МАШИНА ДЕРЕВНЯЛЫ

Киӧн кӧдзигӧн весь вошӧ зэв уна нянь. Велӧдчӧм йӧз лыддьӧны: быд десятинаын киӧн кӧдзӧмӧн оз чуж 540 сюрс нянь тусь — кодыс косьмас, кодсӧ кайяс кокаласны. Колӧ кӧдзны машинаӧн (сеялка).

Сэсся весавтӧм кӧйдысӧн кӧ кӧдзан, бара жӧ омӧль няньыд воас. Колӧ бара кӧйдыс весалан машина. Уна пӧлӧс машинаяс колӧны.

Дерт нин, крестьяна асьныс тӧдӧны му уджалан машинаяслысь бурсӧ, пӧльзасӧ. Сӧмын ӧд машинаясыд этшаӧсь, дай абу зэв донтӧмӧсь — ӧтка крестьяналы сьӧкыд судзӧдны. Колӧ ӧтувтчыны да восьтыны артель — машиннӧй тӧварищество. Татшӧм тӧвариществосӧ абу сьӧкыд лӧсьӧдны, сэсся сы пыр кокньыдджык машинаястӧ судзӧдны, дай кокньӧдъяс (льготы) сетӧны.

Машиннӧй тӧварищество лӧсьӧдсьӧ со кыдзи. Медвойдӧр колӧ лӧсьӧдны устав (уставъяс сюрасны библиотекаясысь, лыддьысян керкаясысь, видз-му уджалан юкӧдъясысь). Закон серти, медым эз вӧв вит мортысь этшаджык ӧтувтчысьясыс. Сэсся колӧ вӧчны общӧй собранньӧ, сэні тӧдмасьны уставнас дай гижсьыны, кодъяс кӧсйӧны пырны тӧвариществоас. Сэні жӧ колӧ вӧчны сёрнигижӧд (протокол), нимпас (список), кодъяс пырисны тӧвариществоӧ. Сэсся колӧ ыстыны обласьтувса видз-му юкӧдӧ (Обземуправление) заявленньӧ. Быд документ колӧ кырымавны став крестьяналы, кодъяс пырисны тӧвариществоӧ. Заявленньӧкӧд тшӧтш колӧ ыстыны волисполкомсянь удостоверенньӧ (кыкӧс), збыль-ӧ став крестьяниныслӧн эм права Сӧветъясӧ бӧрйысьны. Обземуправленньӧ пасйӧ тайӧ тӧвариществосӧ тӧлысь срокӧдз. Сы бӧрын сэсся тӧварищество вермӧ аслас уджӧ кутчысьны.