ДЕЛЕГАТКАЯС — ЫДЖЫД ВЫН
Делегаткаяс собранньӧ вылӧ волывлӧм ёна восьтӧ синъяссӧ нывбабалы. Татшӧм собранньӧ вылын нывбабаяс тӧдмалӧны — мый сэтшӧмыс лоӧ Сӧвет власьт, Коммунист партия, мый вӧсна вермасьӧны рабочӧйяс, кыдзи колӧ ёнджыка ӧтувтны рабочӧйясӧс крестьянакӧд. Делегаткаяс собранньӧяс вылын нывбаба тӧдмалӧ ассьыс праваяссӧ, велӧдчӧ, кыдзи корсьны сылы ассьыс праваяссӧ, кыдзи уджавны ассьыс олӧмсӧ бурмӧдӧм кузя да государстволы аслас уджӧн бур сетӧм кузя.
Делегаткаяс уджавнысӧ тшӧтш велӧдчӧны олӧмас: найӧ сиктса учрежденньӧясын нуӧдӧны уджъяс, видзӧдӧны, кыдзи сэні уджсӧ нуӧдӧны. Делегаткаяс висьтавлӧм серти, найӧ ышӧдӧм серти нывбабаяс восьталӧны челядь яслияс. Татшӧм яслиясыс воысь воӧ содӧны.
Делегаткаяс ышӧдӧм вӧсна жӧ кооперативъясӧ пырӧны шленъясӧн унджык нывбаба, найӧ пыр ӧтарӧ содӧны. Делегаткаяс кӧ уджалӧны кооперативын, сэтчӧ вайӧны унджык мамъяслы да челядьяслы колан тӧвар. Делегаткаяс заводитчӧм серти нывбабаяс ӧтувтчалӧны артельясӧ. Сійӧ артельясас нывбабаяс нуӧдӧны уджнысӧ ӧтув.
Делегаткаяс мукӧд серти ёнджыка зільӧны велӧдчыны грамотаӧ, тӧдӧныджык мукӧд серти, мыйла колӧ грамотаыс. Найӧ медвойдӧр кыпӧдӧны сёрни грамотаӧ велӧдчанінъяс восьталӧм йылысь, найӧ тайӧ уджсӧ нуӧдӧны помӧдз. Делегаткаяс пӧвстысь медрегыд сюрӧны нывбабаяс, кодъяс зільӧны восьтыны сиктын лыддьысян керкаяс, кодъяс зільӧны лэдзны стенӧ ӧшӧдан газетъяс, кодъяс гижӧны газетӧ.
Нывбабаяс пиысь медвойдӧр делегаткаяс жӧ кыссьӧны бурджык ногӧн видз-му уджалӧм тӧдмалӧмлань: уджалӧны видз-му удж тӧдмалан кружокъясын, агроном индалӧм серти зільӧны уджавны ассьыныс видз-мунысӧ.
Делегаткаяс асланыс собранньӧяс вылын велӧдчӧны тӧдмавны обществоса удж, велалӧны сійӧ удж кузя сёрни нуӧдны. Тайӧ собранньӧяс пыр нывбабаяс велалӧны нуӧдны сёрни, индавны уджсямсӧ съездъяс вылын. Сиктса пемыд нывбаба делегаткаяс собранньӧ вылӧ волывлӧмӧн, делегаткаӧ веськалӧмӧн гӧгӧрвоис Коммунист партиялысь уджсӧ. Уна сё делегаткаяс пырисны партияӧ, уджалӧны сэні сьӧлӧмсянь.
«Нывбабаяс — ыджыд вын», — шуліс Калинин ёрт. — «Найӧ нуӧны джын уджсӧ асланыс овмӧсас. Миянлы колӧ, медым найӧ эз уджавны куш асланыс овмӧсас, медым найӧ тшӧтш уджаласны обществоса уджын, медым найӧ тшӧтш бурмӧдісны миян власьтлысь овмӧснымӧс. Тайӧ ставсӧ вермам ми вӧчны делегаткаяс собранньӧяс пыр».
Со мый колӧ тӧдны быд сиктса нывбабаяслы делегаткаяс йылысь, найӧ собранньӧяс йылысь. Со мый вӧсна колӧ зільны быд нывбабалы веськавны делегаткаӧ выльысь найӧс бӧрйигӧн. Выльысь бӧрйӧмӧдз абу ылын, лоӧ аръявылын.
