ВАШКАЫН УДЖ ОМӦЛЯ МУНӦ

Вашкаын (Емдін у.) эм коммунист партия ячейка. Ячейкаас куим шлен. Уджсӧ ячейкаас сувтӧдны ыстісны Емдінса Укомысь секретар пыдди, сӧмын сійӧ некутшӧм удж оз нуӧд. Сиктса удж нуӧданінъясын ни, комсомол ячейкаын ни шленъяслӧн удж оз тӧдчы. Укомӧн ыстӧм партийнӧй ёртъяс кызысьсӧ олӧны гортас. Комсомолечьяс да коммунистъяс ветлӧдлӧны вичкоӧ, гӧтрасьӧны вичкоын жӧ. Беспартийнӧйяс оз волывны собранньӧяс вылас, дай унджыкысьсӧ собранньӧясыс тупкыса.

Лыддьысян керка унмовсьӧма жӧ. Сэтӧні эмӧсь сӧмын крестьяналы ковтӧм да гӧгӧрвотӧм нигаяс. Крестьяна кост некутшӧм югдӧдан удж оз мун.

Пионер чукӧрӧс бурджык лэдзавны бӧр, некутшӧм удж на пӧвстын оз мун да. Асьныс пионеръясыс оз тӧдны, мый вӧчны.

Профсоюзлӧн удж некутшӧм жӧ оз мун. Уполномоченнӧйыс оз тӧд ассьыс уджсӧ.

Ӧні ёна висялӧны биа висьӧмӧн. Пельшӧр нинӧм оз вермы вӧчны: карболка кындзи сылӧн дзик нинӧм абу.

Волисполкомлӧн керкаыс киссьӧма. Зэрны кутас да, секретарыслы лоӧ тупкыны аслас пиджакнас делӧяссӧ, мед оз кӧтӧд.

Служащӧйяс куим тӧлысьӧдз оз аддзывны жалӧванньӧсӧ.

Уездувса исполком нинӧм оз вӧч удж бурмӧдӧм кузя. Обисполкомлы колӧ бураджык видзӧдлыны та вылӧ да мыйкӧ вӧчны. Йӧзыс Сӧвет власьт вылӧ увгӧны.

В. И. Полещиков.