коді вӧлі ёна радейтӧ нюжӧдчыны налог мынтӧмысь, сылы вӧлі налог босьтан учрежденньӧяс вермӧны пуктыны штрапъяс, вермӧны вӧлі налог мынтытӧм мортсӧ кымынкӧ сутки кежлӧ арестуйтны. Тайӧ уджас ӧткымынлаын вӧлі вӧчласны не закон серти и, быдтор. Сы вӧсна мукӧддырйиыс ёна лоӧ вӧлі тӧждысьны.
Ӧні, таво вылӧ, татшӧм штрапуйтӧмсӧ Народнӧй Комиссаръяслӧн Сӧветыс да Ставсоюзса Центральнӧй Исполнительнӧй Комитет шуисны эновтны дзикӧдз, не вӧчны.
Таысь войдӧрджык на Коммунист партиялӧн 14-ӧд конференцияыс шуліс: ми пӧ ёна тӧждысям налог мынтысьяс вӧсна да найӧ кӧзяйство вӧсна. Колӧ пӧ миян ӧні эновтчыны налог мынтӧмысь штрапъяс пуктавны.
Штрапъяс босьталӧмысь эновтчыны партия дай государство тшӧктісны дугдыны со мый вӧсна. Ӧні крестьяна гӧгӧрвоӧны нин став уджсӧ государстволысь, тӧдӧны, мый вӧсна государство босьтӧ сельхозналог, дай мынтӧны налогсӧ срокӧн дай тырӧн. Дерт, сюрӧны на ӧткымын йӧз, кодъяс кутасны зільны пышъявны налог мынтӧмысь, оз кутны налог мынтыны, кӧть и мынтынысӧ кокниа вермасны. Татшӧм йӧзыслы оз пуктыны некутшӧм штрап, кыскасны веськыда судӧ. Суд татшӧм ыръянитысьяссӧ кутас судитны Уголовнӧй Кодекс серти, 79 да 80 статьяяс серти.
Судыд сійӧ веськыда нин судитас налог мынтытӧмсьыд, сійӧ оз вӧч некутшӧм ӧшыбка. Налог босьтысь учрежденньӧясыд, кольны кӧ важ моз штрапъяс, вермисны тайӧ уджын вӧчны кутшӧмкӧ ӧшыбкаяс, кежны законысь.
Штрапуйтӧм бырӧдӧмӧн партия дай Сӧвет власьт ещӧ на бырӧдісны ӧтитор, кодӧн вермас лоны вӧлі ӧшыбка, вермас лоны вӧлі не закон ног уджалӧм. Штрапъяс бырӧдӧмӧн ещӧ на лои кокньӧдӧма крестьяналы налог мынтан удж, сійӧн ещӧ на сетӧма туй овмӧс бурмӧдӧм да паськӧдӧм вылӧ.
