ВОСЬТІСНЫ ГОЖӦМСЯ ОЛАНІН ЧЕЛЯДЬЛЫ

Кӧрткерӧсын (Кулӧмдін уездын) нывбабаяс ёна зілисны восьтыны гожӧмся оланін челядьлы (детские ясли). Юль 15-ӧд лунӧ восьтісны тайӧ оланінсӧ школаӧ. Яслиӧ босьтісны 23 челядьӧс; на пытшкын эм 7 нёнясьысь кага. Босьтісны челядьсӧ гӧльджыка олысь йӧзлысь.

Отсӧгсӧ ясли восьтӧм вылӧ сетісны: вӧлӧсьтувса исполком — 5 шайт, общественнӧй лавка — 6 шайт, инвалиднӧй лавка — 2 шайт. Сэсся крестьяналысь ӧктісны — 26 шайт да 3 пуд сю.

Медалӧма яслиӧ квайт кага видзысьӧс. Гырысь видзысьяслы шуӧма сетны дон 9 шайтӧн тӧлысьӧн-джынйӧн кежлӧ, мукӧдыслы 6 шайтӧн. Яслиса заведующӧйыслы сетісны 15 шайт тӧлысьӧн-джынйӧнысь.

Ясли зэв сӧстӧм да гажа. Лун кежлӧ кыкысь юкталӧны тшайӧн дай кыкысь вердӧны. Сёяныс: рокъяс просаысь, рисысь, маннӧй шыдӧсысь да ас (ид) шыдӧсысь. Тайӧ сёян-юансӧ быд лун вежлалӧны.

Челядьсӧ видзӧны со кыдзи: 8 чассянь 9 часӧдз найӧс пасьтӧдӧны, 9-сянь 10 часӧдз — тшай, 10 чассянь 11 часӧдз — керкаын ворсӧм, 11 чассянь 12 часӧдз — ывлаын ворсӧм да гуляйтӧм, 12−1 — ӧбед, 1 чассянь 2 часӧдз — шойччӧм, сэсся ывла вылын ворсӧм да ужын. Тшӧкыда волывлӧ яслиӧ пельшӧр.

П. С. Попов.